بۇگىن ەلىمىزدىڭ استاناسىنا فينليانديا پرەزيدەنتى الەكساندر ستۋبب رەسمي ساپارمەن كەلدى. فين پرەزيدەنتىن قازاقستان پرەزيدەنتى قاسىم-جومارت توقاەۆ «اقوردا» رەزيدەنتسياسىندا قارسى الدى.

مەملەكەتتەر باسشىلارى بۇعان دەيىن بۇۇ باس اسسامبلەياسىنىڭ 80-ءشى سەسسياسى اياسىندا نيۋ-يوركتە كەزدەسكەن ەدى.

قاسىم-جومارت توقاەۆ:

– ءسىزدىڭ ساپارىڭىز – ەكىجاقتى ىنتىماقتاستىقتى دامىتۋعا تىڭ سەرپىن بەرۋ تۇرعىسىنان وتە ماڭىزدى. قازاقستان مەن فينليانديا اراسىندا دوستىققا ءارى ءوزارا تۇسىنىستىككە نەگىزدەلگەن ىقپالداستىق ورناعان. ەكى ەلدىڭ ورتاسىندا شەشىمىن تاپپاعان ماسەلە جوق. دەگەنمەن ينۆەستيتسيا جانە ساۋدا سالالارىندا بىرقاتار مۇمكىندىك بار. ءسىزدىڭ باستاماڭىزبەن ءوتىپ جاتقان بيزنەس-فورۋمنىڭ ورنى ەرەكشە. بۇگىن اتالعان جيىنعا قاتىسامىن. بۇل كاسىپكەرلەرىمىزدىڭ ىسكەرلىك بايلانىستاردى ورىستەتۋىنە زور سەپتىگىن تيگىزەدى دەپ ويلايمىن. بۇدان بولەك، گۋمانيتارلىق ىنتىماقتاستىققا ايرىقشا ءمان بەرەمىز. قازاقستاندىقتار فينليانديانى، سىزدەردىڭ سالت-داستۇرلەرىڭىز بەن مادەنيەتتەرىڭىزدى قۇرمەتتەيدى. كوپتەگەن وتانداسىمىز ءسىزدىڭ ەلگە تۋريست رەتىندە ءجيى بارادى. ساپارىڭىز مەملەكەتتەر اراسىنداعى سەرىكتەستىكتى نىعايتۋ ءۇشىن جاڭا مۇمكىندىكتەرگە جول اشاتىنىنا سەنىمدىمىن، - دەدى.

الەكساندر ستۋبب:

– بۇل مەنىڭ قازاقستانعا ءۇشىنشى مارتە كەلۋىم. العاش رەت 2008 جىلى مەن سىرتقى ىستەر ءمينيسترى، ال ءسىز سەنات سپيكەرى لاۋازىمىن اتقارعان كەزدە جۇزدەسكەن ەدىك. بۇل جولى ەكى باعىتقا باسا نازار اۋدارامىز دەپ ويلايمىن. ءبىرىنشى – ءوزارا قارىم-قاتىناس جانە ىسكەرلىك بايلانىستار. بۇگىن فينليانديادان ۇلكەن دەلەگاتسيا كەلدى. ونىڭ قۇرامىندا 20-دان استام ءىرى كومپانيانىڭ وكىلدەرى بار. استانا كوشەلەرىنەن Isku جانە Honkarakenne سياقتى تانىمال فين برەندتەرىن كوردىم. بۇل ءبىزدى قۋانتادى. كەلىسسوزدىڭ ەكىنشى باعىتى – سىرتقى ساياسات جانە قاۋىپسىزدىك. ءبىرشاما ماسەلە بويىنشا ۇستانىمدارىمىز ورتاق، كۇردەلى حالىقارالىق جاعدايلاردىڭ شەشىمىن تابۋعا بىرلەسە ۇمتىلامىز، - دەدى.

فينليانديا مەن قازاقستان اراسىنداعى ديپلوماتيالىق قاتىناس 1992 جىلى ورنادى. سودان بەرى ەكى ەل اراسىنداعى ىنتىماقتاستىق ەكونوميكا، ەكولوگيا، ءبىلىم بەرۋ سالالارىندا جۇيەلى دامىپ كەلەدى. گەوساياسي ارتىقشىلىق تا ءوزارا ءتيىمدى ۇسىنىستاردى ىلگەرىلەتىپ ۇلگەرگەن.

فينليانديا ءبىز ءۇشىن ەۋروپالىق وداقتىڭ بەلسەندى مۇشەسى رەتىندە كارى قۇرلىققا جول اشسا، قازاقستان ورتالىق ازياداعى ەڭ ءىرى ەكونوميكا ساناتىندا شيكىزات پەن ساۋدا جولىنىڭ بالاما باعىتىن ۇسىنىپ وتىر.

Abai.kz