تەڭىزشەۆرويلداعى لۋكويل ۇلەسى. الەم قوجايىندارى BlackRock پەن Vanguard قازاق حالقىنا شانس بەرە مە؟

سانكتسياعا ۇشىراعان رەسەيدىڭ لۋكويل كومپانياسى سىرتقى نارىقتارداعى اكتيۆتەرىن ساتۋعا نيەتتى. قازاقستاننىڭ باستى مۇناي اكتيۆى تەڭىز كەنىشىن يگەرەتىن تەڭىزشەۆرويل بىرلەسكەن كاسىپورىنىنىڭ 5 پايىز ۇلەسى وسى لۋكويلدىڭ يەلىگىندە. سوندا قازىر شەۆروندا 50 پايىز، ەكسونموبيلدە 25 پايىز، قازمۇنايگاز ارقىلى قازاقستاندا 20 پايىز جانە لۋكويلدا 5 پايىز بولىپ تۇر. قازاقستان لۋكويلدىڭ ۇلەسىن ساتىپ الىپ، تشو-دا تەك ءۇش اكتسيونەر قالدىرا الادى. تشو-نىڭ جارتىسىن شەۆرون، قالعان جارتىسىن ەكسون مەن قازاقستان تەڭ بولەتىندەي جاعدايعا مۇمكىندىك جوق ەمەس.

لۋكويلدىڭ 5 پايىز ۇلەسى قانشا تۇرۋى مۇمكىن؟ ول ءۇشىن جالپى تشو قانشا تۇرادى دەگەن سۇراققا جاۋاپ ىزدەۋ كەرەك. قازىر بىرلەسكەن كاسىپورىننىڭ اكتيۆتەرى 45,4 ميلليارد دوللار شاماسىندا. مىندەتتەمەسى كوپ ەمەس. ول 10,2 ميلليارد دوللار. كومپانيانىڭ جەكە كاپيتالى 35,2 ميلليارد دوللار. ونىڭ 35,16 ميللياردى ۇلەستىرىلمەگەن كىرىس. ءبىر سوزبەن ايتقاندا، قوسىمشا گۋدۆيلى مەن بولاشاق كاپيتاليزاتسياسىن ەسەپتەمەسەك تشو كەمىندە 35,2 ميلليارد دوللار تۇرادى. دەمەك، لۋكويلدىڭ 5 پايىزدىق ۇلەسى 1,76 ميلليارد دوللار. سانكتسيا جاعدايىندا لۋكويلدى 1,3 ميلليارد دوللارعا «سىندىرا» الساق بۇل ءبىز ءۇشىن وتە ءتيىمدى ساۋدا بولار ەدى. ۇلتتىق قوردان الا تۇرساق تا، 1,3 ميلليارد دوللاردى تابۋعا بولادى.

بىلتىر تشو 2,1 ميلليارد دوللار عانا تازا كىرىس الدى. وتكەن جىلدارمەن سالىستىرعاندا بۇل ءبىرشاما از بولدى. ونداعى كىرىستەن لۋكويلدىڭ ەنشىسى 105 ميلليون دوللار. وسىنداي پەسسيميستىك ستسەناريمەن ەسەپتەسەك، قازاقستان ۇلەستى ساتىپ الۋعا كەتكەن شىعىنىن 10 جىلدا قايتارىپ الادى. بىراق مۇناي باعاسى ءوسىپ كەتسە، وندا 4-6 جىلدىڭ ىشىندە اقتاۋعا بولادى. بۇل ەندى بولاشاق جاعدايدىڭ قالاي قۇبىلارىنا بايلانىستى. سوسىن تاعى ءبىر ماسەلە. 35,16 ميلليارد دوللار ۇلەستىرىلمەگەن كىرىستىڭ 1,75 ميلليارد دوللارى لۋكويلدىڭ اقشاسى. ونى رەسەيلىكتەر ۇلەسىن ساتار الدىندا تشو-دان شىعارىپ الا ما؟ ەگەر شىعارىپ السا، كومپانيا قۇنى تيىسىنشە سول 1,75 ميلليارد دوللارعا تومەندەۋى ءتيىس.

رەسەيدىڭ پاتشا كەزىنەن بەرى باستالعان قازاق مۇنايىنداعى ءداۋىرى بىتكەن سياقتى. ەندى الەمنىڭ ناعىز قوجايىندارى، قاراپايىم جاندار بىلمەگەن جانە ەستىمەگەن BlackRock پەن Vanguard سىندى اكۋلالاردىڭ زامانى كەلدى. وسى ەكى ينۆەستيتسيالىق قور تىكەلەي جانە ساتەلليتتەرى ارقىلى ءبىر-بىرىمەن جاھاندىق باسەكەلەستىك سپەكتاكلىن ويناپ جۇرگەن Chevron مەن ExxonMobil كومپانيالارىنىڭ نەگىزگى اكتسيونەرلەرى. سوندىقتان قازاق مۇنايىنىڭ 70 پايىزدان استامى وسى BlackRock پەن Vanguard قولىندا ەكەنىن ۇمىتپاڭىزدار. جانە ءبىر قىزىعى، ولار پايدا تاۋىپ جاتقان تەرريتوريادا ەشقاشان دا سوعىس بولمايدى.

كوكا-كولا پەپسي، جارناماسى دەرزكي. ءبىر-بىرىمەن ءومىرى باسەكەلەس بولىپ كەلە جاتقان The Coca-Cola Compاny مەن Pepsi Co الپاۋىتتارىنىڭ دا نەگىزگى قوجايىندارى وسى BlackRock پەن Vanguard. سوندىقتان باسەكە دەگەن ادەمى ەرتەگى ماركەتينگتىك قۇرال عانا. ال ناعىز تىرلىك نيۋ-يوركتاعى 10-شى اۆەنيۋدا، لورەنس فينك دەگەن اعايدىڭ قاتىسۋىمەن وتەتىن جابىق جينالىستاردا شەشىلەدى.

ايبار ولجاەۆ

Abai.kz