ءماجىلىس دەپۋتاتى، «اق جول» فراكتسياسىنىڭ مۇشەسى ولجاس نۇرالدينوۆ قارجى نارىعىن رەتتەۋ جانە دامىتۋ اگەنتتىگىنىڭ ءتورايىمى ءمادينا ابىلقاسىموۆاعا يسلام بانكينگىن دامىتۋ ماسەلەسىن جانە ونى قازاقستاندا تولىق ەنگىزۋگە زاڭنامالىق بازا دايىن با دەگەن سۇراق قويدى.

دەپۋتات اتاپ وتكەندەي، جاڭا زاڭ جوباسىندا ءداستۇرلى بانكتەردە «يسلام تەرەزەلەرىن» اشۋ ارقىلى يسلام بانكينگىن دامىتۋ ۇسىنىلعان.

«قازىرگى ۋاقىتتا ەلىمىزدەگى يسلام بانكتەرىنىڭ ۇلەسى جالپى قارجى نارىعىنىڭ نەبارى 0,2–0,3%-ىن قۇرايدى جانە ولار تەك ءۇش بانك ارقىلى ۇسىنىلادى. سونىمەن قاتار، يسلام ينۆەستيتسيالارىنىڭ الەۋەتى شامامەن 3 تريلليون تەڭگە دەپ باعالانۋدا. بۇل قاراجاتتى يسلام قۇقىق نورمالارىن ساقتاي وتىرىپ، ەكونوميكانى دامىتۋعا پايدالانۋ مۇمكىندىگى بار»، — دەدى نۇرالدينوۆ.

سونداي-اق ول «اق جول» فراكتسياسى يسلام بانكينگى ونىمدەرىن كەڭەيتۋ جانە يسلام قارجىلاندىرۋ پرينتسيپتەرىنە ساي ترانزاكتسيالارعا قوسىمشا تالاپتار ەنگىزۋ بويىنشا ۇسىنىستار ازىرلەگەنىن جەتكىزدى.

دەپۋتات اگەنتتىك باسشىسىنان: «ءبىزدىڭ ۇسىنىستارعا قاتىستى اگەنتتىكتىڭ ۇستانىمى قانداي جانە قولدانىستاعى زاڭناما قازاقستاندا يسلام بانكينگىن تولىق ىسكە قوسۋعا جەتكىلىكتى مە؟» — دەپ سۇرادى.

ءمادينا ابىلقاسىموۆا ەلدەگى يسلام بانكينگى سەكتور ءالى شاعىن ەكەنىن، بىراق ونى دامىتۋ ءۇشىن ناقتى شارالار قولعا الىنعانىن راستادى.

«راس، بىزدە ەكى يسلام بانكى بار، بىراق ولاردىڭ ۇلەسى وتە از. سوندىقتان زاڭناما اياسىندا امبەباپ ليتسەنزياسى بار بانكتەرگە يسلام تەرەزەلەرىن اشۋ مۇمكىندىگىن جاسادىق»، — دەدى ول.

ابىلقاسىموۆانىڭ ايتۋىنشا، يسلام بانكينگىن رەتتەيتىن ەرەجەلەردىڭ كوپشىلىگى زاڭنامادا قاراستىرىلعان. «ءبىز سونداي-اق بارلىق يسلام قارجىلاندىرۋ اكتيۆتەرى مەن مىندەتتەمەلەرى ءۇشىن بولەك ەسەپ جۇرگىزۋدى ەنگىزدىك. ءار بانك شاريعاتقا ساي يسلام كەڭەسىن قۇرۋى ءتيىس»، — دەپ ءتۇسىندىردى اگەنتتىك باسشىسى.

سونىمەن قاتار، دەپۋتاتتاردىڭ ۇسىنىستارى، ونىڭ ىشىندە قوسارلانعان سالىق سالۋدى جويۋ جانە قۇقىق قورعاۋ تاجىريبەسىنە نەگىزدەلگەن باسقا دا ەرەجەلەر ەسكەرىلگەنىن اتاپ ءوتتى.

«بارلىق ۇسىنىستاردى قاراستىردىق، قوسارلانعان سالىق ماسەلەسىن دە نازارعا الدىق»، — دەدى ءمادينا ابىلقاسىموۆا.

Abai.kz