ءدال قازىر قازاق ءۇمىتىن ارقالاعان كيەلى Airbus ۆاشينگتوننان جاقسى كوڭىل-كۇيمەن ۇشىپ كەلە جاتىر. مەملەكەت باسشىسى قاسىم-جومارت توقاەۆتىڭ اقش ساپارى ءبىز ءۇشىن بەرەكەلى اياقتالدى. قالتادا 17 ميلليارد دوللارلىق ينۆەستيتسيالىق كونتراكت بار. دەمەك، ەلدەگى ءوندىرىس، ەكونوميكالىق بەلسەندىلىك ودان ءارى جاندانا تۇسەدى. ال سيرەك كەزدەسەتىن مەتالدار نارىعىندا قازاقستان بەلدى ويىنشىلاردىڭ بىرىنە اينالماق. اقش قازاقستانعا 100 ميلليارد دوللاردان اسا قارجى سالعان ەڭ ءىرى ينۆەستور. ءبىزدىڭ ەكونوميكامىزدى العا سۇيرەيتىن دە وسى ەل ەكەنىن ۇمىتپاۋ كەرەك.

"سوڭعى جىلدارى ەلدەرىمىز اراسىنداعى تاۋار اينالىمى ەكى ەسە ءوسىپ، 5 ميلليارد دوللار مەجەسىنە جۋىقتادى. امەريكاداعى ۋرانعا سۇرانىستىڭ شامامەن 25 پايىزىن قامتاماسىز ەتىپ وتىرمىز. قازاقستاندا 600-دەن استام امەريكالىق كومپانيا بيزنەس جۇرگىزەدى" – دەدى، پرەزيدەنت توقاەۆ.

قازىر قازاقستان اقش-تىڭ ورتالىق ازياداعى نەگىزگى ساۋدا سەرىكتەسى. ايماقتاعى امەريكالىق ينۆەستيتسيالاردىڭ 80%-ى قازاقستانعا تيەسىلى. قالعانىن وزبەكستان مەن قىرعىزستان بولىسۋدە. تاۋەلسىزدىك العاننان بەرى اقش-تان قازاقستانعا تىكەلەي تارتىلعان ينۆەستيتسيالار كولەمى 60 ميلليارد اقش دوللارىنان استى، بۇل ەلىمىزگە كەلگەن بارلىق شەتەلدىك تىكەلەي ينۆەستيتسيالاردىڭ 13%-دان استامىن قۇرايدى. 2024 جىلى شامامەن 869 ميلليون دوللار تارتىلدى. 2025 جىلدىڭ ءبىرىنشى توقسانىندا اقش-تان قازاقستانعا كەلگەن جالپى ينۆەستيتسيالار كولەمى 362,4 ميلليون دوللاردى قۇرادى.

(سۋرەت: اقوردا تەلەگرام ارناسىنان الىندى)

قازىر بىزدە 630-دان استام امەريكالىق كومپانيا جۇمىس ىستەيدى. 2023 جىلى ەكىجاقتى تاۋار اينالىمى 4 ميلليرد اقش دوللارىنان استى. وسىدان ەكى اي بۇرىن مەملەكەت باسشىسى نيۋ-يورككە ساپارلاپ، امەريكالىق بيزنەس اكۋلالارمەن كەزدەسىپ، ولارعا بىزدەگى ەكونوميكالىق رەفورمالار مەن ينۆەستيتسيالىق كليماتتىڭ جاعدايىن تانىستىرعان بولاتىن.

وسىنىڭ جاقسى اسەرىنەن ەلىمىزگە كەڭەس كەزىنەن تۇساۋ بولىپ كەلە جاتقان دجەكسون–ۆەنيك تۇزەتۋلەرى الىنىپ تاستالدى. قازاقستان بۇل سانكتسيالىق قۇرالدىڭ بارلىق تالاپتارىن ورىنداپ،  اقش كونگرەسىنىڭ قوس پالاتاسى مەن ەكى پارتياسىنىڭ، سونداي-اق جەتەكشى ەۆرەي ۇيىمدارىنىڭ قولداۋىنا يە بولدى. بيىل ءبىزدىڭ يزرايل مەن اراب ەلدەرى قاتىناسىن قولدايتىن اۆراام كەلىسىمىنە قوسىلۋىمىز بىزگە قوسىمشا ۇلكەن ۇپاي الىپ كەلدى. كونگرەسستەگى ەۆرەي ءلوببيى ەلىمىزگە وتە جاقسى كوزقاراس تانىتىپ وتىر.

قازاقستان وسىمەن سىرتقى ساياسات پەن بولاشاق نەتۆوركينگ جەمىسى بويىنشا بيىلدىڭ بارلىق ماقساتىن ورىندادى دەپ ايتا الامىن. بىراق قورىتىندى ءسوزدى جەلتوقسان ايىندا جازاتىن بولامىز.

ايبار ولجاەۆ

Abai.kz