اۋعانستان مەن پاكىستان – ەكى مۇسىلمان ەل وتكەن بەيسەنبى كۇنى تۇركيانىڭ ىستامبۇل قالاسىندا 19 قازاندا كاتاردا قول جەتكىزىلگەن اتىستى توقتاتۋ كەلىسىمىن ۇزارتۋ ءۇشىن كەزدەستى.

دەگەنمەن پاكىستان سىرتقى ىستەر مينيسترلىگى جەكسەنبى كۇنى مالىمدەمە جاساپ، كەلىسسوزدەردىڭ جۇما كۇنى اياقتالعانىن حابارلادى.

سىرتقى ىستەر مينيسترلىگى: «تاليبان» رەجيمى ءبىزدىڭ اۋعانستان تەرريتورياسىن پاكىستانعا قارسى شابۋىلدار جاساۋ ءۇشىن پايدالانباۋ تۋرالى نەگىزگى تالابىمىزعا جاۋاپ بەرمەدى، سونىمەن قاتار ناقتى جاۋاپكەرشىلىكتەن جالتارۋعا تىرىستى»، - دەپ ايىپتادى.

مالىمدەمەدە سونداي-اق «تاليبان رەجيمى تەك ۋاقىتشا اتىستى توقتاتۋ كەلىسىمىن ۇزارتقىسى كەلەتىنى» اتاپ ءوتىلدى.

تاليبان ۇكىمەتىنىڭ ءباسپاسوز حاتشىسى زابيحۋللا مۋدجاحيد سەنبى كۇنى: «كەلىسسوزدەر بارىسىندا پاكىستان تاراپى بارلىق قاۋىپسىزدىك جاۋاپكەرشىلىگىن اۋعانستان ۇكىمەتىنە اۋدارۋعا ارەكەتتەندى»، - دەپ ايىپتادى.

ول كەلىسسوزدەردىڭ ءساتسىز اياقتالۋىنا جاۋاپكەرشىلىك تولىعىمەن پاكىستانعا جۇكتەلەتىنىن اشىق ايتتى.

پاكىستان سىرتقى ىستەر مينيسترلىگى: «پاكىستان ەكىجاقتى داۋلاردى ديالوگ ارقىلى شەشۋگە ۇمتىلادى، بىراق پاكىستان ءۇشىن باستى ماسەلە – اۋعانستاننان كەلەتىن تەرروريزم قاۋپى ءبىرىنشى كەزەكتە شەشىلۋى كەرەك»، - دەپ مالىمدەدى.

تاليبان ۇكىمەتى «شابۋىلعا ۇشىراعان كەزدە ءوزىن-ءوزى قورعاۋ قۇقىعى بار ەكەنىن» مالىمدەپ، اتىستى توقتاتۋ كەلىسىمى «ءوز كۇشىندە قالادى» دەپ سەندىردى.

بىرىككەن ۇلتتار ۇيىمىنىڭ مالىمەتى بويىنشا، قازان ايىنداعى قاقتىعىس 70-تەن استام ادامنىڭ ءومىرىن قيدى، ونىڭ ىشىندە 50-گە جۋىعى اۋعاندىق بەيبىت تۇرعىن.

يسلاماباد كورشىلەس اۋعانستاننان قارۋلى توپتارعا، اسىرەسە پاكىستان تاليبانىنا (تتپ) قولداۋ كورسەتۋدى توقتاتۋعا كەپىلدىك بەرۋىن تالاپ ەتەدى.

كابۋل تتپ-عا قولداۋ ءبىلدىرىپ وتىرعانىن جوققا شىعارىپ، كەرىسىنشە پاكىستاندى ايماقتاعى «يسلام مەملەكەتى» (ISIS) ۇيىمىن قارجىلاندىرىپ وتىر دەپ ايىپتايدى.

قازان ايىندا كابۋلدا جارىلىس بولىپ، تاليبان ۇكىمەتى وعان پاكىستاندى ايىپتاپ، شەكارا قورعانىس كۇشتەرىنە شابۋىل جاسادى.

پاكىستاننىڭ قورعانىس ءمينيسترى حودجا اسيف قاقتىعىستان كەيىن: «پاكىستان يادرولىق دەرجاۆا رەتىندە تاليبان رەجيمىن تولىعىمەن جويىپ، ارسەنالىنىڭ از عانا بولىگىمەن ولاردى ۇڭگىرلەرىنە قايتا قۋىپ تىعا الادى»، - دەپ مالىمدەگەن ەدى.

وعان جاۋاپ رەتىندە تاليباننىڭ ىشكى ىستەر ءمينيسترى سيراجۋددين حاككاني: «ءبىز مۇسىلمانبىز، باۋىرلارمىز، كورشىمىز، بىراق كەيبىر ادامدار (پاكىستاندا) ادەيى نەمەسە بايقاۋسىزدا وتپەن ويناپ، سوعىس اشىپ جاتىر»، - دەدى.

ول اۋعان حالقىنىڭ «سوعىستى قالامايتىنىن» اتاپ كورسەتتى، بىراق «ۇلتتىق اۋماقتى قورعاۋ» تاليبان ءۇشىن «باسىمدىقتاردىڭ ءبىرى» ەكەنىن قايتالادى.

جەكسەنبى كۇنى تۇركيا پرەزيدەنتى ەردوعان كەلىسسوزدەر «قازىرگى ۋاقىتتا دۇرىس باعىتتا ءجۇرىپ جاتىر» دەپ مالىمدەدى.

ول جۋرناليستەرگە: «وڭ ناتيجەگە سەنەمىز»، - دەدى. ول سونداي-اق تۇرىك مينيسترلەرىنىڭ وسى اپتادا يسلامابادقا بارۋى مۇمكىن ەكەنىن ايتتى.

Abai.kz