جوعارى اۋديتورلىق پالاتا سولتۇستىك قازاقستان وبلىسىنا بولىنگەن بيۋدجەت قاراجاتى مەن مەملەكەتتىك اكتيۆتەردىڭ پايدالانىلۋ تيىمدىلىگىنە جۇرگىزىلگەن ءاۋديتتىڭ قورىتىندىىن جاريالادى.

جۇرگىزىلگەن تەكسەرۋ سوڭعى بەس جىلدا ءوڭىر نەگىزگى الەۋمەتتىك-ەكونوميكالىق كورسەتكىشتەردى ورىنداعانىن كورسەتتى. جالپى وڭىرلىك ءونىم 2020 جىلدان بەرى 69%-عا ارتقان، جۇمىسسىزدىق دەڭگەيى 0,4%-عا تومەندەگەن. تۇرعىن ءۇي قورى دا 600 مىڭ شارشى مەترگە وسكەن.

سونىمەن بىرگە، اۋديت ءوڭىردىڭ ءومىر ساپاسىنا اسەر ەتەتىن جانە ەكونوميكالىق دامۋدى تەجەيتىن بىرقاتار ماسەلەلەردى انىقتادى.

- وبلىستا حالىقتىڭ تابيعي ءوسىمى تومەندەپ، تەرىس كوشى-قون سالدوسى ساقتالىپ وتىر.

ءبىلىم بەرۋ سالاسىندا ءۇش اۋىسىمدى جانە اپاتتى جاعدايداعى مەكتەپتەر ماسەلەسى شەشىلمەگەن. 17 مەكتەپتە سپورت زالى جوق، 24 مەكتەپ پاندىك كابينەتتەرمەن قامتاماسىز ەتىلمەگەن.

مەديتسينا سالاسىندا عيماراتتاردىڭ شامامەن 74%-ى توزعان، - دەپ جازىلعان پالاتا اقپاراتىندا.

كاسىپكەرلىك سۋبەكتىلەرى سانى ارتقانىمەن، ولاردىڭ ءجوو-دەگى ۇلەسى تومەندەگەن.

جوعارى اۋديتورلىق پالاتانىڭ توراعاسى ءاليحان سمايىلوۆ كوتەرمە جانە بولشەك ساۋدا كاسىپورىندارىنىڭ كىرىسى ايتارلىقتاي كەمىگەنىن اتاپ ءوتتى. مەملەكەتتىك كىرىستەر كوميتەتىنىڭ دەرەگىنە سايكەس، بۇل كورسەتكىش 100 ملرد تەڭگەگە ازايعان.

«دەمەك، ءوڭىردىڭ ساۋدا سالاسىنداعى سالىقتىق الەۋەتى تومەندەگەن. ياعني سالىق از تولەنگەن، بۇل ءوز كەزەگىندە جەرگىلىكتى بيۋدجەتتىڭ الەۋمەتتىك ينفراقۇرىلىمدى دامىتۋ مۇمكىندىگىن شەكتەدى. كولەڭكەلى سەكتور ارتقان بولۋى ىقتيمال، بۇل باعىتتا جۇمىس جۇرگىزۋ قاجەت»، — دەدى ءاليحان سمايىلوۆ.

ەكونوميكا جانە قارجى باسقارمالارى اراسىنداعى وكىلەتتىكتەردىڭ كەلىسىلمەۋى بيۋدجەت جوسپارلاۋىندا الشاقتىق تۋعىزعان. بيۋدجەت زاڭناماسى ساقتالماي، جالپى قۇنى 56 ملرد تەڭگەنى قۇرايتىن 11 جوبا جوسپارلانعانى انىقتالدى.

ستراتەگيالىق نىسان – «Qyzyljar» اەا نازاردان تىس قالعان. ينجەنەرلىك ينفراقۇرىلىمنىڭ بولماۋى بىرقاتار وبەكتىلەردىڭ ۋاقىتىندا ىسكە قوسىلماۋىنا سەبەپ بولعان.

سونىمەن قاتار، باسىمدىعى تومەن جوبالارعا قاراجات بولىنگەن:

– اكىمشىلىك عيماراتتاردى رەكونسترۋكتسيالاۋعا – 7,3 ملرد تەڭگە،

– تەاتر قۇرىلىسىنا – 7 ملرد تەڭگە.

وبلىستاعى 38 تىرەك اۋىل ورتالىقتاندىرىلعان ساپالى اۋىز سۋمەن قامتاماسىز ەتىلمەگەن. سالىنعان 79 نىساننىڭ 22-ءسى (10 ملرد تەڭگە) پايدالانۋشى ۇيىمدارعا بەرىلمەگەن.

كولىك ينفراقۇرىلىمىن دامىتۋ جەتكىلىكسىز دەڭگەيدە: جولاۋشىلار كولىگىن دامىتۋدىڭ كەشەندى سحەماسى جوق، جول قاۋىپسىزدىگىنە مونيتورينگ تولىق جۇرگىزىلمەيدى.

«سولتۇستىك» الەۋمەتتىك-كاسىپكەرلىك كورپوراتسياسىنىڭ قىزمەتى ءتيىمسىز دەپ تانىلدى.

– بىرلەسكەن كاسىپورىندار قۇرۋ 1 ملرد تەڭگەگە جۋىق شىعىنعا اكەلگەن.

– بەيىندى ەمەس اكتيۆتەردى ۇستاۋ – 610 ملن تەڭگە،

– وڭىرلىك تۇراقتاندىرۋ قورلارىنىڭ قاراجاتىن پايدالانۋ 298 ملن تەڭگە شىعىن تۋعىزعان.

– بۋحگالتەرلىك ەسەپتە 24 ملرد تەڭگەدەن استام بۇزۋشىلىق تىركەلگەن.

- 5,5 ملرد تەڭگە سوماسىنا ءبىر كوزدەن ساتىپ الۋ ارقىلى شارتتار جاساسۋ جانە قوسالقى مەردىگەرلىككە قويىلعان شەكتەۋلەردى ساقتاماۋ دەرەكتەرى انىقتالعان، - دەر كورسەتتى تەكسەرىس ناتيجەسى.

اۋديت قورىتىندىسى مىناداي:

– 28,3 ملرد تەڭگەگە قارجىلىق بۇزۋشىلىق;

– 112,4 ملرد تەڭگە بيۋدجەت قاراجاتىنىڭ ءتيىمسىز جوسپارلانۋى جانە پايدالانىلۋى;

– 111 ماتەريال اكىمشىلىك ءىس قوزعاۋعا جىبەرىلگەن;

– بىرقاتار ماتەريال قۇقىق قورعاۋ ورگاندارىنا تاپسىرىلماق.

جوعارى اۋديتورلىق پالاتا انىقتالعان بۇزۋشىلىقتاردى جويۋ، لاۋازىمدى تۇلعالاردى جاۋاپتىلىققا تارتۋ جانە زاڭناماعا قاجەتتى وزگەرىستەر ەنگىزۋ ماسەلەلەرى ۆەدومستۆونىڭ باقىلاۋىندا بولاتىنىن حابارلادى.

ايتا كەتەيىك، سقو-دا مەكەمە بۋحگالتەرى 17 ملن تەڭگە بيۋدجەت قاراجاتىن يەمدەگەنى ءۇشىن سوتتالدى.

Abai.kz