جەتىسۋ وبلىسىندا «تازا قازاقستان» رەسپۋبليكالىق ەكولوگيالىق باعدارلاماسى اياسىندا ەرەكشە فورماتتاعى «تازا قازاقستان - ءبىزدىڭ بولاشاعىمىز» اتتى اكتسيا وتكىزىلدى. بۇل شارادا ۇيىمداستىرۋشىلار تالدىقورعان قالاسى كوشەلەرىن تازالايتىن جاندارعا ريزاشىلىق ءبىلدىرىپ، ولارعا ىستىق شاي ۇسىنىپ، سانيتارلىق تازالىق جۇمىستارىنا كومەكتەستى.

ۇيىمداستىرۋشىلاردىڭ ايتۋىنشا، ءىس-شاراعا 50 ادام قاتىستى.

- بۇل اكتسيا – تەك تازالىق شاراسى ەمەس، ەكولوگيالىق مادەنيەتتى كوتەرۋگە، تۇرعىنداردى ورتاق جاۋاپكەرشىلىككە شاقىرۋعا باعىتتالعان الەۋمەتتىك باستاما. تابيعاتتى قورعاۋ ءار ادامنىڭ كۇندەلىكتى ادەتىنە اينالۋى كەرەك، ال تازالىق – ارقايسىمىزدىڭ ورتاق مىندەتىمىز. ءاربىر جيناعان قوقىس، ءاربىر تازالانعان كوشە بولىگى قوعامنىڭ بىرلىگى مەن ءوزارا قولداۋىنىڭ كورىنىسى بولىپ، - دەدى «جەتىسۋ جاستارى» كمم ديرەكتورى ءشامىل ۆانكەەۆ.

«TAZA ECO» ستۋدەنتتەر كلۋبىنىڭ مۇشەسى اقەركە دوسىمحانقىزى ءوز ويىمەن ءبولىستى:

- تازا قازاقستان - ءبىزدىڭ بولاشاعىمىز» اكتسياسى جاستاردىڭ بەلسەندىلىگىن ارتتىرىپ، تابيعاتقا جاناشىرلىقتى ناسيحاتتايتىن جىلى ءارى اشىق اتموسفەرادا ءوتتى. اكتسيا بارىسىندا جاستار تەك قوقىس جيناۋمەن شەكتەلمەي، ادامداردىڭ ەڭبەگىن باعالاۋدى، ءبىر-بىرىنە قامقورلىق كورسەتۋدى، قوعامداعى ءار ادامنىڭ ۇلەسىن ءتۇسىنۋدى ۇيرەندى. مۇنداي تاجىريبە جاستاردى قوعامداعى الەۋمەتتىك جاۋاپكەرشىلىككە شاقىرىپ، ەكولوگيالىق مادەنيەتتى قالىپتاستىرۋعا جول اشادى. ءاربىر تازالانعان كوشە، ءاربىر كىشكەنتاي قادام قوعامنىڭ تازالىعىن ساقتاۋ ءۇشىن ماڭىزدى، - دەدى ول.

وبلىستىق قوعامدىق دامۋ باسقارماسى

Abai.kz