ۋكراينانىڭ رەسەيدەگى نوۆوروسسيسكىدەگى كاسپي قۇبىر كونسورتسيۋمىنا جاساعان شابۋىلىنان سوڭ اتالعان قۇبىرمەن مۇناي جىبەرۋ تولىق توقتاتىلعان ەدى. قازاقستان ءوز مۇنايىن ەكسپورتتاۋدىڭ بالاما باعىتتارىن ەدەل-جەدەل ىسكە قوسا باستادى.

ال قر سىرتقى ىستەر مينيسترلىگى نوۆوروسسيسكىدەگى كتك-عا جاسالعان شابۋىلعا بايلانىستى نارازىلىق ءبىلدىردى.

قازاقستاننىڭ ۋكرايناعا نارازىلىعى

قازاقستان رەسپۋبليكاسىنىڭ سىرتقى ىستەر مينيسترلىگى كاسپي قۇبىر جەلىسى كونسورتسيۋمىنا جاسالعان كەزەكتى شابۋىلعا قاتىستى پىكىر ءبىلدىردى.

ءسىم رەسمي وكىلى ايبەك سمادياروۆتىڭ ايتۋىنشا، قازاقستان رەسپۋبليكاسىنىڭ سىرتقى ىستەر مينيسترلىگى نوۆوروسسيسك تەڭىز پورتى اكۆاتورياسىندا ورنالاسقان حالىقارالىق كاسپي قۇبىر جەلىسى كونسورتسيۋمىنىڭ سىندارلى ينفراقۇرىلىمىنا جاسالعان كەزەكتى جوسپارلى شابۋىلعا بايلانىستى نارازىلىق بىلدىرەدى.

«بۇل وقيعا حالىقارالىق قۇقىق نورمالارىمەن قورعالاتىن، تەك ازاماتتىق ماقساتتا جۇمىس ىستەيتىن نىسانعا جاسالعان ءۇشىنشى اگرەسسيالىق ارەكەت بولىپ وتىر. قازاقستان جاھاندىق ەنەرگەتيكالىق نارىقتىڭ جاۋاپتى قاتىسۋشىسى رەتىندە ەنەرگيا تاسىمالداۋشىلاردىڭ تۇراقتى ءارى ۇزدىكسىز جەتكىزىلۋىن قولداۋعا ءاردايىم ءمان بەرەدى. كتك الەمدىك ەنەرگەتيكالىق جۇيەنىڭ تۇراقتىلىعىن ساقتاۋدا ماڭىزدى ءرول اتقارادى. بۇل جاعدايدى قازاقستان مەن ۋكراينا اراسىنداعى ەكىجاقتى قاتىناستارعا نۇقسان كەلتىرەتىن ارەكەت رەتىندە باعالايمىز جانە مۇنداي وقيعالاردىڭ قايتالانۋىنا جول بەرمەۋ ءۇشىن ۋكراين تاراپىنىڭ ءتيىمدى شارالار قابىلداۋىن كۇتەمىز»، — دەلىنگەن قر ءسىم مالىمدەمەسىندە.

ۋكراينانىڭ قازاقستانعا جاۋابى

ۋكراينا قازاقستاننىڭ سىرتقى ىستەر مينيسترلىگى جولداعان نارازىلىق نوتاسىنا جاۋاپ بەردى.

«ۋكراينا كاسپي قۇبىر كونسورتسيۋمىنىڭ (كتك) ينفراقۇرىلىمىنا قاتىستى قازاقستان رەسپۋبليكاسىنىڭ الاڭداۋشىلىعىن نازارعا الدى. ۋكراين تاراپىنان جاسالعان ارەكەتتىڭ ەشبىرى قازاقستان رەسپۋبليكاسىنا نەمەسە باسقا ءۇشىنشى تاراپتارعا قارسى باعىتتالماعانىن ەسكە سالامىز. ۋكراينانىڭ بارلىق كۇش-جىگەرى بۇۇ جارعىسىنىڭ 51-بابىندا كەپىلدەندىرىلگەن ءوزىن-ءوزى قورعاۋ قۇقىعىن ىسكە اسىرۋ شەڭبەرىندە رەسەيدىڭ كەڭ اۋقىمدى اگرەسسياسىنا تويتارىس بەرۋگە باعىتتالعان. ءدال ەسەپتەلگەن جانە ستراتەگيالىق تۇرعىدان نەگىزدەلگەن قورعانىس وپەراتسيالارى اياسىندا ۋكراينا قورعانىس كۇشتەرى اگرەسسوردىڭ اسكەري-ونەركاسىپتىك الەۋەتىن جۇيەلى تۇردە السىرەتىپ، ونىڭ قىلمىستىق باسقىنشىلىق سوعىستى جۇرگىزۋ جانە حالقىمىزعا قارسى ارەكەت ەتۋ قۇرالدارىنان ايىرۋ ءۇشىن ۋكراينا اگرەسسوردىڭ نىساندارىنا جاۋاپ سوققىلارىن جاسايدى»، – دەلىنگەن مالىمدەمەدە.

«قارا تەڭىز ايماعىندا جانە ودان تىس اۋماقتارداعى تۇراقسىزدىقتىڭ جالعىز فاكتورى جانە قاۋىپسىزدىك قاتەرلەرىنىڭ نەگىزگى سەبەبى – رەسەيدىڭ اگرەسسياسى بولىپ تابىلادى»،- دەلىنگەن.

ۋكراينا تاراپى مالىمدەمەدە رەسەيدىڭ ۋكرايناعا ۇزدىكسىز زىمىرانمەن، درونمەن سوققى جاساپ جاتقانىن، بەيبىت تۇرعىنداردىڭ قازا تاپقانىن، اەس-كە قاتىستى نىساندارعا دا سوققى جاسالعانىن، رەسەيدىڭ اگرەسسياسىنان جۇزدەگەن مىڭ ادامنىڭ جارىقسىز قالعانىن ايتىپ، رەسەيدىڭ ول ارەكەتتەرىنە قاتىستى قازاقستاننىڭ نارازىلىق تانىتپاعانىن ايتىپتى.

مالىمدەمە سوڭىندا بىلاي دەيدى: «ءسوز سوڭىندا قازاق حالقىنا دەگەن وزگەرمەيتىن قۇرمەتىمىزدى جانە قوس حالىق اراسىنداعى تاريحي تۇرعىدان بەرىك بايلانىستار دەڭگەيىنە ساي قازاقستان رەسپۋبليكاسىمەن دوستىق ءارى پراگماتيكالىق قاتىناستاردى دامىتۋعا دەگەن نيەتىمىزدى راستايمىز»، – دەپتى.

Abai.kz