ابزال نۇكەنوۆ: جاستار ساپالى ءبىلىم الىپ، دۇرىس قۇندىلىقتاردى قالىپتاستىرۋعا ءتيىس!

الماتى قالاسى اكىمىنىڭ ورىنباسارى ابزال نۇكەنوۆ جوعارى وقۋ ورىندارىنىڭ رەكتورلارىمەن كەزدەستى.

كەزدەسۋدە ءبىلىم بەرۋ جۇيەسىن دامىتۋ، عىلىمي زەرتتەۋلەردى كۇشەيتۋ جانە جاستاردىڭ قوعامدىق، يننوۆاتسيالىق ءارى ەكولوگيالىق باستامالارعا كوپتەپ قاتىستىرۋ جايى تالقىلاندى.

الماتى ەلىمىزدەگى ءىرى ءبىلىم جانە عىلىم ورتالىعى. قالادا 35 جوعارى وقۋ ورنى جۇمىس ىستەيدى، وندا 211 مىڭنان استام ستۋدەنت ءبىلىم الىپ ءجۇر، ولاردىڭ 131 مىڭعا جۋىعى – وزگە وڭىرلەردەن كەلگەن جاستار. 14 مىڭنان استام پروفەسسور-وقىتۋشى قۇرامىنىڭ الەۋەتى قالانىڭ ينتەللەكتۋالدى دامۋىنا تىكەلەي اسەر ەتەدى.

«ءبىز ۋنيۆەرسيتەتتەردى الماتىنىڭ زياتكەرلىك كەلەشەگىن ايقىندايتىن ستراتەگيالىق سەرىكتەستەر رەتىندە قاراستىرامىز. ءبىلىم ساپاسى جاستاردىڭ باسەكەگە قابىلەتتىلىگىن ايقىندايدى، ال قالىپتاساتىن قۇندىلىقتار – قوعامنىڭ تۇراقتىلىعىن، مادەنيەتىن، يننوۆاتسيالىق دامۋ دەڭگەيىن جانە ازاماتتىق جاۋاپكەرشىلىگىن نىعايتادى»، - دەدى الماتى قالاسى اكىمىنىڭ ورىنباسارى ابزال نۇكەنوۆ.

كەزدەسۋدە مەملەكەت الدىندا ساپالى ءبىلىم بەرۋدى قامتاماسىز ەتۋ عانا ەمەس، سونىمەن بىرگە زاڭعا، تارتىپكە قۇرمەتپەن قارايتىن، قوعام ومىرىنە بەلسەندى ارالاساتىن جاۋاپتى ازاماتتاردى تاربيەلەۋ مىندەتى تۇرعانى اتاپ ءوتىلدى. بۇل باعىتتا جوعارى وقۋ ورىندارى ستۋدەنتتىك باستامالاردى قولداۋ، ەرىكتىلىك قىزمەتتى دامىتۋ جانە سالاۋاتتى ءومىر سالتىن قالىپتاستىرۋ ارقىلى ماڭىزدى ءرول اتقارادى. سونداي-اق جاستاردىڭ «تازا قازاقستان» سياقتى ەكولوگيالىق جوبالارعا قاتىسۋى ولاردىڭ قالانىڭ ەكولوگيالىق مادەنيەتىن دامىتۋعا ناقتى ۇلەس قوسىپ وتىرعانىن كورسەتتى.

الماتى قالاسى اكىمىنىڭ جانىنداعى عىلىم جانە تەحنولوگيالار جونىندەگى كەڭەستىڭ جۇمىسىنا دا ەرەكشە ءمان بەرىلدى. بۇل كەڭەس عىلىمي قاۋىمداستىق پەن زەرتتەۋ توپتارىن بىرىكتىرىپ، قالانىڭ عىلىمي كۇن ءتارتىبىن دامىتۋعا ىقپال ەتەدى. ۇلتتىق عىلىم اكادەمياسىمەن بىرلەسىپ تۇراقتى كەزدەسۋلەر مەن فورسايت-سەسسيالار وتكىزىلىپ كەلەدى.

كەزدەسۋ بارىسىندا ۋنيۆەرسيتەت باسشىلارى ءبىلىم بەرۋ باعدارلامالارىن جەتىلدىرۋ جانە قالالىق قۇرىلىمدارمەن ءوزارا ءىس-قيمىلدى كەڭەيتۋ جونىندەگى ۇسىنىس ءبىلدىردى. كەزدەسۋ قورىتىندىسى بويىنشا جاڭا جوبالاردى دامىتۋ جانە قالانىڭ عىلىمي الەۋەتىن نىعايتۋ باعىتىندا جۇمىس توبى قۇرىلاتىن بولدى. ابزال نۇكەنوۆ كونسترۋكتيۆتى ديالوگ الداعى ىنتىماقتاستىقتىڭ تابىستى بولۋىنا بەرىك نەگىز قالايدى دەگەن سەنىم ءبىلدىردى.

Abai.kz