ۋكراينا بەيبىتشىلىككە دايىن. بىراق، بۇل جاۋ الدىندا تىزە بۇگۋ ەمەس!

سوڭعى اپتالارداعى كەلىسسوزدەر فونىندا كيەۆ بۇرىن-سوڭدى بولماعان ىمىرالارعا بارۋعا ءازىر ەكەنىن اشىق كورسەتتى: ۇرىستى توقتاتۋ، ءىس جۇزىندە جاۋ باسىپ العان اۋماقتاردىڭ تاعدىرىن بەلگىسىز مەرزىمگە قالدىرۋ، اۋىر-اۋىر ساياسي شەشىمدەر. الايدا زەلەنسكي مەن ۋكراينا ءۇشىن ءپرينتسيپتى ءبىر ماسەلە بار. ول — دونەتسك وبلىسىنان ۋكراينا اسكەرىن تولىق شىعارۋ.

Bild باسىلىمىنىڭ مالىمەتىنشە، ۋكراينا ءۇشىن بۇل «قىزىل سىزىق». ۋكراينا سوعىستى مايدان شەبىندە توقتاتۋعا كەلىسۋى مۇمكىن، بىراق ءوز اسكەرىن دونباسستان تولىق اكەتۋ — بۇل كەلىسسوز ەمەس، كاپيتۋلياتسيا. اقش ۇسىنعان «دەميليتاريزاتسيالانعان ايماق» يدەياسى دا كيەۆ ءۇشىن قاۋىپتى تۇزاق رەتىندە قابىلدانادى. سەبەبى كرەمل بۇل ايماققا بەيبىت كۇش ەمەس، ءوز ۇلتتىق گۆاردياسىن ورنالاستىرۋدى ۇسىنادى. ياعني، «دەميليتاريزاتسيا» دەگەن اتپەن رەسەيدىڭ جاڭا اسكەري باقىلاۋى ورنايدى. ۋكراينا ءۇشىن بۇل — ارميانى ەرىكتى تۇردە شەگىندىرۋمەن تەڭ. سول سەبەپتى دە كيەۆتىڭ جاۋابى: «ءبىز بۇعان كەلىسپەيمىز!».

بۇل ۇستانىم ۋكراينا كەلىسسوزدەن قاشىپ وتىر دەگەندى بىلدىرمەيدى. كەرىسىنشە، كيەۆ بۇرىنعىدان دا اۋىر كومپروميستەرگە دايىن ەكەنىن اڭعارتتى. الايدا مايداننان بىرجاقتى تۇردە اسكەردى شىعارۋ — بۇل سوعىستى توقتاتۋ ەمەس، ونى باسقا فورمادا جالعاستىرۋعا جول اشۋ. سوندىقتان زەلەنسكي اكىمشىلىگى ءۇشىن دونباستا اسكەرىن قالدىرۋ — تەك تاكتيكالىق ەمەس، مەملەكەت تۇتاستىعىنا قاتىستى ستراتەگيالىق ماسەلە!

Politico باسىلىمى تاراتقان مالىمەت تە وسى كارتينانى تولىقتىرا تۇسەدى. ۋكراينا دونباستا دەميليتاريزاتسيالانعان «ەركىن ەكونوميكالىق ايماق» قۇرۋ يدەياسىنان باس تارتتى. ال اقش بۇل ماسەلەدە ەۋروپانىڭ قاتاڭ قارسىلىعىنا قاراماستان اۋماقتىق جەڭىلدىكتەردى تالاپ ەتىپ وتىر. بۇل ۆاشينگتون مەن ەۋروپالىق استانالار اراسىنداعى تەرەڭ قايشىلىقتى ايقىن كورسەتتى. ەۋروپا ءۇشىن باستى ماسەلە — قاۋىپسىزدىك كەپىلدىكتەرى. ونسىز كەز كەلگەن اۋماقتىق كەلىسىم ۋاقىتشا ءارى قاۋىپتى. بەرليندە وتكەن كەلىسسوزدەر وسى الاۋىزدىقتى اشىق بەتكە شىعاردى.

Wall Street Journal جازعانداي، بەرليندەگى كەزدەسۋلەر وتە اۋىر وتكەن. اقش تاراپى بەيبىتشىلىك كەلىسىمىنىڭ ناقتى جوباسىنا كەلىسۋگە اسىقپادى. سەبەبى تاراپتار سوعىس بارىسىن مۇلدە ءارتۇرلى باعالايدى. ترامپ اكىمشىلىگىندەگى كوپتەگەن شەنەۋنىكتەر ۋكراينا سوعىستا جەڭىلىپ جاتىر، ال سوعىس سوزىلسا، تولىق جەڭىلەدى دەپ سانايدى. ال ۋكراينا اسكەري قولباسشىلىعى مەن بىرقاتار ەۋروپالىق ساياساتكەرلەر بۇعان مۇلدە قارسى پىكىردە: ولاردىڭ ويىنشا، جەتكىلىكتى قولداۋ بولعان جاعدايدا ۋكراينا كەمىندە تاعى ءبىر جىل بويى، ءتىپتى ودان دا ۇزاق قورعانا الادى.

مىنە، تۇيتكىل ءدال وسى جەردە. ءبىر تاراپ ۋكرايناعا «قازىر كەلىس، ايتپەسە بارىنەن ايىرىلاسىڭ» دەپ قىسىم كورسەتسە، ەكىنشى تاراپ «قاۋىپسىزدىك كەپىلدىگىنسىز جاسالعان كەلىسىم — كەلەسى سوعىستىڭ رەتسەپتى» دەپ دابىل قاعۋدا. سوندىقتان بەرليندەگى كەلىسسوزدەردىڭ باستى وزەگى اۋماق ەمەس، قاۋىپسىزدىك كەپىلدىكتەرى بولىپ وتىر.

زەلەنسكيدىڭ «قىزىل سىزىعى» وسى تۇرعىدا تەك دونەتسك وبلىسىنا قاتىستى ەمەس. بۇل — ۋكراينا سوعىستى قالاي اياقتاعىسى كەلەتىنىنىڭ ساياسي مانيفەسى. ول بەيبىتشىلىكتى قالايدى، بىراق ەلىن قارۋدان ايىرىلعان، قورعانسىز، بولاشاقتا قايتا شابۋىلعا اشىق كۇيدە قالدىرمايدى. دونباستان اسكەردى شىعارۋ — سوعىستى توقتاتۋ ەمەس، ونى كەيىنگە قالدىرۋ عانا. كيەۆ ءدال وسى ستسەناريدەن باس تارتىپ وتىر.

بىراق ءبىر نارسە انىق: ۋكراينا ەندى بەيبىتشىلىك ءۇشىن بارىنە كونەتىن ەل ەمەس. ال دونباسس — سول تاباندىلىقتىڭ سيمۆولىنا اينالدى.

Abai.kz