ورتالىق سايلاۋ كوميسسياسىنىڭ توراعاسى نۇرلان ءابدىروۆ ءماجىلىس دەپۋتاتتارىنىڭ اۋدان اكىمدەرىن سايلاۋدى ۋاقىتشا توقتاتۋ تۋرالى دەپۋتاتتىق ساۋالىنا جاۋاپ بەردى.

- «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىنوزى باسقارۋ تۋرالى» زاڭىنىڭ 32-بابىنا سايكەس، اۋدان (وبلىستىق ماڭىزى بار قالا) اكىمى «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭعا سايكەس لاۋازىمعا سايلانادى. «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنىڭ (بۇدان ءارى – كونستيتۋتسيالىق زاڭ) 13-1-تاراۋىمەن اكىمدەردى سايلاۋعا دايىندىق جانە ونى وتكiزۋ كەزىندە تۋىندايتىن قاتىناستار رەگلامەنتتەلگەن. 2023 جىلى 5 قاراشادا پيلوتتىق تۇردە سايلانعان 42 اۋدان مەن 3 وبلىستىق ماڭىزى بار قالا اكىمدەرىنىڭ ىشىنەن وكىلەتتىكتەرىن مەرزىمىنەن بۇرىن توقتاتقان 3 اكىم بار، - دەدى وسك توراعاسى.

ونىڭ دەرەگىنشە، ولار مىنا اۋدان اكىمدەرى:

- قاراعاندى وبلىسىنىڭ اقتوعاي اۋدانى (ۇكىمەت اپپاراتىنا اۋىسۋىنا بايلانىستى);

- قىزىلوردا وبلىسىنىڭ شيەلى اۋدانى (قىزىلوردا قالاسىنىڭ اكىمى بولىپ تاعايىندالۋىنا بايلانىستى);

- جەتىسۋ وبلىسى كەربۇلاق اۋدانى (الماتى وبلىسى اكىمىنىڭ ءبىرىنشى ورىنباسارى بولىپ تاعايىندالۋىنا بايلانىستى).

- قولدانىستاعى زاڭناماعا سايكەس 2025 جىلدىڭ باسىنان باستاپ 2 قالا، 6 اۋدان اكىمدەرىنىڭ سايلاۋى ءوتتى جانە 2 اۋدان اكىمىنىڭ سايلاۋى تاعايىندالدى. ءوز كەزەگىندە، ساۋالدا كوتەرىلىپ وتىرعان اۋدان اكىمدەرىن سايلاۋدى ۋاقىتشا توقتاتۋ جانە ساياسي موراتوري ەنگىزۋ ماسەلەلەرى وسك قۇزىرەتىنە كىرمەيدى. سەبەبى اتالعان ماسەلەلەردى ىسكە اسىرۋ كونستيتۋتسيالىق زاڭعا جانە «قازاقستان رەسپۋبليكاسىنداعى جەرگىلىكتى مەملەكەتتىك باسقارۋ جانە ءوزىن-ءوزى باسقارۋ تۋرالى» زاڭعا تۇزەتۋلەر ەنگىزۋدى قاجەت ەتەدى، - دەدى نۇرلان ءابدىروۆ.

Abai.kz