استاناداعى ۇلتتىق اكادەميالىق كىتاپحانادا قازاقستان جازۋشىلار وداعىنىڭ جىل قورىتىندىسىنا ارنالعان «جاس ادەبيەتتىڭ كوكجيەگى» اتتى ادەبي-مادەني جيىن ءوتتى.

ءىس-شاراعا قر مادەنيەت جانە اقپارات ۆيتسە-ءمينيسترى ايبەك سىدىقوۆ، قىرعىز رەسپۋبليكاسىنىڭ مەملەكەتتىك حاتشىسى، قىرعىزستاننىڭ ەل جازۋشىسى ارسلان قويشيەۆ، قازاقستان جازۋشىلار وداعى باسقارماسىنىڭ توراعاسى مەرەكە قۇلكەنوۆ جانە قازاقستاننىڭ بەلگىلى اقىن-جازۋشىلارى، ادەبيەتتانۋشى عالىمدار، زيالى قاۋىم وكىلدەرى مەن جاس قالامگەرلەر قاتىستى.

كەزدەسۋ بارىسىندا ايبەك سىدىقوۆ قر پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتىن وقىدى.

«مادەنيەت جانە اقپارات مينيسترلىگى قالامگەرلەرگە، رۋحانيات سالاسىنا قولداۋ كورسەتۋ ماقساتىندا جازۋشىلار وداعىمەن جەمىستى جۇمىس ىستەپ كەلەدى. ونىڭ ىشىندە «ستراتەگيالىق ارىپتeستىك» باعىتى بويىنشا جاسالىپ جاتقان جوبالار مەن مەرەيتويلاردى اتاپ ءوتۋ، قالاماقى تولەۋ، كىتاپتار باسىپ شىعارۋ، حالىقارالىق كىتاپ كورمەلەرىندە ناسيحاتتاۋ جۇمىستارىنىڭ ماڭىزى زور. بۇگىنگى مەملەكەتتىك تاپسىرىسپەن جانە «قازاقستاننىڭ ادەبي-تانىمدىق پانوراماسى» جوباسى اياسىندا جارىق كورگەن جاڭا كىتاپتاردىڭ تانىستىرىلىمى قۇتتى بولسىن! بارشا قالامگەرلەرگە شالقار شابىت تىلەيمىن!»، - دەلىنگەن قۇتتىقتاۋ حاتتا.

باسقوسۋدا ۇلتتىق ادەبيەتتىڭ دامۋ باعىتتارى مەن قازىرگى زامان ادەبيەتىنىڭ وزەكتى ماسەلەلەرى تالقىلاندى.

ءىس-شارا اياسىندا «تۇركى الەمىنىڭ ادەبيەتى» جوباسى بويىنشا جارىق كورگەن 4 جاڭا كىتاپتىڭ، «قوعامدىق ماڭىزى بار ادەبيەتتەردى باسىپ شىعارۋ جانە تاراتۋ» مەملەكەتتىك باعدارلاماسى شەڭبەرىندە شىققان 2 كىتاپتىڭ، سونداي-اق جاس قالامگەرلەردىڭ 20 كىتابىنىڭ تۇساۋكەسەرى ءوتتى. جارىققا شىققان بارلىق كىتاپتار ەلىمىزدەگى جالپىعا بىردەي قولجەتىمدى كىتاپحانالارعا تاراتىلدى.

جيىن بارىسىندا ءسوز سويلەگەن ارسلان قويشيەۆ تۇركى حالىقتارى اراسىنداعى ادەبي ىنتىماقتاستىقتىڭ ماڭىزىن اتاپ ءوتىپ، ادەبي جوبالاردى جۇيەلى تۇردە قولداپ كەلە جاتقان قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن قازاقستان جازۋشىلار وداعىنا العىسىن ءبىلدىردى. ول مۇنداي باستامالاردىڭ ورتاق رۋحاني قۇندىلىقتاردى دارىپتەۋگە جانە قالامگەرلەر اراسىنداعى شىعارماشىلىق بايلانىستى نىعايتۋعا ايرىقشا ۇلەس قوساتىنىن جەتكىزدى.

كەزدەسۋ سوڭىندا ادەبيەتتەگى جاڭاشىل ۇردىستەر، تۇركى دۇنيەسىنىڭ ورتاق رۋحاني قۇندىلىقتارى مەن بولاشاقتاعى شىعارماشىلىق ىنتىماقتاستىق باعىتتارى ءسوز بولدى.

Abai.kz