بىرىككەن ۇلتتار ۇيىمىنىڭ ازيا جانە تىنىق مۇحيتى ءۇشىن ەكونوميكالىق جانە الەۋمەتتىك كوميسسياسى (ەسكاتو) ءوڭىر ەلدەرىندەگى تىكەلەي شەتەلدىك ينۆەستيتسيالاردى تارتۋ ديناميكاسىنا ارنالعان Asia-Pacific Trade and Investment Trends 2025/2026 ەسەبىن جاريالادى.

ەسەپكە سايكەس، قازاقستان 2025 جىلدىڭ قورىتىندىسى بويىنشا سولتۇستىك جانە ورتالىق ازيا وڭىرىندە جاڭا (greenfield) جوبالارعا ينۆەستيتسيا تارتۋ بويىنشا ەڭ ءىرى الۋشى بولىپ، شامامەن 19 ملرد اقش دوللارىن تارتتى. بۇل وتكەن جىلمەن سالىستىرعاندا 266% ارتىق.

سولتۇستىك جانە ورتالىق ازياداعى سۋبوڭىرىشىلىك ينۆەستيتسيالاردىڭ شامامەن 89%-ى قازاقستانعا تيەسىلى بولدى، بۇل ەلدىڭ وڭىردەگى ءسوزسىز كوشباسشىلىعىن قامتاماسىز ەتتى.

سولتۇستىك جانە ورتالىق ازيا ءوڭىرى 2025 جىلى جاڭا جوبالارعا ينۆەستيتسيا كولەمىنىڭ ءوسۋى تىركەلگەن ازيا-تىنىق مۇحيتى كەڭىستىگىندەگى جالعىز ءسۋبوڭىر بولعانى اتالىپ ءوتتى، بۇل رەتتە جاھاندىق ينۆەستيتسيالىق بەلسەندىلىك جالپى تومەندەگەن. بۇل ءوسىمنىڭ نەگىزگى درايۆەرى ءدال قازاقستان بولدى.

ەسەپتە قازاقستان وڭىردەگى بىرقاتار ەڭ ءىرى ينۆەستيتسيالىق جوبالاردى تارتقانى باياندالدى، ونىڭ ىشىندە وڭدەۋ ونەركاسىبى، جاڭا بۋىن مەتاللۋرگياسى، جاڭارتىلاتىن ەنەرگەتيكا جانە «جاسىل» تەحنولوگيالار سالالارىنداعى اۋقىمدى باستامالار بار.

ينۆەستورلاردىڭ مىناداي باعىتتارعا قىزىعۋشىلىعىنىڭ ءوسىپ كەلە جاتقانى بولەك كورسەتى

• جاسىل ەنەرگەتيكا جانە سۋتەك ەكونوميكاسى;
• ونەركاسىپتىك قايتا وڭدەۋدى دامىتۋ;
• ەكسپورتقا جانە قوسىلعان قۇننىڭ حالىقارالىق تىزبەكتەرىنە باعدارلانعان جوبالار.

«جاھاندىق ەكونوميكالىق بەلگىسىزدىك جاعدايىندا ينۆەستورلار ينۆەستيتسيالىق شەشىمدەر قابىلداۋعا بارىنشا سالماقتى تۇردە قاراي باستادى، نارىقتاردىڭ ۇزاق مەرزىمدى تۇراقتىلىعىنا، ينستيتۋتسيونالدىق ورتانىڭ ساپاسىنا جانە جوبالاردى سۇيەمەلدەۋدەگى مەملەكەتتىك ورگاندار مەن ينۆەستيتسيالىق اگەنتتىكتەردىڭ رولىنە ەرەكشە ءمان بەرۋدە. سىرتقى سىن-قاتەرلەرگە قاراماستان، قازاقستان ءىرى حالىقارالىق كومپانيالاردى تارتا وتىرىپ جانە ۇزاق مەرزىمدى تۇراقتى ءوسىم ءۇشىن نەگىز قالىپتاستىرا وتىرىپ، ەۋرازيانىڭ نەگىزگى ينۆەستيتسيالىق حابتارىنىڭ ءبىرى رەتىندەگى پوزيتسياسىن نىعايتۋدى جالعاستىرۋدا»، – دەپ اتاپ ءوتتى ەسكاتو ساراپشىلارى.

Abai.kz