الماتى وبلىسىنىڭ قوناەۆ قالاسىندا 1200 باس ءىرى قارا مالعا لايىقتالعان زاماناۋي ءسۇت-تاۋارلى فەرماسىن سالۋ جوسپارلانىپ وتىر.

اۋىل شارۋاشىلىعى مينيسترلىگى مالىمەتىنشە، جوبا ءسۇتتى مال شارۋاشىلىعىن دامىتۋعا جانە وتاندىق ءونىم ءوندىرىسىنىڭ كولەمىن ارتتىرۋعا باعىتتالعان.

ينۆەستيتسيالىق جوبانى ىسكە اسىرۋ ءۇشىن جالپى اۋماعى 1 955 گەكتار بولاتىن جەر تەلىمى ءبولىندى.

ءبىرىنشى كەزەڭىندە 700 گەكتار اۋماقتا مال ازىقتىق داقىلداردى ەگۋگە جەر دايىنداۋ جۇمىستارى جۇرگىزىلىپ جاتىر. ونىمدىلىكتى ارتتىرۋ جانە سۋ رەسۋرستارىن ءتيىمدى پايدالانۋ ماقساتىندا تامشىلاتىپ جانە جاڭبىرلاتىپ سۋارۋ سياقتى زاماناۋي تەحنولوگيالاردى قولدانۋ كوزدەلگەن.

جوبانى ىسكە اسىرۋ مەرزىمى 2030 جىلعا دەيىن ەسەپتەلگەن. ينۆەستيتسيانىڭ جالپى كولەمى 15 ملرد تەڭگەدەن اسادى. جوبا تولىق قۋاتىنا شىققاننان كەيىن فەرما جىلىنا 13 ملن ليترگە دەيىن ءسۇت وندىرۋگە مۇمكىندىك بەرەدى. بۇل ءوڭىردى ساپالى ءسۇت ونىمدەرىمەن قامتاماسىز ەتۋگە جاعداي جاسايدى.

جوبا اياسىندا ەكى نەگىزگى تەحنولوگيالىق ۇدەرىستى ۇيىمداستىرۋ قاراستىرىلعان. ءبىرىنشىسى – زاماناۋي اگروتەحنولوگيالاردى قولدانا وتىرىپ، مال ازىقتىق داقىلداردى ءوسىرۋ، ەكىنشىسى – مال شارۋاشىلىعى سالاسىنداعى وزىق شەشىمدەردى پايدالانا وتىرىپ، ساتۋعا ارنالعان ءسۇت ءوندىرۋ.

اتالعان جوبانىڭ جۇزەگە اسىرىلۋى جاڭا جۇمىس ورىندارىن اشۋعا، اۋىلدىق ينفراقۇرىلىمدى دامىتۋعا جانە الماتى وبلىسىنىڭ ازىق-تۇلىك قاۋىپسىزدىگىن نىعايتۋعا ىقپال ەتەدى.

ايتا كەتەيىك، ەلىمىزدە 69 ءسۇت فەرماسى جۇمىس ىستەپ تۇر،

سولتۇستىك قازاقستان وبلىسىندا ءسۇت فەرماسى سالىنىپ جاتىر.

Abai.kz