بۇگىن مۇحتار اۋەزوۆ اتىنداعى قازاق ۇلتتىق دراما تەاترىنىڭ قۇرىلعانىنا 100 جىل تولدى.

1926 جىلى اشىلعان تەاتردىڭ نەگىزىن قالاۋدا جۇمات شانين، سماعۇل سادۋاقاسوۆ، جۇسىپبەك ايماۋىتوۆتاردىڭ ەرەن ەرلىگى جاتىر. اكەمتەاتر قازاق تەاتر ونەرىنىڭ كاسىبي ۇلتتىق مەكتەبىنىڭ قارا شاڭىراعى. قازاق ونەرىنىڭ ايتۋلى دا، اياۋلى تۇلعالارى ۇلت ونەرىنە قىزمەت ەتكەن قاسيەتتى ورىن، كيەلى ساحنا.

وسى ايتۋلى داتاعا وراي قر مادەنيەت جانە اقپارات ءمينيسترى ايدا بالاەۆا ارنايى قۇتتىقتاۋ جولدادى.

ايدا بالاەۆا:

– قازاق رۋحانياتىنىڭ قارا شاڭىراعى – مۇحتار اۋەزوۆ اتىنداعى ۇلتتىق دراما تەاترىنىڭ 100 جىلدىق مەرەيتويىمەن بارشاڭىزدى قۇتتىقتايمىن!

عاسىر بۇرىن «ەڭلىك-كەبەكپەن» اشىلعان قاسيەتتى شىمىلدىق سودان بەرى تالاي ءداۋىردى ارتقا تاستاپ، ۇلتتىڭ تاعدىرلى كەزەڭدەرىن، ارمان-مۇراتىن ساحنا تىلىمەن سويلەتىپ كەلەدى. كيەلى ساحنادا قازاق دراماتۋرگياسىنىڭ ءىنجۋ-مارجانىنا اينالعان «اباي»، «قوبىلاندى»، «قاراگوز»، «ايمان – شولپان» جانە وزگە دە تۋىندىلار ساحنالاندى.

ونەر وشاعى الماتىعا قونىس اۋدارىپ، 1937 جىلى اكادەميالىق مارتەبە الدى، كەيىن وعان مۇحتار اۋەزوۆتىڭ ەسىمى بەرىلدى. بۇگىندە «ۇلتتىق» مارتەبەگە يە تەاتر الەمدىك مادەني كەڭىستىككە باتىل قادام جاساپ كەلەدى. تەاتر بۇگىندە ۇلت ونەرىن وركەندەتىپ، ءداستۇر ساباقتاستىعىن ساقتاپ، ۇلكەن شىعارماشىلىق وردا قالىپتاستىرىپ وتىر.

تەاتر ۇجىمىنا زور دەنساۋلىق، شىعارماشىلىق شابىت، ونەر جولىندا جاڭا جەتىستىكتەر تىلەيمىن!

Abai.kz