وسكەمەن قالاسىندا ۆولەيبولدان ايەلدەر كوماندالارى اراسىندا وتكەن قازاقستاننىڭ سۋپەركۋبوك چەمپيوناتى مارەسىنە جەتتى. فينالدا «جەتىسۋ» ۆولەيبولشىلارى «تۇران» كومانداسىمەن ويناپ، 3:0 ەسەبىمەن باسىم ءتۇستى. ءسويتىپ ەل سۋپەركۋبوگىنىڭ بەسىنشى مارتە يەگەرى اتاندى، - دەپ حابارلايدى جەتىسۋ وبلىسى اكىمى ءباسپاسوز قىزمەتى.    

ويىن اياقتالعاننان كەيىن «جەتىسۋ» كومانداسىنىڭ باس باپكەرى ماركو گرشيچ وي ءبولىستى:

– كوماندامدى جانە بارشا جانكۇيەرلەردى شىن جۇرەكتەن قۇتتىقتايمىن. قيىندىقتارعا قاراماستان، ءبىز سۋپەركۋبوكتى تاعى دا جەتىسۋ جەرىنە الىپ كەلدىك. سول ءۇشىن دە قۋانىشتىمىن جانە ءبىزدىڭ تىلەكشىلەرىمىزدىڭ ءبارى ريزا دەپ ويلايمىن. بۇل ازيا چەمپيوندار ليگاسىنا قاتىسۋعا جاسالعان تاعى ءبىر ءساتتى قادام دەپ بىلەمىن، – دەدى باس باپكەر.

– ءبىز وسى جەتىستىكپەن توقتاپ قالمايتىنىمىز انىق. الدىمىزدا ماڭىزدى ويىندار كۇتىپ تۇر. ەل چەمپيوناتىنداعى تارتىس ءدال قازىر شيەلەنىسە ءتۇستى. چەمپيون بولۋ ءبىر ەڭبەكتى تالاپ ەتسە، ونى ساقتاپ قالۋ مىڭ ەڭبەكتى قاجەت ەتەدى. سوندىقتان ءبىز ەندى چەمپيوناتتاعى ويىندارعا دايىندالامىز، – دەيدى «جەتىسۋ» ۆولەيبول كلۋبىنىڭ ويىنشىسى پەريزات نۇربەرگەنوۆا.

اتاپ وتسەك، «جەتىسۋ» ۆولەيبول كلۋبىنىڭ ساراپشىسى رۋسلان كەنجەباەۆتىڭ جاساعان تالداۋ مالىمەتتەرىنە قاراعاندا، «تۇرانمەن» ويىندا ماريا فرولوۆا (21 ۇپاي), يرينا كەنجەباەۆا (12 ۇپاي), ناتاليا بوريسەنكو (8 ۇپاي) ۇزدىك ويىن كورسەتكەن.

ەسكە سالساق، «جەتىسۋ» ۆولەيبول كلۋبى – قازاقستان چەمپيوناتىنىڭ 9 جانە كۋبوگىنىڭ 9 دۇركىن چەمپيونى، ازيا چەمپيوندار ليگاسىنىڭ جەڭىمپازى.

Abai.kz