2026 جىلعى 6-22 اقپان ارالىعىندا يتاليادا وتەتىن XXV قىسقى وليمپيادا ويىندارىنا قازاقستان قۇراماسىنىڭ ساپىندا 36 سپورتشى قاتىسادى.

93 ەلدەن – 3 جارىم مىڭنان استام سپورتشى

قازىر قازاقستان ەنشىسىندە مىنا سپورت تۇرلەرىنەن ليتسەنزيا بار:

فريستايل-موگۋل – پاۆەل كولماكوۆ، يۋليا گالىشەۆا، اياۋلىم امرەنوۆا، اناستاسيا گورودكو.

فريستايل-اكروباتيكا – دىنمۇحاممەد رايىمقۇل، شەرزود حاشيرباەۆ، رومان يۆانوۆ، اسان اسىلحان، ايانا جولداس.

بياتلون – ۆلاديسلاۆ كيرەەۆ، اسەت دۇيسەنوۆ، ميلانا گەنەۆا، ايشا راقىشەۆا.

تاۋ شاڭعىسى سپورتى – روستيسلاۆ حوحلوۆ، الەكساندرا سكوروحودوۆا.

شاڭعى قوسسايىسى – شىڭعىس راكپاروۆ.

شاڭعى جارىسى – امىرعالي مۇراتبەكوۆ، نايل باشماكوۆ، ۆيتالي پۋحكالو، اننا مەلنيك، داريا رياجكو، كسەنيا شالىگينا، نادەجدا ستەپاشكينا.

شاڭعىمەن تۇعىردان سەكىرۋ – دانيل ۆاسيلەۆ، يليا ميزەرنىح.

كونكيمەن جۇگىرۋ سپورتى – ەۆگەني كوشكين، كريستينا سيلاەۆا، ەليزاۆەتا گولۋبەۆا، نادەجدا موروزوۆا، ارينا يلياششەنكو.

شورت-ترەك – ابزال اجىعاليەۆ، دەنيس نيكيشا، ولگا تيحونوۆا، يانا حان.

مانەرلەپ سىرعاناۋ – ميحايل شايدوروۆ، سوفيا سامودەلكينا.

ايتا كەتەيىك، بۇل تەك 2025-2026 جىلعى ماۋسىمداعى ليتسەنزيالىق كەزەڭدەر ناتيجەسىندەگى كورسەتكىش. الداعى ۋاقىتتا حالىقارالىق وليمپيادا كوميتەتىنىڭ ەسەبىنەن قوسىمشا جولدامالار بەرىلۋى مۇمكىن.

وليمپيادا ليتسەنزياسىنا قاتىستى قورىتىندى اقپارات قاڭتاردىڭ اياعىندا بەلگىلى بولادى. XXV قىسقى وليمپيالىق ويىندار يتاليانىڭ ميلان جانە كورتينا-د’امپەتستسو قالالارىندا وتەدى. وعان الەمنىڭ 93 ەلىنەن 3 500-دەن استام سپورتشى قاتىسادى.

وليمپيادانىڭ اشىلۋ سالتاناتى 6 اقپاندا ميلانداعى «سان-سيرو» ستاديونىندا وتەدى.

ءبىزدىڭ تۋدى كىم ۇستايدى؟

مەملەكەتتىك تۋدى الىپ ءجۇرۋ قۇرمەتى قىستىڭ نەگىزگى جارىس تۇرلەرىنەن قاتىساتىن تيتۋلدى سپورتشىلارعا سەنىپ تاپسىرىلعان. شورت-ترەكتەن قر ەڭبەك سىڭىرگەن سپورت شەبەرى، 30 جاستاعى دەنيس نيكيشا – 500 مەتر قاشىقتىقتاعى الەم چەمپيوناتتارىنىڭ (2024, 2025) ەكى دۇركىن كۇمىس جۇلدەگەرى، قازىرگى مىقتى سپرينتەرلەرىمىزدىڭ ءبىرى. ونىمەن قاتارلاس تۋ ۇستاۋشى – فريستايلدان قۇراما كوماندامىزدىڭ جەتەكشى سپورتشىلارىنىڭ ءبىرى اياۋلىم امرەنوۆا. ول ەۋروپا كۋبوگى كەزەڭدەرىنىڭ تولىق ماراپاتتارى جانە ەكى وليمپيادا ويىندارىنا قاتىسۋ تاجىريبەسى بار (2018, 2022).

بۇل سپورتشىلاردى تاڭداۋ قازىرگى سپورتتا كاسىپقويلىق پەن ناقتى ناتيجەلەر ماڭىزدى ەكەنىن راستايدى. بۇگىندە قازاقستاندىق شورت-ترەك جانە فريستايل مەكتەبى الەمدىك كوشباسشىلارمەن تۇراقتى باسەكەلەسەدى، بۇل ءبىزدىڭ سپورتشىلارىمىزدىڭ حالىقارالىق رەيتينگتەگى جوعارى ورىندارىنان-اق كورىنىپ تۇر. د.نيكيشا مەن ا.امرەنوۆانىڭ جەتىستىكتەرى ەل ىشىندەگى مۇزداعى سپورت تۇرلەرىنە قىزىعۋشىلىقتىڭ ارتۋىنا ىقپال ەتەدى: سەكتسيالاردىڭ گەوگرافياسى كەڭەيىپ، وڭىرلەردە جاستار ءۇشىن قىسقى سپورت تۇرلەرى قولجەتىمدى بولا باستادى.

ميلانداعى ويىندار بۇكىل كوماندا ءۇشىن ماڭىزدى كەزەڭ بولماق. قازاقستاندىق سپورتشىلار ءۇشىن وليمپياداعا قاتىسۋ – ەڭ الدىمەن، جيناقتالعان الەۋەتتى ىسكە اسىرۋ جانە جوعارى باسەكەلەستىك جاعدايىندا بىلىكتىلىكتى راستاۋ مۇمكىندىگى. يتاليا ارەنالارىندا ونەر كورسەتۋ قازاقستاننىڭ الەمدىك قىسقى سپورتتاعى كوشباسشىلىق پوزيتسياسىن نىعايتارى جانە قۇرامانىڭ ءاربىر قاتىسۋشىسىنىڭ كاسىبي مانسابىنداعى ماڭىزدى قادامعا اينالارى ءسوزسىز.

تاجىريبە مەن جاستىق جىگەر ۇشتاسقان

تاۋەلسىزدىك العان ساتتەن باستاپ قازاقستان قۇراماسى قىسقى وليمپيالىق ويىندارعا توعىزىنشى رەت قاتىسقالى وتىر. بيىل ەلىمىزدەن 18 ەر ادام مەن 18 ايەل – بارلىعى 36 سپورتشى ليتسەنزيا الدى. بۇل بەيجىڭدە وتكەن 2022 جىلعى وليمپيادامەن سالىستىرعاندا ەكى ادامعا كوپ.

قىسقى وليمپيادالار تاريحىندا بەس قازاقستاندىق سپورتشى جۇلدە تۇعىرىنا كوتەرىلگەن – ۆلاديمير سميرنوۆ، ليۋدميلا پروكاشەۆا، ەلەنا حرۋستالەۆا، دەنيس تەن، يۋليا گالىشەۆا. سوندىقتان كومانداداعى تاجىريبەلى سپورتشىلاردىڭ ءرولى ەرەكشە ماڭىزدى. ءوز مانسابىندا بەسىنشى رەت وليمپيادا ويىندارىنا فريستايل-موگۋل بويىنشا پحەنچحان-2018 قولا جۇلدەگەرى يۋ.گالىشەۆا قاتىسادى. بۇعان دەيىن ءدال وسىنداي كورسەتكىشكە شاڭعىشى ە.ۆولودينا-انتونوۆا مەن فريستايلشى د.رەيحەرد قانا قول جەتكىزگەن.

سونىمەن قاتار، شورت-ترەكشىلەر ا.اجىعاليەۆ پەن د.نيكيشا قاتارىنان ءتورتىنشى وليمپيادادا ونەر كورسەتەدى. بەيجىڭ-2022 جارىسىندا ا.اجىعاليەۆ 500 مەتر قاشىقتىقتا تۇعىردان ءبىر قادامدا توقتاپ، ءتورتىنشى ورىندى يەلەندى. د.نيكيشا، ءوز كەزەگىندە، كەيىنگى ەكى الەم چەمپيوناتىندا كۇمىس جۇلدەگەر اتاندى.

قازاقستان قۇراماسىنىڭ ساپىندا بوستونداعى مانەرلەپ سىرعاناۋدان الەم چەمپيوناتىنىڭ كۇمىس جۇلدەگەرى م.شايدوروۆ جانە فريستايل-موگۋلدان الەم چەمپيوناتىنىڭ ەكى دۇركىن قولا جۇلدەگەرى ا.گورودكو دا ونەر كورسەتەدى.

بۇل جولى قازاقستاندىق سپورتشىلار 10 سپورت ءتۇرى بويىنشا باق سىناسادى. سونىمەن قاتار، قازاقستان مانەرلەپ سىرعاناۋدان وليمپيادالىق جارىستارعا قايتا قاتىسادى.

قۇرامانىڭ ەڭ جاس قاتىسۋشىسى ا.اسىلحان فريستايل-اكروباتيكادا ونەر كورسەتەدى. ميلانداعى وليمپيادا ول ءۇشىن مانسابىنداعى ەڭ ۇلكەن باستاما بولسا دا، ونىڭ ەنششىسىندە ازيا ويىندارىنىڭ كۇمىس مەدالى بار.

وليمپياداعا قازاقستان اتىنان قاتىساتىن 36 سپورتشىنىڭ 18-ءى العاش رەت تورتجىلدىقتىڭ باستى جارىسىنا قاتىسقالى وتىر. دەبيۋتانتتار قاتارىندا تۇعىردان شاڭعىمەن سەكىرۋدەن 2024 جىلعى جاسوسپىرىمدەر وليمپياداسىنىڭ چەمپيونى ي.ميزەرنىي دا بار.

Abai.kz