وتكەن اپتادا ىشكى نارىقتا ءداندى داقىلدار مەن زىعىر باعاسى ءوستى. بۇل تۋرالى قازاقستاننىڭ استىق وداعى حابارلادى. 

ەلدىڭ سولتۇستىگىندەگى بەلسەندى جونەلتۋلەر مەن قاتتى اياز جاپپاي تۇتىنىلاتىن داقىلدار — 5, 4 جانە 3-سىنىپتى بيداي مەن ارپا ۇسىنىسىنىڭ كۇرت ازايۋىنا الىپ كەلدى. سونىڭ سالدارىنان باعا جەرگىلىكتى دەڭگەيدە وسە باستادى.

نارىقتاعى مۇنداي ءۇردىستى بايقاعان اۋىل شارۋاشىلىعى تاۋار وندىرۋشىلەرى باعالار ودان ءارى كوتەرىلەدى دەگەن ۇمىتپەن ءونىم ساتۋدى تەجەپ وتىر. بۇعان قوسا، قاتتى اياز استىقتى قويمالاردان ەلەۆاتورلارعا تاسىمالداۋعا كەدەرگى كەلتىرۋدە. وسى فاكتورلاردىڭ جيىنتىعى باعانىڭ ءارى قاراي وسۋىنە ىقپال ەتىپ وتىر.

– بەلسەندى جونەلتۋلەر مەن اۋىل شارۋاشىلىعى وندىرۋشىلەرىنىڭ بيداي، ارپا جانە زىعىر ساتۋدى شەكتەۋى ىشكى جانە سىرتقى نارىقتاردا ءداندى جانە مايلى داقىلدار باعاسىنا قولداۋ كورسەتۋدە. قازىرگى تاڭدا بارلىق استىق پەن مايلى داقىلدار بويىنشا وندىرۋشىلەر باعا ودان ءارى وسەدى دەپ كۇتۋدە جانە ساتۋعا اسىعار ەمەس. بۇعان، سونىمەن قاتار، ەگىس ناۋقانىنا دايىندىق ءۇشىن قارجىعا مۇقتاجدىقتىڭ بولماۋى دا اسەر ەتىپ وتىر. ءدال وسى سەبەپتەن وتاندىق قۇراماجەم ۇنىن وندىرۋشىلەر رەسەيدەن تومەن سۇرىپتى بيدايدى بەلسەندى تۇردە يمپورتتاي باستادى. بيداي باعاسىنىڭ قىمباتتاۋىنا بايلانىستى ۇن تارتۋ ونىمدەرىنە — بيداي ۇنى مەن قۇراماجەم ۇنىنا ەكسپورتتىق باعانىڭ دا وسكەنى بايقالۋدا، — دەپ كەلتىرەدى قازاقستان استىق وداعىنىڭ تالداۋ كوميتەتىنىڭ باسشىسى ەۆگەني كارابانوۆتىڭ ءسوزىن “اپك نوۆوستي”.

Abai.kz