قوستاناي وبلىسىندا مەملەكەتتىك ورگاننىڭ مەكتەپتەگى سپورت زال شاتىرىنىڭ قۇلاۋىنا بايلانىستى مەردىگەر ۇيىمعا قارسى تالاپ ارىزى قاناعاتتاندىرىلدى.    

2021 جىلى مەملەكەتتىك ورگان مەن جەكە سەرىكتەستىك اراسىندا 2,2 ملرد تەڭگەگە 2023 جىلعى 31 جەلتوقسان دەيىن اياقتالۋى ءتيىس ءبىلىم بەرۋ نىسانىن سالۋ تۋرالى كەلىسىمشارت جاسالعان، دەپ جازادى inbusiness.kz سايتى.

الايدا شارتتا بەلگىلەنگەن مەرزىمنىڭ وتۋىنە قاراماستان، نىسان پايدالانۋعا بەرىلمەگەن، مەردىگەردىڭ ءوز مىندەتتەمەلەرىن ورىنداماعان. 2024 جىلى مەكتەپتىڭ سپورت زالىندا شاتىردىڭ قۇلايدى.

كەشەندى تەكسەرۋ ناتيجەلەرى بويىنشا جاسالعان تەحنيكالىق قورىتىندىعا سايكەس، اپاتتىڭ سەبەبى ءستروپيلدى فەرماعا رۇقسات ەتىلمەيتىن كولدەنەڭ جۇكتەمەنىڭ ءتۇسۋى بولعان. اتالعان اسەر دانەكەرلەنگەن جىكتىڭ بۇزىلۋىنا جانە تىرەك كونسترۋكتسيالارىنىڭ دەفورماتسياسىنا اكەلگەن، بۇل جوبالىق قۇجاتتاما مەن قۇرىلىس نورمالارىنىڭ بۇزىلعانىن ايعاقتايدى.

جيناقتالعان سمەتالىق ەسەپكە سايكەس، قۇلاۋ سەبەپتەرىن جويۋ، كونسترۋكتسيانى قالپىنا كەلتىرۋ جانە قۇرىلىستى اياقتاۋ ءۇشىن 260 ملن تەڭگەدەن استام قاراجات قاجەت، بۇل ورىندالعان جۇمىستاردا ەلەۋلى اقاۋلار بار ەكەنىن كورسەتەدى. اپات سالدارىن جويۋ جانە قۇرىلىستى اياقتاۋ ماقساتىندا مەملەكەتتىك ورگان اۆتورلىق جانە تەحنيكالىق قاداعالاۋ جۇرگىزۋگە، سونداي-اق اياقتالماعان قۇرىلىس جۇمىستارىن ورىنداۋعا جالپى سوماسى 266 ملن تەڭگەدەن استام بولاتىن جەكەلەگەن شارتتار جاساسقان. بۇل شىعىندار مەملەكەتتىك ورگان تاراپىنان كەلتىرىلگەن زالال رەتىندە مەردىگەردەن ءوندىرىپ الۋ تالاپ ەتىلدى.

تالاپ قويۋعا قارسى ءۋاج كەلتىرە وتىرىپ، جەكە سەرىكتەستىك وكىلى قۇرىلىس فەرمالارىنىڭ شامادان تىس جۇكتەلۋى قۇبىرلار مەن پاترۋبكالارداعى سۋدىڭ قاتىپ قالۋى، جىلىمىق كەزەڭىندە شاتىر بەتىنىڭ سۋعا تولۋى جانە كەيىننەن قۇبىرلاردىڭ مۇزبەن بىتەلۋى سالدارىنان بولعانىن العا تارتتى.

ونىڭ پىكىرىنشە، بۇل جاعدايلار ينجەنەرلىك كوممۋنيكاتسيالاردىڭ ۋاقىتىندا تارتىلماۋىنا بايلانىستى عيماراتتا جىلۋدىڭ بولماۋىنان تۋىنداعان، ال بۇل ءۇشىن ول جاۋاپكەرشىلىكتى تاپسىرىس بەرۋشىگە ىسىرعان.

الايدا سوت جاۋاپكەردىڭ دالەلدەرى ونىڭ شارتتىق جانە كاسىبي جاۋاپكەرشىلىگىن جوققا شىعارمايتىنىن كورسەتتى. قوستاناي وبلىسىنىڭ مامانداندىرىلعان اۋدانارالىق ەكونوميكالىق سوتى ءىستى قاراي وتىرىپ، شارت تالاپتارىنا سايكەس مەردىگەر ورىندالعان جۇمىستاردىڭ ساپاسىنا، قولدانىلعان ماتەريالدارعا، قۇرىلىستىڭ جوبالىق قۇجاتتاما مەن تەحنيكالىق تالاپتارعا سايكەستىگىنە تولىق جاۋاپتى ەكەنىن اتاپ ءوتتى.

مەردىگەردىڭ ارەكەتتەرى مەن تۋىنداعان سالدار اراسىنداعى سەبەپ-سالدارلىق بايلانىستى ەسكەرە وتىرىپ، سوت تالاپ قويۋشىنىڭ تالاپتارىن نەگىزدى دەپ تانىپ، ولاردى تولىق كولەمدە قاناعاتتاندىردى.

سوت جەكە سەرىكتەستىكتى وبلىستىق بيۋدجەتكە مەكتەپتىڭ سپورت زالىنداعى شاتىردىڭ قۇلاۋ سەبەپتەرىن انىقتاۋعا، سونداي-اق وقيعانىڭ سالدارىن جويۋعا جانە مەكتەپ قۇرىلىسىن اياقتاۋعا جۇمسالعان شىعىنداردى قوسا العاندا، 266 ملن تەڭگەدەن استام قاراجاتتى وتەۋگە مىندەتتەدى.

سوت شەشىمى زاڭدى كۇشىنە ەنگەن جوق.

Abai.kz