قازاقستاندىقتاردىڭ ءومىرى 1 اقپاننان باستاپ قالاي وزگەرەدى؟ BAQ.KZ ءتىلشىسى اقپاننان باستاپ ەنگىزىلەتىن وزگەرىستەرگە شولۋ جاسادى.

وقۋشىلار كانيكۋلعا شىعادى

اقپاندا ەلىمىزدە ءبىرىنشى سىنىپ وقۋشىلارىنا قوسىمشا دەمالىس بەرىلەدى. بيىل كانيكۋل ۋاقىتى 9-15 اقپانعا سايكەس كەلەدى.

اۋا رايى قانداي بولادى؟

«قازگيدرومەت» رمك سينوپتيكتەرى 2026 جىلعى اقپان ايىنا ارنالعان قازاقستان بويىنشا اۋا رايى بولجامىن جاريالادى. مامانداردىڭ مالىمەتىنشە، اقپان ايى قىسقى سيپاتىن ساقتاعانىمەن، ايدىڭ سوڭىنا قاراي ەل اۋماعىندا ايتارلىقتاي جىلىنۋ بايقالادى.

ەلدىڭ باسىم بولىگىندە اياز ساقتالادى. اتاپ ايتقاندا، سولتۇستىك جانە شىعىس وڭىرلەردە اۋا تەمپەراتۋراسى −13…−18 گرادۋس شاماسىندا بولادى. ال ەڭ وڭتۇستىك ايماقتاردا كۇندىزگى تەمپەراتۋرا +3 گرادۋسقا دەيىن كوتەرىلۋى مۇمكىن.

ۇلتتىق قوردان بالالارعا اقشا اقپانعا دەيىن اۋدارىلادى

2026 جىلعى 1 قاڭتارداعى جاعداي بويىنشا 2024 جىلعى 1 اقپاننان باستاپ ماقساتتى جيناقتاردى الۋ ءۇشىن 205 505 ءوتىنىش ورىندالدى.

جالپى سوماسى 31,61 ملن اقش دوللارىنان استام قاراجات ۋاكىلەتتى وپەراتورلارعا اۋدارىلىپ، 18 جاسقا تولعان ازاماتتاردىڭ بانك شوتتارىنا كەيىننەن ەسەپتەلدى.

2025 جىلعى ەسەپتى جىلعا ارنالعان ماقساتتى تالاپتار مەن ينۆەستيتسيالىق تابىس 2026 جىلعى 1 اقپاننان كەشىكتىرمەي قاتىسۋشىلارعا ەسەپتەلەدى. سونداي-اق، 2008 جىلى تۋعان، 2026 جىلى 18 جاسقا تولاتىن قازاقستاندىقتاردىڭ ماقساتتى جيناقتارى دا 2026 جىلعى 1 اقپانعا دەيىن ولاردىڭ ماقساتتى جيناقتاۋ شوتتارىنا اۋدارىلادى.

ورازا باستالادى

قاسيەتتى ورازا ايى 19 اقپاننان باستالىپ، 19 ناۋرىزعا دەيىن جالعاسادى. قادىر ءتۇنى 16 ناۋرىزدان 17 ناۋرىزعا قاراعان تۇنگە سايكەس كەلەدى. ال ورازا ايت مەرەكەسى 20 ناۋرىزدا اتاپ وتىلەدى.

مەكتەپتەردى باقىلاۋدىڭ جاڭا ءتارتىبى ەنگىزىلەدى

2026 جىلعى 1 اقپاننان باستاپ مەكتەپتەردە، بالاباقشالاردا، لاگەرلەردە جانە بالالارعا ارنالعان باسقا دا ۇيىمداردا باقىلاۋدىڭ جاڭا ءتارتىبى ەنگىزىلەدى. باستى ماقسات - ءار بالا ءۇشىن قاۋىپسىز، ساۋ جانە جايلى ورتا.

باقىلاۋدىڭ جاڭا فورماتى بۇزۋشىلىقتاردى جەدەل انىقتاۋعا مۇمكىندىك بەرەدى. مەكتەپتەردىڭ وقۋ جىلىنا، لاگەرلەردىڭ جازعى ماۋسىمعا جانە مەديتسينالىق مەكەمەلەردىڭ ەپيدەميالىق سىناقتارعا دايىندىعىن باعالاۋ ءۇشىن مەملەكەت باسشىسىنىڭ، ۇكىمەتتىڭ جانە دەنساۋلىق ساقتاۋ مينيسترلىگىنىڭ تاپسىرمالارى بويىنشا تەكسەرۋلەر جۇرگىزىلەدى.

ەڭ ماڭىزدىسى العاشقى تەكسەرۋدە ايىپپۇلدار قولدانىلمايدى - ۇيىمدار بۇزۋشىلىقتاردى تۇزەتۋگە مۇمكىندىك الادى.

ءورت قاۋىپسىزدىگى تالابى كۇشەيتىلەدى

2026 جىلعى 1 اقپاننان باستاپ قازاقستاندا وبەكتىنى قابىلداۋ جانە پايدالانۋعا بەرمەس بۇرىن ونىڭ ءورت قاۋىپسىزدىگى تالاپتارىنا سايكەستىگى تۋرالى قورىتىندىنى الۋدى مىندەتتەۋدى كوزدەيتىن ازاماتتىق قورعاۋ سالاسىنداعى جاڭا تالاپ كۇشىنە ەنەدى.

بۇل مىندەت قۇرىلىسقا تاپسىرىس بەرۋشىگە جۇكتەلەدى جانە ادامدار جاپپاي بولاتىن وبەكتىلەرگە، سونداي-اق بيىكتىگى 28 مەتردەن اساتىن عيماراتتارعا، ونىڭ ىشىندە كوپپاتەرلى تۇرعىن ۇيلەرگە دە قولدانىلادى.

كاسىپكەرلەر نەنى ءبىلۋى كەرەك؟

2026 جىلعى 1 ناۋرىزعا دەيىن جەڭىلدەتىلگەن دەكلاراتسيا رەجيمىندە قالعىسى كەلەتىن جەكە كاسىپكەرلەر (جك) سالىق ورگانىنا مىندەتتى تۇردە حابارلاما تاپسىرۋى كەرەك. ەگەر حابارلاما بەرىلمەسە، كاسىپكەرلەر اۆتوماتتى تۇردە جالپىعا بىردەي سالىق سالۋ رەجيمىنە اۋىستىرىلادى.

2026 جىلعى 1 قاڭتارعا دەيىن پاتەنتپەن نەمەسە ارنايى ءموبيلدى قوسىمشا ارقىلى جۇمىس ىستەگەن كاسىپكەرلەر ءوزىن-ءوزى جۇمىسپەن قامتىعاندار رەجيمىنە وتە الادى. بۇل رەجيمدە جەكە كاسىپكەر رەتىندە تىركەلۋدىڭ قاجەتى جوق. رەجيم قولدانۋ ءموبيلدى قوسىمشادا العاشقى چەكتىڭ قالىپتاستىرىلعان كۇنىنەن باستالادى.

جەكە كاسىپكەر رەتىندە ەسەپتەن شىعۋدى 1 قاڭتاردان باستاپ ءوز بەتىنشە جاساۋعا بولادى نەمەسە 2026 جىلعى 1 ناۋرىزدا اۆتوماتتى تۇردە ەسەپتەن شىعارىلۋىن كۇتۋگە بولادى.

بۇرىن بولشەك سالىق نەمەسە جەڭىلدەتىلگەن دەكلاراتسيا قولدانعان كاسىپكەرلەر جەڭىلدەتىلگەن رەجيمدە جۇمىسىن جالعاستىرا الادى، بىراق جاڭا ەرەجەلەر بويىنشا. جىلدىق تابىس شەگى 600 000 اەك (شامامەن 2 ملرد 595 ملن تەڭگە) بولىپ بەلگىلەنگەن. نەگىزگى سالىق مولشەرلەمەسى – 4%، ونى 2%-عا دەيىن تومەندەتۋگە نەمەسە 6%-عا دەيىن كوتەرۋگە بولادى. ول ءۇشىن 2026 جىلعى 28 اقپانعا دەيىن رەجيمدى قولدانۋ تۋرالى حابارلاما بەرۋ قاجەت.

شارۋا جانە فەرمەر قوجالىقتارى ءۇشىن جەكە ارنايى سالىق رەجيمى قاراستىرىلعان، وعان كوشۋ اۆتوماتتى تۇردە جۇزەگە اسىرىلادى.

قازاقستان پاسپورتىن العىسى كەلەتىندەر ەمتيحان تاپسىرادى

قازاقستان ازاماتتىعىن الۋعا ۇمىتكەرلەرگە ارنالعان ەمتيحانعا ءوتىنىش قابىلداۋ باستالادى. وتىنىشتەر 3-10 اقپان ارالىعىندا قابىلدانادى. ءوتىنىشتى ۇلتتىق تەستىلەۋ ورتالىعىنىڭ سايتىندا نەمەسە UTO ءموبيلدى قوسىمشاسى ارقىلى بەرۋگە بولادى.

ەمتيحان 11 اقپاندا وتەدى. ەمتيحان 3 بولىمنەن تۇرادى: قازاق ءتىلى – 30 سۇراق ء(وتۋ بالى: 15), قر كونستيتۋتسياسىنىڭ نەگىزدەرى (قاز/ورىس تىلىندە) – 40 سۇراق ء(وتۋ بالى: 20) جانە قازاقستان تاريحى (قاز/ورىس تىلىندە) – 30 سۇراق ء(وتۋ بالى: 15).

قىسقى وليمپيادا باستالادى

2026 جىلعى 6-22 اقپان ارالىعىندا يتاليادا XXV قىسقى وليمپيادا ويىندارى وتەدى. جارىسقا قازاقستان قۇراماسى اتىنان 36 سپورتشى قاتىسادى. قازىر قازاقستان ەنشىسىندە بىرنەشە سپورت تۇرىنەن ليتسەنزيا بار.

Abai.kz