بالا قۇقىقتارى جونىندەگى بۇۇ قورى (يۋنيسەف) وكىلى دجەيمس ەلدەردىڭ حابارلاۋىنشا، گازا سەكتورىنداعى مەكتەپتەردىڭ 90%-دان استامى قيراعان نەمەسە زاقىمدانعان

ەلدەر جەنەۆاداعى بۇۇ بولىمشەسىنىڭ اپتالىق بريفينگىنە ۆيدەوبايلانىس ارقىلى قاتىسىپ، وسى مالىمەتتەردى جاريا ەتتى.

يۋنيسەف وكىلى اتاپ وتكەندەي، گازا سەكتورىنداعى مەكتەپتەرگە باعىتتالعان شابۋىلدار ەكى جارىم جىلعا جۋىق ۋاقىت بويى ءبىر بۋىن بالالاردىڭ بولاشاعىن قاۋىپكە تىكتى.

— گازادا مەكتەپ جاسىنداعى بالالاردىڭ 60%-ى قازىر ءداستۇرلى وقۋ پروتسەسىنە قاتىسا المايدى. مەكتەپتەردىڭ 90%-دان استامى زاقىمدانعان نەمەسە قيراعان. 5 جاسقا دەيىنگى 335 مىڭنان استام بالا ەرتە دامۋ قىزمەتتەرى جۇيەسىنىڭ بۇزىلۋىنان اۋىر دامۋداعى تاۋەكەلگە ۇشىراپ وتىر، — دەدى ەلدەر.

ونىڭ ايتۋىنشا، 2023 جىلعى قازانعا دەيىن گازاداعى پالەستينالىقتار الەمدەگى ەڭ جوعارى ساۋاتتىلىق دەڭگەيلەرىنىڭ بىرىنە يە بولعان، الايدا بۇل جەتىستىك قازىر قاۋىپ استىندا.

Abai.kz