بۇگىن ءماجىلىس دەپۋتاتى، «اۋىل» پارتياسى فراكتسياسىنىڭ توراعاسى سەرىك ەگىزباەۆتىڭ جەتەكشىلىگىمەن وتكەن فراكتسيا وتىرىسىندا قر كونستيتۋتسياسىنىڭ جاڭا جوباسى مەن وعان ەنگىزىلگەن وزگەرىستەر كەڭىنەن تالقىلانىپ، ماڭىزدى قۇجاتتى ەل ىشىندە  بەلسەندى ءتۇسىندىرۋ جۇمىستارىنىڭ قاجەتتىلىگى ايتىلدى.

سەرىك راحمەتوللاۇلى جينالعان قاۋىمدى ەل بولاشاعى ءۇشىن ماڭىزدى قۇجاتتىڭ باسىم باعىتتارىمەن تانىستىرىپ، ۇسىنىلعان كونستيتۋتسيا جوباسىن مۇقيات زەردەلەۋگە جانە شىندىققا سايكەس كەلمەيتىن ارانداتۋشىلىق جاريالانىمداردىڭ ىقپالىنا تۇسپەي، تەك رەسمي قۇجاتقا سۇيەنە وتىرىپ، سىندارلى پىكىر قالىپتاستىرۋعا شاقىردى.

كونستيتۋتسيالىق رەفورما مەملەكەت باسشىسى قاسىم-جومارت توقاەۆتىڭ قازاقستاندا ءبىرپالاتالى پارلامەنت قۇرۋ جونىندەگى باستاماسىنىڭ نەگىزىندە تۋىندادى. كونستيتۋتسيا جوباسىنىڭ جاڭا رەداكتسياسىندا پرەامبۋلا، 11 ءبولىم جانە 95 باپ بەكىتىلۋ ۇسىنىلدى. وندا ادام قۇقىقتارى مەن بوستاندىقتارى — مەملەكەتتىڭ باستى باسىمدىعى رەتىندە انىقتالىپ، بىرلىك، ۇلتارالىق جانە دىنارالىق كەلىسىم مەملەكەتتىك قۇندىلىق رەتىندە بەكىتىلدى. ءبىلىم، عىلىم، مادەنيەت پەن يننوۆاتسيالاردى دامىتۋ - مەملەكەتتىك ساياساتتىڭ ستراتەگيالىق باسىم باعىتتارى رەتىندە اتالىپ، تسيفرلىق قۇقىقتاردى قورعاۋ مەن ساياسي ينستيتۋتتاردى قايتا قۇرۋ سياقتى جاڭا نورمالار ەنگىزىلدى. بۇل وزگەرىستەر ەلدىڭ قۇقىقتىق جۇيەسىن زاماناۋي تالاپتارعا سايكەس نىعايتۋعا باعىتتالعان.

«اۋىل» فراكتسياسىنىڭ دەپۋتاتتارى اتا زاڭ جوباسىن ءبىراۋىزدان قولداپ، ونىڭ قۇقىقتىق مەملەكەتتى نىعايتۋ جانە قازاقستاننىڭ ودان ءارى دامۋى ءۇشىن ماڭىزدىلىعىن اتاپ ءوتتى.

جاڭا كونستيتۋتسيا بويىنشا ناقتى شەشىم حالىق تاراپىنان جالپىۇلتتىق رەفەرەندۋمدا قابىلدانادى. كونستيتۋتسيالىق كوميسسيانىڭ جۇمىسى ودان ءارى جالعاسۋدا.

Abai.kz