جاڭا كونستيتۋتسيا جوباسىن اشىق ءارى جالپىحالىقتىق تالقىلاۋ ءۇشىن بەس جەتەكشى ساياسي پارتيا مەن 300-دەن استام قوعامدىق ۇيىم كۇش بىرىكتىرۋگە دايىن ەكەنىن مالىمدەدى. كەشە استانادا ەلدىڭ قوعامدىق-ساياسي كۇشتەرىنىڭ باسىن قوسقان «ادىلەتتى جانە پروگرەسسيۆتى قازاقستاننىڭ حالىقتىق كونستيتۋتسياسى ءۇشىن!» جالپىۇلتتىق كواليتسياسى قۇرىلدى. وسى باستامانىڭ جالعاسى رەتىندە وڭىرلىك كواليتسيالار ەلىمىزدىڭ بارلىق ايماعىندا رەسمي تۇردە جۇمىسىن باستادى. ولار كونستيتۋتسيا جوباسىنىڭ نەگىزگى ەرەجەلەرىن ءتۇسىندىرىپ، ازاماتتارمەن تىكەلەي كەزدەسۋلەر وتكىزەدى.

وڭىرلىك كواليتسيالار قۇرامىنا ەنگەن قوعامدىق-ساياسي كۇشتەردىڭ وكىلدەرى مەملەكەت باسشىسىنىڭ كونستيتۋتسيانى جاڭارتۋ باعىتى قوعامنىڭ ادىلدىككە، زاڭ ۇستەمدىگىنە جانە ءتيىمدى مەملەكەتتىك باسقارۋعا دەگەن سۇرانىسىن كورسەتەتىنىن اتاپ ءوتتى. پرەزيدەنت ءوز سوزىندە كونستيتۋتسيانى جاڭارتۋ اشىق ءارى ادال قوعامدىق ديالوگتىڭ ناتيجەسى بولۋى ءتيىس ەكەنىن بىرنەشە رەت ايتقان.

العاشقى وڭىرلىك كواليتسيا قاراعاندى ءوڭىرىنىڭ اۋماعىندا قۇرىلدى. ايماقتا حالىقتى كەڭىنەن اقپاراتتاندىرۋعا باعىتتالعان 858 ءىس-شارا مەن قوعامدىق اكتسيا وتكىزۋ جوسپارلانعان.

باتىس قازاقستان وبلىسى اۋماعىندا 700-دەن استام اۋقىمدى ءىس-شارا ۇيىمداستىرۋ كوزدەلىپ وتىر. بۇل جاڭا كونستيتۋتسيا جوباسىنداعى وزگەرىستەردى جان-جاقتى تۇسىندىرۋگە، تۇرعىنداردىڭ پىكىرىن ەسكەرۋگە جانە اشىق پىكىر الماسۋعا مۇمكىندىك بەرەدى. قاتىسۋشىلار جاڭا كونستيتۋتسيا ەل بولاشاعىنىڭ باعدارىن ايقىندايتىن ماڭىزدى قۇجات ەكەنىن اتاپ ءوتتى.

تۇركىستان وبلىسى بويىنشا وڭىرلىك كواليتسيانىڭ 457 مۇشەسى بارلىق اۋدان مەن قالادا ءارتۇرلى ساناتتاعى تۇرعىندارمەن 1959 كەزدەسۋ وتكىزۋدى جوسپارلاپ وتىر. وبلىستا 1 ملن 195 مىڭنان استام سايلاۋشى تىركەلگەن.

اقتوبە وبلىسىنىڭ اۋماعىندا دا تۇرعىندارمەن تۇراقتى كەزدەسۋلەر ۇيىمداستىرىلىپ، 1300-دەن استام ءىس-شارا وتكىزۋ كوزدەلگەن. قاتىسۋشىلار جاڭا كونستيتۋتسيانى قابىلداۋدىڭ تاريحي ماڭىزىن كەڭىنەن ءتۇسىندىرۋ ءۇشىن قوعامنىڭ وزىق كۇشتەرىن بىرىكتىرۋ قاجەت ەكەنىن اتاپ ءوتتى.

جامبىل وبلىسىنىڭ كواليتسيا مۇشەلەرى جاڭا كونستيتۋتسيا جوباسى ساياسي جۇيەنى جاڭعىرتۋعا، الەۋمەتتىك كەپىلدىكتەردى كۇشەيتۋگە، كاسىپكەرلىكتى، عىلىم مەن مادەنيەتتى دامىتۋعا، ۇلتتىق قۇندىلىقتاردى نىعايتۋعا باعىتتالعان ستراتەگيالىق باسىمدىقتارعا سايكەس كەلەتىنىن اتاپ ءوتتى.

الماتى وبلىسىندا وڭىرلىك كواليتسيانىڭ 200-دەن استام مۇشەسى بەلسەندى ءتۇسىندىرۋ جۇمىسىن جۇرگىزۋگە دايىن ەكەنىن راستادى. قاتىسۋشىلار جاڭا كونستيتۋتسيا جوباسى «ادىلەتتى قازاقستان. زاڭ مەن ءتارتىپ» قاعيداتىن نەگىزگە الاتىن جالپىحالىقتىق ديالوگ ناتيجەسى ەكەنىن ايتتى.

قىزىلوردا وبلىسىنىڭ اۋماعىندا وڭىرلىك جانە اۋماقتىق كواليتسيالار قۇرامىندا 349 ادام بار، سونداي-اق 200-دەن استام ەرىكتى جۇمىلدىرىلعان. الداعى كەزەڭگە ارنالعان 695 ءىس-شارادان تۇراتىن كەشەندى جوسپار ازىرلەندى. قاتىسۋشىلاردىڭ ايتۋىنشا، جاڭا نەگىزگى زاڭ قوعامداعى تەرەڭ وزگەرىستەر مەن جاڭا بۋىننىڭ جاڭارعان كوزقاراسىنا جاۋاپ رەتىندە قابىلدانادى.

پاۆلودار وڭىرىندە ەڭبەك ۇجىمدارىمەن، ساراپشىلارمەن جانە تۇرعىندارمەن كەزدەسۋلەر، ونىڭ ىشىندە شالعاي ەلدى مەكەندەرگە بارۋ جوسپارلانعان. كواليتسيا مۇشەلەرى رەفەرەندۋم تىكەلەي دەموكراتيانىڭ ماڭىزدى قۇرالى ەكەنىن جانە ازاماتتارعا ەلدىڭ ساياسي-قۇقىقتىق دامۋىنىڭ باعىتىن ايقىنداۋعا مۇمكىندىك بەرەتىنىن اتاپ ءوتتى.

قوستاناي وبلىستىق كواليتسياسىنىڭ كۇن تارتىبىندە الداعى ءىس-قيمىل جوسپارى، ۇيىمداستىرۋ قۇرىلىمى جانە ءتۇسىندىرۋ جۇمىسىنىڭ نەگىزگى باعىتتارى تالقىلاندى.

ايتا كەتەيىك، ەلىمىزدىڭ بارلىق وڭىرىندە بەلگىلەنگەن وتىرىستار وتكىزىلدى جانە الداعى ءبىر اي بويى كواليتسيا مۇشەلەرى ەلدىڭ بارلىق ايماقتارىنا بارىپ، ەڭبەك ۇجىمدارىمەن، ساراپشىلار قاۋىمداستىعىمەن جانە تۇرعىندارمەن كەزدەسۋلەر وتكىزەدى، وسىلايشا كونستيتۋتسيالىق وزگەرىستەردى تالقىلاۋعا ازاماتتاردى كەڭىنەن تارتۋ مەن اۋقىمدى قوعامدىق ديالوگتى قامتاماسىز ەتەدى. جاڭا كونستيتۋتسيا جوباسى بويىنشا تۇپكىلىكتى شەشىم 15 ناۋرىزدا وتەتىن رەسپۋبليكالىق رەفەرەندۋمدا حالىقتىڭ داۋىس بەرۋى ارقىلى قابىلدانادى.

Abai.kz