قازاقستاندا الەۋمەتتىك جەلى ارقىلى تابىس تاۋىپ، بىراق سالىقتان جالتارعان 850-گە جۋىق بلوگەردەن مەملەكەت پايداسىنا جارتى ميلليارد تەڭگەگە جۋىق قاراجات ءوندىرىلدى. بۇل تۋرالى قر قارجى مينيسترلىگى مەملەكەتتىك كىرىستەر كوميتەتىنىڭ وكىلى ەرقانات شىڭبەرگەن «24KZ» ارناسىنا بەرگەن سۇحباتىندا مالىمدەدى، دەپ حابارلايدى Qaz365.kz.

كامەرالىق باقىلاۋ قالاي جۇزەگە استى؟

كوميتەت مالىمەتىنشە، 2022-2023 جىلداردى قامتىعان تەكسەرىس بارىسىندا جالپى سانى 80 مىڭعا جۋىق ازامات باقىلاۋعا الىنعان. سونىڭ ىشىندە جارنامادان قوماقتى تابىس تاباتىن 850 بلوگەردىڭ دەكلاراتسياسىندا سايكەسسىزدىكتەر انىقتالعان.

«وسى ازاماتتاردان 500 ملن تەڭگەگە جۋىق سالىق ءوندىرىلدى. ەگەر حابارلاما ورىندالماسا، ءبىز سالىقتىق تەكسەرۋگە شىعىپ، قارىزدى جەكە شوتىنان ماجبۇرلەپ تولەتۋگە قۇقىعىمىز بار»، — دەدى ەرقانات شىڭبەرگەن.

سىيلىق پەن بارتەر تابىس پا؟

كوپتەگەن بلوگەر اراسىندا «تابىس تەك قولما-قول اقشامەن ەسەپتەلەدى» دەگەن قاتە تۇسىنىك بار. الايدا مەملەكەتتىك كىرىستەر كوميتەتى بۇل ماسەلەگە نۇكتە قويدى:

• بارتەر جانە سىيلىقتار: كەز كەلگەن مۇلىك نەمەسە سىيلىق تابىسقا جاتادى جانە ودان سالىق تولەنۋى ءتيىس.
• جارناما: جەلىدەگى تابىس تابۋ ماقساتىندا جاسالعان ءاربىر جاريالانىم كاسىپكەرلىك قىزمەت بولىپ ەسەپتەلەدى.

دەرەكتەر قايدان الىنادى؟

سالىق ورگاندارى بلوگەرلەردىڭ شىنايى تابىسىن انىقتاۋ ءۇشىن بانكتەردەن جانە باسقا دا مەملەكەتتىك ورگانداردان الىنعان مالىمەتتەردى دەكلاراتسيامەن سالىستىرادى. سايكەسسىزدىك تابىلعان جاعدايدا ازاماتقا حابارلاما جىبەرىلەدى.

حابارلاما العان تۇلعانىڭ 30 كۇن ىشىندە ەكى تاڭداۋى بار:

1. قاتەلىكتى مويىنداپ، سالىقتى تولىق تولەۋ.
2. ەگەر بۇزۋشىلىقپەن كەلىسپەسە، ءتيىستى قۇجاتتار ارقىلى تۇسىندىرمە بەرىپ، ءوز ءۋاجىن دالەلدەۋ.

ايتا كەتەيىك، سالىق زاڭناماسىن ءبىرىنشى رەت بۇزعاندارعا ەسكەرتۋ بەرىلەدى، ال قايتالانعان جاعدايدا اكىمشىلىك قۇقىق بۇزۋشىلىق تۋرالى كودەكسكە ساي ايىپپۇلدار قاراستىرىلعان.

Abai.kz