اڭگىمە كقك (كاسپي قۇبىر كونسورتسيۋمى) ارقىلى مۇناي ەكسپورتىن توقتاتۋ تۋرالى بولىپ وتىر. Reuters اگەنتتىگىنىڭ مالىمەتىنشە، كيەۆ بۇل ەسكەرتۋدى «نازارعا العان».

ۋكراينا نوۆوروسسيسك اۋدانىنداعى كتك ينفراقۇرىلىمىنا جاسالعان شابۋىلداردان كەيىن اقش مەملەكەتتىك دەپارتامەنتىنەن رەسمي نوتا الدى. بۇل تۋرالى ۋكراينانىڭ امەريكا قۇراما شتاتتارىنداعى ەلشىسى ولگا ستەفانيشينا مالىمدەدى.

ونىڭ ايتۋىنشا، سوققىلار «قازاقستانمەن بايلانىستى امەريكالىق ەكونوميكالىق مۇددەلەرگە» نۇقسان كەلتىرگەن.

قازاقستان مۇنايىنىڭ باسىم بولىگى نوۆوروسسيسك ارقىلى ەكسپورتتالادى.

«ءبىز مەملەكەتتىك دەپارتامەنتتەن امەريكالىق مۇددەلەرگە سوققى بەرۋدەن تارتىنۋىمىز كەرەك ەكەنىن ەستىدىك»، — دەدى ستەفانيشينا.

ول بۇل ۇندەۋدىڭ رەسەيدىڭ اسكەري جانە ەنەرگەتيكالىق ينفراقۇرىلىمىنا شابۋىل جاساۋدان باس تارتۋ ەمەس، ءدال وسى امەريكالىق مۇددەلەرگە قاتىستى بولعانىن اتاپ ءوتتى. ستەفانيشينانىڭ سوزىنشە، كيەۆ بۇل جاعدايدى «نازارعا الدى».

وقيعانىڭ ءمان-جايى

ەستەرىڭىزگە سالا كەتەيىك، 2025 جىلدىڭ قاراشا ايىنىڭ سوڭىندا نوۆوروسسيسك ماڭىنداعى كاسپي قۇبىر كونسورتسيۋمىنىڭ تەڭىز تەرمينالىنا ۇشقىشسىز ۇشاقتار شابۋىل جاساعان بولاتىن. سودان كەيىن مۇناي تيەۋ جۇمىستارى ۋاقىتشا توقتاتىلىپ، تانكەرلەر اكۆاتوريادان شىعارىلدى. كەيىنىرەك كتك زاقىمدالعان قۇرىلعىلاردىڭ ءبىرىن جوندەۋ جۇمىستارى اياقتالعانىن حابارلادى.

شابۋىلدان كەيىن قازاقستان رەسپۋبليكاسىنىڭ سىرتقى ىستەر مينيسترلىگى نارازىلىق ءبىلدىرىپ، بولعان وقيعانى قازاقستان مەن ۋكراينا اراسىنداعى ەكىجاقتى قارىم-قاتىناسقا نۇقسان كەلتىرەتىن ارەكەت رەتىندە قاراستىراتىنىن مالىمدەدى.

الايدا، اقش ارالاسقانعا دەيىن ۋكراين تاراپى قازاقستاننىڭ ەكونوميكاسىنا نەمەسە ينفراقۇرىلىمىنا سوققى بەرمەيتىنىن جانە ونداي نيەتى جوق ەكەنىن اشىق مالىمدەپ كەلگەن ەدى. ۋكراينا ءسىم بۇل ارەكەتتەر تەك رەسەيدىڭ اسكەري الەۋەتىنە قارسى باعىتتالعانىن جانە «قازاقستانعا نەمەسە باسقا ءۇشىنشى تاراپتارعا قارسى ەمەس» ەكەنىن العا تارتقان.

ۋكراينا ەلشىسى ۆيكتور مايكو دا ۇقساس ۇستانىم ءبىلدىرىپ، قازاقستاننىڭ «ەشقاشان سوققى نىساناسى بولماعانىن جانە بولمايتىنىن» باسا ايتقان بولاتىن.

قاڭتار ايىنىڭ ورتاسىندا ءماجىلىس دەپۋتاتى ايدوس سارىم كونسورتسيۋم ينفراقۇرىلىمىنا جاسالعان شابۋىلدان كەيىن ۋكرايناعا «قىسىم جاساۋدى» ۇسىندى.

Abai.kz