فيزيكادان نوبەل سىيلىعىن يەلەنگەن ايگىلى عالىم اندرە گايم قازاقستان كورەرمەنىنە العاش رەت سۇحبات بەردى. ول 24KZ ارناسىنداعى «Alem Talk» باعدارلاماسىندا قوناق بولىپ، عىلىمنىڭ بۇگىنى مەن بولاشاعى جايىندا كەڭىنەن اڭگىمە ءوربىتتى. بۇل - ونىڭ تەك قازاقستانعا عانا ەمەس، تۇتاس ورتالىق ازيا ايماعىنا بەرگەن تۇڭعىش سۇحباتى.

XXI عاسىرداعى ەڭ ماڭىزدى عىلىمي جەتىستىكتەردىڭ ءبىرى - گرافەندى اشقان عالىم زاماناۋي ەلەكترونيكا، ەنەرگەتيكا جانە كۆانتتىق تەحنولوگيالار ادامزات ءومىرىن قالاي وزگەرتەتىنىن ءتۇسىندىرىپ بەردى. ونىڭ ويىنشا، عىلىم ءبىر ساتتىك تابىسقا قۇرىلمايدى. ىرگەلى جاڭالىقتار جىلدار بويى ۇزدىكسىز ىزدەنىس پەن سابىرلى ەڭبەكتى تالاپ ەتەدى.

عالىم وتكەنگە كوز جۇگىرتىپ، كەزىندە ەلەكتر قۋاتىنسىز ءومىردى ەلەستەتۋ مۇمكىن بولماعانىن، ال بۇگىندە ونىڭ وركەنيەتتىڭ تىرەگىنە اينالعانىن ايتتى. سول سەكىلدى، ءبىر عاسىر بۇرىن جاسالعان «ەينشتەيننىڭ تەوريالارى» قازىرگى تەحنولوگيالاردىڭ نەگىزىنە اينالىپ وتىر. دەمەك، بۇگىنگى زەرتتەۋ ەرتەڭ بىردەن جەمىس بەرمەۋى مۇمكىن، بىراق ۋاقىت وتە كەلە ادامزات دامۋىنا وراسان ىقپال ەتەدى. عىلىم - حالىقتاردى جاقىنداستىراتىن، ورتاق ماقسات جولىندا بىرىكتىرەتىن كەڭىستىك. ناعىز جاڭالىقتار دا كوبىنە وسىنداي ىنتىماقتاستىقتىڭ ناتيجەسىندە دۇنيەگە كەلەتىنىن ايتتى.

ايتا كەتەيىك، نەبارى ءبىر اتوم كومىرتەكتەن تۇراتىن گرافەندى اشقانى ءۇشىن 2010 جىلى اندرە گايم فيزيكا سالاسىنداعى «نوبەل سىيلىعىن» كونستانتين نوۆوسەلوۆپەن بىرگە العان بولاتىن.

سۇحباتتا ايتىلعان ويلار عىلىمنىڭ تەك زەرتحانا اياسىندا عانا ەمەس، ادامزاتتىڭ بولاشاعىن ايقىندايتىن كۇش ەكەنىن تاعى ءبىر مارتە دالەلدەدى.

سۇحباتتىڭ تولىق نۇسقاسىن 24KZ ارناسىنىڭ Youtube پاراقشاسىنان كورە الاسىز https://www.youtube.com/@tv24kz.

Abai.kz