ادام بالاسىنىڭ قول جەتكىزبەيتىنى جوق. تەك ىشكى قىزى­عۋشىلىعى مەن سوعان جەتۋ جولىنداعى قۇلشىنىسى بولسا بولعانى. كەيىپكەرىمىز استانا قالاسى مەملەكەتتىك ءارحيۆىنىڭ قۇجاتتاردى قالپىنا كەلتىرۋ جانە ساقتاۋ قۇرالدارىن دايىنداۋ قىزمەتىنىڭ باسشىسى ايگۇل ناعاشىبەكقىزى – ءدال سونداي جان.

ارحيۆ سالاسى قىزىق تا قيىن دەسەك قاتەلەسپەگەنىمىز. سەبەبى سىرتتاي قاراعان ادامعا موماقان مەكەمەنىڭ ىشكى قاربالاسى ءسولىڭدى سىعادى. تاڭنىڭ اتقانىنان كەشتىڭ باتقانىنا دەيىن تىنىمسىز تىرلىك. سارعايعان پاراقتاردىڭ ساقتالۋى، ولاردىڭ قايتا قالىپقا كەلۋىنىڭ ءوزى – كۇردەلى ءىس. وسىنداي سالادا ءوزىن جوعالتىپ الماي، جان قالاۋى­مەن جۇمىس ىستەپ جاتقانداردىڭ قاتارىنان ايگۇل باعداۋلەتوۆانى كورۋگە بولادى. ول ءبولىم باسشىسى بولعانمەن، قاتارداعى قىزمەتكەرلەرىمەن كۇنى-ءتۇنى قاربالاس شاقتى بىرگە وتكىزەدى.

ايگۇل ورتا جاستى ەڭسەرگەنمەن، جۇمىستان تىس ۋاقىتتا دومبىرا شەرتۋدى ۇيرەنگەن. جۇمىستان شىعا سالا ارنايى بىلىكتى مامانداردان ءتالىم الىپ، دومبىرا شەرتۋدى ۇيرەنگەن.

– العاشقى ساباق بىردەن كۇي ەمەس، الدىمەن دومبىرانى دۇرىس ۇستاۋ، قاعىس تۇرلەرى جانە قاراپايىم جاتتىعۋلاردان باستالدى. ەڭ ءبىرىنشى «ءبىز ءومىردىڭ گۇلىمىز» ءانى مەن مينۋسوۆكاسىن دومبىرادا شەرتۋدى ۇيرەندىم. ساباق اپتاسىنا ەكى رەت بولعاندىقتان، جۇمىستان كەيىن باراتىنمىن. ءار ساباقتا ءبىر ءان نەمەسە كۇي ۇيرەتىلدى جانە ءۇي تاپسىر­ماسى بەرىلدى. كەيىن جەڭىل حالىق كۇيلەرىنە كوشتىم. كۇيلەر جەتىنشى ساباقتان كەيىن باستالدى. وعان دەيىن اندەردى ۇيرەندىم. العاشقىلارىن قيىندىقسىز مەڭگەرىپ ءجۇردىم. كۇردەلى كۇيلەردەن ءسال قيىندىق تۋىندادى. سوندا دا كۇن سايىن كەم دەگەندە 20-30 مينۋت ۋاقىت بولۋگە تىرىسامىن. كەي كۇندەرى جۇمىسقا بايلانىستى ازداۋ بولادى، بىراق اپتاسىنا ەكى رەت مىندەتتى تۇردە ساباققا قاتىسامىن، – دەپ ايگۇل اعىنان جارىلدى.

ونىڭ ايتۋىنشا، دومبىرا ءۇيىر­مەسىنە قاتىسۋعا ءوزىنىڭ ىشكى كۇشى يتەرمەلەگەن. سەبەبى جانى قالاعان اسپاپتى قالاي مەڭگەرەمىن دەگەن ايگۇلدىڭ ارمانى ورىندالعان ىسپەتتى.

– دومبىرا تارتقاندا ىشكى تىنىشتىقتى ەرەكشە سەزىنەمىن. كۇي ورىنداپ وتىرعاندا بويىمدا ءبىر جەڭىلدىك پايدا بولادى. سول ساتتە جانىم دەمالىپ، كوڭىلىم ورنىنا تۇسەدى. دومبىرا ماعان سابىر بەردى، ۇلتتىق قۇندىلىقتارعا دەگەن قۇرمەتىمدى ارتتىردى. ۋاقىتتى ءتيىمدى پايدالانۋدى ۇيرەتتى جانە رۋحاني بايىتتى. ەندى ءوزىم دە ۇيرەنەمىن دەگەن ادام بولسا ۇيرەتكىم كەلەدى. اسىرەسە ءوزىمنىڭ نەمەرەلەرىمە ۇيرەتە السام، ول دا ۇلكەن باقىت بولار ەدى. دومبىرا – ۇرپاقتان-ۇرپاققا جالعاسقان اسىل مۇرا. نەمەرەلەرىم ۇلتتىق ونەردى ءبىلىپ، قۇرمەتتەپ وسسە دەگەن ارمان-تىلەگىم بار، – دەيدى كەيىپكەرىمىز.

قازىرگى ۋاقىتتا ءارحيۆتىڭ ايگۇلى مەكەمە ىشىندە وتەتىن ءىس-شارالاردا دومبىرا شەرتىپ، ارىپتەستەرىن قۋانتىپ ءجۇر. نۇردىڭ تالاپتىعا جاۋاتىنى سەكىلدى، ايگۇل ءوزىن تولىق قولعا الىپ، قالاعان اسپابىن مەڭگەرگەن. كەيىپكەرىمىزدىڭ باسقا دا ۇيرەنگىسى كەلەتىندەرگە ۇلگى بولا الاتىنىنا ءسوز جوق. ارمانى ورىندالعان ايگۇلدىڭ شىعار شىڭى بيىك. 

Abai.kz