قازىر شىعىس باعىتتا لۋگانسكي كوشەسىمەن اياقتالاتىن ساتباەۆ كوشەسى شىعىس اينالما اۆتوموبيل جولىنا (شااج) دەيىن ۇزارتىلماق.

مەملەكەتتىك ساتىپ الۋ سايتىندا ساتباەۆ كوشەسىن لۋگانسكي كوشەسىنەن شىعىس اينالما اۆتوموبيل جولىنا دەيىن ۇزارتۋعا جوبالاۋ-سمەتالىق قۇجاتتاماسىن ازىرلەۋ بويىنشا حابارلاندىرۋ جاريالاندى. 

لوتقا 6 ناۋرىزدان باستاپ وتىنىمدەر قابىلدانا باستادى جانە ول 13 ناۋرىزعا دەيىن جالعاسادى. حابارلاندىرۋدا جوبالاۋ-سمەتالىق قۇجاتتاما 2027 جىلدىڭ 30 ماۋسىمىنا دەيىن ازىرلەنۋى ءتيىس ەكەنى كورسەتىلگەن. ونى دايىنداۋعا 359 ملن تەڭگە جۇمسالادى.

قۇجاتتىڭ تەحنيكالىق ەرەكشەلىكتەرگە سايكەس، لوت جەڭىمپازى جوبادا كەلەسى ماسەلەلەردى قاراستىرۋى قاجەت:

- جوبانىڭ پاسپورتى، جول قۇرىلىسىنا قاجەتتى نەگىزگى ماتەريالدار مەن كونسترۋكتسيالاردىڭ (كولەمى، ماتەريالداردىڭ باعاسى) قۇرامىن;

- دايىندىق جۇمىستارى، جول قوزعالىسىن ۇيىمداستىرۋ جانە ونىڭ قاۋىپسىزدىگى، قورشاعان ورتانى قورعاۋ، قۇرىلىستى ۇيىمداستىرۋ جوباسىن;

- وزەن سۋلارىنىڭ، سونىمەن قاتار كوكتەم كەزىندەگى ەرىگەن قاردىڭ سۋلارىنىڭ تاسقىنىنان قورعاۋ بويىنشا ءىس-شارالاردى;

- ساتباەۆ كوشەسى مەن شىعىس اينالما اۆتوموبيل جولىنىڭ قيىلىسىندا كولىك جولايرىعىنىڭ قۇرىلىسىن;

- جاياۋ جۇرگىنشىلەر جولدارىن;

- ينجەنەرلىك جەلىلەردى قايتا قۇرۋدى;

- قۇرىلىس كەزىندەگى جول قوزعالىس سحەماسىن بارىنشا قازىرگى جول قوزعالىسىنىڭ اياسىندا ءتيىمدى پايدالانۋدى;

- قۇرىلىس بارىسىندا بارىنشا قازىرگى وتاندىق زاماناۋي قۇرىلىس ماتەريالدارىن پايدالانۋدى;

- جاياۋ جۇرگىنشىلەر وتكەلىن قاراستىرۋى قاجەت.

Abai.kz