استانا قالاسىنداعى №117 سايلاۋ ۋچاسكەسىنە قىرعىز رەسپۋبليكاسىنىڭ سايلاۋ جانە رەفەرەندۋم وتكىزۋ جونىندەگى ورتالىق كوميسسياسىنىڭ توراعاسى تىنچتىك شاينازاروۆ كەلىپ، كونستيتۋتسيالىق رەفەرەندۋمنىڭ ءوتۋ بارىسىمەن تانىستى.

ساراپشىنىڭ ايتۋىنشا، كەز كەلگەن ەلدە بيلىكتىڭ نەگىزگى كوزى – حالىق. ال حالىق ءوز بيلىگىن سايلاۋ مەن رەفەرەندۋم ارقىلى جۇزەگە اسىرادى. مۇنداي ساياسي ناۋقانداردا ازاماتتار ءوز ەلىنىڭ بولاشاقتاعى دامۋ باعىتىن قالاي كورەتىنىن بىلدىرەدى.

تىنچتىك شاينازاروۆ قازاقستاندا ءوتىپ جاتقان رەفەرەندۋمنىڭ ماڭىزدىلىعىنا توقتالىپ، بۇل باستاما ەلدىڭ الداعى دامۋىنا اسەر ەتەتىن ماڭىزدى قادام ەكەنىن ايتتى. ونىڭ سوزىنشە، بىلتىرعى جىلدىڭ قىركۇيەگىندە قازاقستان پرەزيدەنتى قاسىم-جومارت توقاەۆ حالىققا جولداۋ جاساپ، كونستيتۋتسيالىق وزگەرىستەر ماسەلەسىن كوتەردى. بۇگىندە سول باستامانىڭ جالعاسى رەتىندە رەفەرەندۋم ءوتىپ جاتىر.

ساراپشى سايلاۋ ۋچاسكەسىندەگى جاعدايدى وڭ باعالادى. ايتۋىنشا، داۋىس بەرۋگە كەلگەن ازاماتتاردىڭ بەلسەندىلىگى جاقسى، ادامداردىڭ كوڭىل كۇيى كوتەرىڭكى.

«ۋچاسكە ماڭىندا ءبىراز ۋاقىت باقىلاپ تۇردىم. قازىردىڭ وزىندە كەلۋشىلەردىڭ قاراسى جاقسى. ناقتى قانشا پايىز ەكەنىن ايتۋ قيىن، بىراق حالىقتىڭ بەلسەندىلىگى بايقالادى. ەڭ باستىسى – ادامداردىڭ كوڭىل كۇيى جاقسى، مەرەكەلىك اتموسفەرا سەزىلەدى. كەشكە دەيىن كۇتىپ، قورىتىندى ناتيجەلەرگە قاراي ءتيىستى باعاسىن بەرۋگە بولادى»، – دەدى ول.

ايتا كەتەيىك، قىرعىزستاننان رەفەرەندۋمدى باقىلاۋ ءۇشىن ارنايى دەلەگاتسيا كەلگەن. تىنچتىك شاينازاروۆتىڭ ايتۋىنشا، قازاقستانعا بارلىعى 18 بايقاۋشى جىبەرىلگەن. ونىڭ التاۋى استاناعا كەلسە، قالعان 12-ءسى قىرعىزستانمەن شەكتەسەتىن قازاقستان وڭىرلەرىندەگى ۋچاسكەلەردە باقىلاۋ جۇرگىزىپ جاتىر.

سونىمەن قاتار ول سايلاۋ ۋچاسكەسىنىڭ تەحنيكالىق جانە ۇيىمداستىرۋشىلىق دەڭگەيىنە دە توقتالدى.

«ءار مەملەكەتتىڭ ءوز ءتاسىلى بار. تەحنيكالىق جابدىقتالۋ ءارتۇرلى بولۋى مۇمكىن. بىراق ەڭ ماڭىزدىسى – ازاماتتاردىڭ ەركىن داۋىس بەرۋىنە مۇمكىندىك بەرۋ. بۇگىن بۇل جەردە قۇپيا داۋىس بەرۋ تولىق قامتاماسىز ەتىلگەنىن كوردىك. ادامداردىڭ شوعىرلانۋى، رەتسىزدىك جوق، ءبارى جاقسى ۇيىمداستىرىلعان»، – دەدى .

ساراپشىنىڭ ايتۋىنشا، بۇل ونىڭ استاناعا العاش رەت كەلۋى. ول قازاقستانعا ساپارى بارىسىندا رەفەرەندۋمنىڭ ءوتۋ بارىسىن باقىلاپ، تاجىريبە الماسۋعا مۇمكىندىك تۋعانىن اتاپ ءوتتى.

Abai.kz