قۇمار ويىن بيزنەسى تۋرالى زاڭعا ەنگىزىلگەن تۇزەتۋلەرگە سايكەس، ەلىمىزدىڭ جاڭا وڭىرلەرىندە كازينولار اشىلادى.

اتاپ ايتقاندا، "ويىن-ساۋىق مەكەمەلەرىنىڭ، بۋكمەكەرلىك كەڭسەلەر مەن توتاليزاتورلاردىڭ (بيلەت كاسسالارىنىڭ) ورنالاسۋى" تۋرالى باپ تولىقتىرىلدى.

وعان سايكەس ويىن ورىندارى مىنا وڭىرلەردە اشىلادى:

• ماڭعىستاۋ وبلىسىندا كاسپي تەڭىزىنىڭ جاعالاۋىندا;
• جەتىسۋ وبلىسىنىڭ پانفيلوۆ اۋدانىندا جانە الاكول جاعالاۋىندا;
• الماتى وبلىسىنىڭ تالعار اۋدانىندا;
• شىعىس قازاقستان وبلىسىنىڭ زايسان اۋدانىنداعى مارقاكول اۋماعىندا.

سونىمەن قاتار ەرەكشە قورعالاتىن تابيعي اۋماقتاردا، تاريحي-مادەني ماڭىزى بار جەرلەردە، سونداي-اق قورعانىس پەن ۇلتتىق قاۋىپسىزدىككە ارنالعان اۋماقتاردا كازينو، ويىن اۆتوماتتارى زالدارى، بۋكمەكەرلىك كەڭسەلەر مەن توتاليزاتورلاردى ورنالاستىرۋعا تىيىم سالىنادى.

زاڭ جاڭا نورمامەن تولىقتىرىلىپ، اتالعان وڭىرلەردە ورنالاساتىن كازينو، ويىن اۆتوماتتارى زالدارى، بۋكمەكەرلىك كەڭسەلەر مەن توتاليزاتورلارعا تەك شەتەلدىكتەر مەن ازاماتتىعى جوق تۇلعالار، سونداي-اق وسى مەكەمەلەردىڭ قىزمەتكەرلەرى جانە قىزمەتتىك مىندەتتەرىن ورىنداۋىنا بايلانىستى سول جەردە جۇرگەن وزگە دە ادامدار عانا كىرە الاتىنى بەلگىلەندى.

2026 جىلعى 16 ناۋرىزدا مەملەكەت باسشىسى قاسىم-جومارت توقاەۆ تۋريزم سالاسى مەن بالالار سپورتىن قولداۋعا باعىتتالعان زاڭعا قول قويعان بولاتىن. سونداي-اق بۇل زاڭ دەنە شىنىقتىرۋ مەن سپورتتى دامىتۋعا ارنالعان بيۋدجەتتەن تىس قاراجاتتى بولەتىن بىرىڭعاي وپەراتوردىڭ قارجىلىق ەسەپتىلىگىنە جىل سايىن مىندەتتى اۋديت جۇرگىزۋدى ەنگىزەدى.

Abai.kz