مەملەكەت باسشىسىنىڭ «تازا قازاقستان» باستاماسى اياسىندا سۋ رەسۋرستارى جانە يرريگاتسيا مينيسترلىگى ەلىمىزدىڭ بارلىق وڭىرىندە بۇلاقتاردى تازالاۋعا باعىتتالعان «ءمولدىر بۇلاق» ەكولوگيالىق اكتسياسىن باستادى.

اۋا رايىنا بايلانىستى العاشقى كەزەڭدە اكتسيا ەلىمىزدىڭ وڭتۇستىك وڭىرلەرىندەگى 28 بۇلاقتا وتكىزىلدى. اتاپ ايتقاندا، شىمكەنت قالاسى، الماتى، جامبىل، قىزىلوردا، تۇركىستان جانە جەتىسۋ وبلىستارى. اكتسياعا ءبىر مەزگىلدە شامامەن 3,8 مىڭ ادام قاتىستى. ولار بۇلاقتاردىڭ كوزىن اشىپ، قالپىنا كەلتىردى. سونىمەن قاتار اينالاسىنداعى اۋماقتار تازارتىلىپ، اباتتاندىرىلدى، قوقىس جينالىپ، كوشەتتەر وتىرعىزىلدى.

سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ پەن جامبىل وبلىسىنىڭ اكىمى ەربول قاراشوكەەۆ جامبىل اۋدانىنداعى جالعىزتال بۇلاعىن تازالاۋ جۇمىستارىنا قاتىستى. بۇلاق ايشا ءبيبى اۋىلىنان 16 شاقىرىم جەردە ورنالاسقان.

سونداي-اق «ءمولدىر بۇلاق» اكتسياسى اياسىنداعى ءىس-شارالار جامبىل وبلىسىنىڭ مەركى، سارىسۋ، شۋ، تالاس، رىسقۇلوۆ، بايزاق جانە قورداي اۋداندارىنداعى جەتى بۇلاقتا ءوتتى. بۇلاقتاردى تازالاۋ جۇمىستارىنا سۋ رەسۋرستارى جانە يرريگاتسيا مينيسترلىگى ماماندارى، «قازسۋشار» رمك وبلىستىق فيليالىنىڭ، شۋ-تالاس باسسەيندىك ينسپەكتسياسىنىڭ جانە قازاق سۋ شارۋاشىلىعى عىلىمي-زەرتتەۋ ينستيتۋتىنىڭ قىزمەتكەرلەرى، سونداي-اق ەرىكتىلەر مەن ستۋدەنتتەر قاتىستى.

سۋرەت: mezgil.kz سايتىنان الىندى.

سۋ رەسۋرستارى جانە يرريگاتسيا مينيسترلىگىنىڭ باستاماسىمەن جامبىل وبلىسىندا سۋ سالاسىنداعى العاشقى ەرىكتىلەر قوزعالىسى – «بولاشاقتىڭ قاينارى» قۇرىلدى. ونىڭ قاتارىنا تاراز قالاسىنداعى قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنىڭ ستۋدەنتتەرى قوسىلدى. وسىنداي ەرىكتىلەر توپتارىن ەلىمىزدىڭ باسقا وڭىرلەرىندە دە قۇرۋ جوسپارلانىپ وتىر.

«بولاشاقتىڭ قاينارى» قوزعالىسى تەك ەكولوگيالىق اكتسيالارعا قاتىسۋمەن شەكتەلمەيدى. بەلسەندى جاستار سۋ ۇنەمدەۋدى ناسيحاتتاۋ جانە قوعامدا ەكولوگيالىق مادەنيەتتى قالىپتاستىرۋ باعىتىنداعى جۇيەلى جۇمىستارعا اتسالىسادى.

«بۇگىنگى ءىس-شاراعا ەرىكتىلەر مەن ستۋدەنتتەردىڭ قاتىسىپ وتىرعانى ەرەكشە قۋانتادى. مەملەكەت باسشىسى ەرىكتىلەر قوزعالىسىنا ءاردايىم ەرەكشە كوڭىل ءبولىپ، ولاردىڭ قوعامداعى ءرولىن جوعارى باعالاپ كەلەدى. ءبىزدىڭ مينيسترلىكتىڭ باستاماسىمەن ەلىمىزدە العاش رەت «بولاشاقتىڭ قاينارى» اتاۋىمەن سۋ سالاسىنىڭ ەرىكتىلەر توبى قۇرىلدى. بۇل جۇمىستىڭ جامبىل وبلىسىنان باستالۋى تاراز قالاسىندا قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتىنىڭ قايتا اشىلۋىمەن تىكەلەي بايلانىسى. الداعى ۋاقىتتا بۇل باستاما قازاقستاننىڭ بارلىق ءوڭىرىن قامتيدى»، – دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.

سۋرەت: mezgil.kz سايتىنان الىندى.

ەسكە سالا كەتەيىك، بىلتىر قىركۇيەك ايىندا «ءمولدىر بۇلاق» ەكولوگيالىق اكتسياسى اياسىندا سۋ رەسۋرستارى جانە يرريگاتسيا مينيسترلىگى مەن ۆەدومستۆوعا قارايتىن ۇيىمداردىڭ ماماندارى ەلىمىز بويىنشا بۇلاقتار مەن جاعالاۋ اۋماقتارىن تازالاۋ جۇمىستارىن جۇرگىزگەن بولاتىن. ءىس-شاراعا 4 مىڭنان استام ادام قاتىسىپ، 300 توننادان استام قوقىس جينالدى.

قازىرگى ۋاقىتتا «قازگيدروگەولوگيا» ۇلتتىق گيدروگەولوگيالىق قىزمەتى قازاقستان اۋماعىنداعى بارلىق بۇلاقتى تۇگەندەۋ جۇمىستارىن جۇرگىزۋدى باستادى. الدىن الا دەرەكتەرگە سايكەس، بۇگىنگى تاڭدا 711 الەۋەتتى بۇلاق انىقتالدى. قور جانە مۇراعات ماتەريالدارى نەگىزىندە 2772 بۇلاقتى قامتيتىن كارتا جاساقتالدى. بۇلاقتار سۋ رەسۋرستارى تاپشىلىعى جاعدايىندا سۋمەن قامتاماسىز ەتۋدىڭ قوسىمشا كوزى رەتىندە قاراستىرىلادى.

Abai.kz