سولتۇستىك قازاقستان وبلىسىندا ەكى ايدا 58 جول-كولىك وقيعاسى تىركەلىپ، سالدارىنان 10 ادام مەرت بولدى.

سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە، پەتروپاۆلدىڭ 25 جاستاعى تۇرعىنى «Jetour» ماركالى اۆتوكولىكپەن «چەليابى — ءنوۆوسىبىر» اۆتوجولىنىڭ 631 شاقىرىمىندا ۇستالدى. ول رۇقسات ەتىلگەن 100 كم/ساع جىلدامدىقتىڭ ورنىنا 151 كم/ساع جىلدامدىقپەن جۇرگەن. قۇقىق بۇزۋشىعا 20 ايلىق ەسەپتىك كورسەتكىش مولشەرىندە ايىپپۇل سالىندى. جۇرگىزۋشىگە جىلدامدىقتى شامادان تىس اسىرۋدىڭ سالدارى تۋرالى پروفيلاكتيكالىق اڭگىمە جۇرگىزىلدى.

سقو پد باستىعىنىڭ ورىنباسارى مارات جۇماليەۆتىڭ ايتۋىنشا، قابىلدانىپ جاتقان شارالارعا قاراماستان، ەكى ايدا وبلىستا 58 جول-كولىك وقيعاسى تىركەلىپ، 72 ادام زارداپ شەككەن، 10 ادام كوز جۇمدى. وعان جۇرگىزۋشىلەردىڭ ءتارتىپ ساقتاماۋى، جىلدامدىقتى ارتتىرۋ، باعدارشام سيگنالدارىن ەلەمەۋ سەبەپ بولعان.

سونداي-اق ەكى ايدىڭ ىشىندە جول قوزعالىسى ەرەجەلەرىن بۇزۋدىڭ 34 مىڭعا جۋىق دەرەگى انىقتالىپ، 144 ماس جۇرگىزۋشى ۇستالدى.

— جاقىندا تۇنگى ۋاقىتتا «رولدە ۇيقى» اتتى كەزەكتى اكتسيا ءوتتى: مەديتسينا قىزمەتكەرلەرىمەن بىرگە الىس باعىتتاعى جۇرگىزۋشىلەردى توقتاتىپ، ولاردىڭ جاعدايىن تەكسەرىپ، ەڭبەك جانە دەمالىس رەجيمىن ساقتاۋ قاجەتتىگىن ەسكە سالدىق. رەيد بارىسىندا 30 اۆتوكولىك جۇرگىزۋشىسى، ونىڭ ىشىندە جۇك كولىكتەرىنىڭ جۇرگىزۋشىلەرى قامتىلدى. مۇنداي ءىس-شارالار جول-كولىك وقيعالارىنىڭ الدىن الۋعا جانە ازاماتتاردىڭ قاۋىپسىزدىگىن قامتاماسىز ەتۋگە باعىتتالعان، — دەيدى اكىمشىلىك پوليتسيا باسقارماسىنىڭ باستىعى التىنبەك جاماليەۆ.

Abai.kz