بۇگىن – دۇنيەجۇزىلىك تەاتر كۇنى. ساحنا ساڭلاقتارى ءۇشىن ايرىقشا مانگە يە ايتۋلى داتا. تەاتر – تاربيە الاڭى، تالعامدى قالىپتاستىراتىن، وي مەن سەزىمدى تاربيەلەيتىن، قوعامعا ءوزىن جانە ءوز ءداۋىرىن تەرەڭىرەك تانۋعا مۇمكىندىك بەرەتىن بىرەگەي ونەر كەڭىستىگى.

مەملەكەت باسشىسى قاسىم-جومارت توقاەۆ اتاپ وتكەندەي، تەاترلاردىڭ دامۋى – كەز كەلگەن ەلدىڭ مادەني دەڭگەيىنىڭ ماڭىزدى كورسەتكىشى. بۇگىندە قازاقستاندا تەاتر ونەرىنە دەگەن قىزىعۋشىلىقتىڭ ارتىپ كەلە جاتقانى انىق بايقالادى. كورەرمەن سۇرانىسى دا بارعان سايىن مازمۇندى ءارى تالاپشىل سيپاتقا يە بولۋدا. اسىرەسە، ساحنا ونەرىنە قۇشتار جانداردىڭ اراسىندا جاستاردىڭ كوپ بولۋى كوڭىلگە ەرەكشە قۋانىش ۇيالاتادى.

بۇگىندە ەلىمىزدە 70-تەن استام تەاتر جۇمىس ىستەيدى، ولاردىڭ 57-ءسى – مەملەكەتتىك. تەك 2025 جىلدىڭ وزىندە مەملەكەتتىك تەاترلاردا 410 پرەمەرا ساحنالانىپ، 539 گاسترولدىك ساپار ۇيىمداستىرىلدى. بىلتىر كورەرمەندەر سانى 2,8 ميلليوننان استى. ال، 2026 جىلدىڭ العاشقى توقسانىندا رەسپۋبليكالىق تەاترلار 170 مىڭنان استام كورەرمەنگە قىزمەت كورسەتتى. بۇل كورسەتكىشتەر تەاتردىڭ ەلىمىزدە سۇرانىسقا يە، ومىرشەڭ ءارى حالىققا جاقىن ونەر ەكەنىنىڭ ايقىن دالەلى.

وسى رەتتە مادەنيەت پەن تاريح ماسەلەلەرىنىڭ ەلدىڭ اتا زاڭىندا بەرىك قۇندىلىق رەتىندە بەكىتىلۋى دە ەرەكشە ماڭىزعا يە. جاڭا حالىقتىق كونستيتۋتسيادا مەملەكەتتىڭ قىزمەتىنىڭ ىرگەلى قاعيداتتارىنىڭ قاتارىندا ۇلتتىق مادەنيەتتى قولداۋ جانە تاريحي-مادەني مۇرانى ساقتاۋ مىندەتتەرى ايقىن كورىنىس تاپقان. بۇل قازاقستان ءۇشىن مادەنيەت قوسالقى سالا ەمەس، قوعامدىق دامۋدىڭ جانە ۇلتتىق بىرەگەيلىكتىڭ نەگىزگى تىرەكتەرىنىڭ ءبىرى ەكەنىن كورسەتەتىن ماڭىزدى باعدار. سونىمەن قاتار كونستيتۋتسيادا تاريحي-مادەني مۇراعا ۇقىپتى قاراۋ، تاريح پەن مادەنيەت ەسكەرتكىشتەرىن ساقتاۋ ءار ازاماتتىڭ مىندەتى رەتىندە بەكىتىلگەن.

بۇگىندە قازاقستاندىق تەاترلار جاڭا قويىلىمدارىمەن كورەرمەندى قۋانتا وتىرىپ، حالىقارالىق ساحنالاردا ەل ابىرويىن اسقاقتاتىپ كەلەدى. ولار ءتۇرلى فەستيۆالدەرگە قاتىسىپ، جوعارى باعالارعا يە بولىپ، مادەني بايلانىستاردى كەڭەيتۋگە ءوز ۇلەسىن قوسۋدا.

وسى ايتۋلى كۇنى تەاتر ونەرىنىڭ بارلىق وكىلدەرىن دۇنيەجۇزىلىك تەاتر كۇنىمەن شىن جۇرەكتەن قۇتتىقتايمىن! سىزدەرگە شالقار شابىت، شىعارماشىلىق تابىس، ونەر جولىندا جاڭا جەتىستىكتەر تىلەيمىن!

Abai.kz