بۇگىن جەتىسۋ وبلىسىندا «تازا قازاقستان» ەكولوگيالىق باعدارلاماسى اياسىندا جالپىوبلىستىق سەنبىلىك ءوتتى. اۋقىمدى شاراعا وڭىردەگى بارلىق ەلدى مەكەندەردىڭ تۇرعىندارى، مەملەكەتتىك ورگانداردىڭ، كاسىپورىندار مەن كوممۋنالدىق مەكەمەلەردىڭ قىزمەتكەرلەرى، سونداي-اق ۆولونتەرلەر، ەكو-بەلسەندىلەر جانە ۇكىمەتتىك ەمەس ۇيىمداردىڭ وكىلدەرى قاتىستى. وسى كۇنى تالدىقورعان قالاسىنداعى «قاراتال» شاعىن اۋدانىندا ورنالاسقان جەتىسۋ ۋنيۆەرسيتەتىنىڭ ستۋدەنتتىك جاتاقحاناسى اۋماعىندا وبلىس اكىمى بەيبىت يساباەۆ جاستارمەن بىرگە اۋماقتى كوگالداندىرۋ جۇمىستارىنا قاتىسىپ، 50 قىلقان جاپىراقتى اعاش وتىرعىزدى. جالپى، بۇل سەنبىلىك اياسىندا وبلىس بويىنشا 8 مىڭنان استام اعاش وتىرعىزىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.

جاسىل جەلەكتەردى ەگىپ بولعان سوڭ ءوڭىر باسشىسى سەنبىلىككە كەلگەن جاستارمەن اڭگىمەلەسىپ، وسكەلەڭ ۇرپاقتىڭ جان-جاقتى دامۋىنىڭ ماڭىزدىلىعىن اتاپ ءوتتى.

– بۇگىنگى زامان – تسيفرلاندىرۋ عاسىرى، تسيفرلىق ساۋاتتىلىق جاستار ءۇشىن اسا قاجەت. ەكونوميكانىڭ دامۋى جاڭا تەحنولوگياعا، تەرەڭ بىلىمگە، ءار ادامنىڭ ءوزىن-ءوزى تاربيەلەۋىنە، تابيعاتقا، قوعام ىسىنە جاۋاپكەرشىلىكپەن قاراۋعا تىكەلەي بايلانىستى. سوندىقتان ۇنەمى ءبىلىم الىپ، ۇزدىكسىز وزدەرىڭدى دامىپ وتىرۋ قاجەت، – دەدى بەيبىت يساباەۆ.

تالدىقورعان قالاسى اكىمدىگىنىڭ مالىمەتىنشە، بۇگىنگى سەنبىلىك بارىسىندا 2000 دانا شارۋاشىلىق قۇرال-جابدىعى تاراتىلىپ، 44 بىرلىك ارنايى تەحنيكا جۇمىلدىرىلدى، 238 توننا قوقىس شىعارىلدى. سونىمەن قاتار كوگالداندىرۋ جۇمىستارىنا ەرەكشە كوڭىل بولىنۋدە. بيىل تالدىقورعاندا 13 مىڭ اعاش وتىرعىزۋ جوسپارلانعان، ونىڭ 2 مىڭى كوكتەمدە، 11 مىڭى كۇزدە ەگىلمەك. قازىرگى ۋاقىتتا 200-دەن استام كوشەت وتىرعىزىلدى، قالعانى ءساۋىر ايىنىڭ سوڭىنا دەيىن ەگىلەدى. وتىرعىزىلعان اعاشتارعا كۇتىم جاساۋ جۇمىسى دا جۇيەلى جۇرگىزىلەدى.

تازالىق شاراسى تۋرالى قاتىسۋشىلاردىڭ ءبىرى سابينا نۇراحمەت پىكىر ءبىلدىردى:

– مەن «اۆيتسەننا» مەديتسينالىق كوللەدجىنىڭ 1-كۋرس ستۋدەنتىمىن. «مەيىرگەر ءىسى» ماماندىعى بويىنشا ءبىلىم الىپ جاتىرمىن. وسىنداي قوعامدىق ءىس-شارالارعا ۇنەمى قاتىسامىن. بۇگىن ءبىز اعاش وتىرعىزىپ، اۋماقتى تازالاۋ جۇمىستارىنا اتسالىستىق. الداعى ۋاقىتتا دا وسى جاسىل جەلەكتەرگە كۇتىم جاساۋعا قاتىساتىن بولامىز. تابيعاتقا قامقورلىق جاساۋ – ءبىزدىڭ پارىزىمىز، – دەدى ول.

سونداي-اق ەسكەلدى اۋدانى كوكجازىق اۋىلىنىڭ تۇرعىنى دا وي قوستى:

– ءبىز ءار سەنبى سايىن اۋىلىمىزدى تازالاۋ جۇمىستارىنا قاتىسامىز. بۇگىن اعاش دىڭدەرىن اكتەدىك، اۋماقتى تازالاپ، قوقىستان ارىلتتىق. اۋىلىمىز تازا ءارى كورىكتى بولعانىن قالايمىز، سوندىقتان وعان ءوز ۇلەسىمىزدى قوسامىز، - دەدى ول.

جالپى وبلىس بويىنشا سەنبىلىككە 15 مىڭنان استام ادام قاتىسىپ، 225 بىرلىك تەحنيكا جۇمىلدىرىلدى. ءوڭىردىڭ ەلدى مەكەندەرىندە 8 مىڭنان استام اعاش وتىرعىزىلدى، ونىڭ 6800-ءى جاپىراقتى، 1426-سى قىلقان جاپىراقتى اعاشتار.

ال جىل باسىنان بەرى وبلىستىڭ سانيتارلىق تازالىعىنا 37 مىڭنان استام ادام قاتىسىپ، 576 بىرلىك تەحنيكا پايدالانىلعان. سونىڭ ناتيجەسىندە 3,9 مىڭ توننادان استام قوقىس شىعارىلىپ، شامامەن 19,9 مىڭ اعاش وتىرعىزىلدى.

تاعى ءبىر اتاپ وتەرلىگى، قازىرگى ۋاقىتتا تالدىقورعان قالاسىندا اباتتاندىرۋ باعىتىنداعى ينفراقۇرىلىمدىق جوبالار جۇزەگە اسىرىلۋدا. سونىڭ ءبىرى قاراتال وزەنىنىڭ جاعالاۋىندا 9 گەكتار اۋماقتا اۆتوماتتى سۋارۋ جۇيەسىن ورناتۋ جۇمىستارى جۇرگىزىلىپ جاتىر. اتالعان قۇرىلىس ۋچاسكەسىنە جاۋاپتى باعدات تاسبولاتوۆتىڭ ايتۋىنشا، جۇمىستار ناۋرىز ايىندا باستالىپ، مامىر ايىنىڭ ورتاسىندا اياقتالادى، نىساندا شامامەن 40 ادام ەڭبەك ەتۋدە. قازىرگى تاڭدا جالپى جۇمىس كولەمىنىڭ شامامەن 50%-ى ورىندالدى. 40 مىڭ شارشى مەتر جاسىل گازون اۋماعىندا 44 ماگنيتتىك كلاپان ورناتىلىپ، ءار ايماق جەكە-جەكە سۋارىلاتىن بولادى. سۋمەن قامتاماسىز ەتۋ ءۇشىن جەكە ۇڭعىما قازىلۋدا.

وسىنداي جۇمىستار «جاستار» ساياباعىندا دا جۇرگىزىلۋدە، مۇندا جاڭبىرلاتىپ سۋارۋ جۇيەسى 4 گەكتار اۋماقتى قامتيدى. جوباعا مەردىگەر ۇيىمنىڭ 20 جۇمىسشىسى مەن 12 بىرلىك تەحنيكاسى جۇمىلدىرىلعان. قازىرگى ۋاقىتتا جۇمىستاردىڭ 30%-ى ورىندالدى، جوبانى بەلگىلەنگەن مەرزىمنەن بۇرىن — شامامەن ماۋسىم–شىلدە ايلارىندا اياقتاۋ جوسپارلانىپ وتىر.

Abai.kz