يران يسلام بيلىگىنىڭ پارتيزاندىق سوعىس تاكتيكاسىنان ابدەن شارشاعان ترامپتىڭ «يراندى تاس عاسىرىنا جىبەرەمىن، مادەنيەتىن كۇلگە اينالدىرامىن» دەپ كۇندە تەپسىنىپ كەلە جاتقانى بەلگىلى. سوعان بايلانىستى الەم باسپاسوزىندە «ترامپ يرانعا اتوم بومباسىن تاستاۋى مۇمكىن» دەگەن قاۋەسەت اقپارات جەلدەي ەسۋدە. وعان اقش ۆيتسە-پرەزيدەنتى ۆەنستىڭ ايتقان سوزدەرى سەبەپ بولعان.

بۋداپەشتتە ۆەنگريا پرەمەر-ءمينيسترى ۆيكتور وربانمەن بىرلەسكەن ءباسپاسوز ءماسليحاتىندا سويلەگەن سوزىندە ۆەنس يراندى «ەكونوميكالىق تەرروريزممەن» اينالىسىپ، الەمدىك مۇناي مەن گاز تاسىمالىن بۇزۋعا تىرىستى دەپ ايىپتاعان. يران ورمۋز بۇعازى ارقىلى ەكونوميكالىق قۇرساۋىن قويماسا امەريكا قۇراما شتاتتارى يراندى ۇلكەن بوداۋ تولەۋگە ماجبۇرلەيتىنىن ەسكەرتكەن.

ول سونداي-اق: «بىزدە كەيبىر قۇرالدار بار، جانە ءبىز ولاردى ازىرگە پايدالانۋ تۋرالى شەشىم قابىلداعان جوقپىز. امەريكا قۇراما شتاتتارىنىڭ پرەزيدەنتى بۇل قۇرالداردى پايدالانۋ تۋرالى شەشىم قابىلداي الادى، ال ەگەر يراندىقتار ءوز مىنەز-قۇلقىن وزگەرتپەسە، ولاردى پايدالانۋعا شەشىم قابىلداۋى مۇمكىن»، - دەگەن.

ارتىنان اق ءۇي X الەۋمەتتىك مەديا پلاتفورماسىنىڭ «Rapid Response» اككاۋنتى ارقىلى سىرتقى سىنعا جاۋاپ بەرىپ، «ۆەنس يادرولىق قارۋدى قولدانۋ مۇمكىندىگى تۋرالى مەڭزەدى» دەگەن ايىپتاۋلاردى تىكەلەي جوققا شىعارىپ، ۆەنستىڭ سوزدەرىندە «ونداي ەشتەڭە جوق» دەپ مالىمدەدى.

سونىمەن قاتار، CNN بۇل ماسەلەمەن تانىس دەرەككوزدەرگە سىلتەمە جاساي وتىرىپ، وكىلدەر پالاتاسىنىڭ دەموكراتتارى رەسپۋبليكاشىلداردى ترامپتىڭ يرانداعى سوعىس وكىلەتتىكتەرىن شەكتەۋ تۋرالى قاراردى قولداۋعا بەلسەندى تۇردە ۇگىتتەپ جاتقانىن حابارلادى. سەيسەنبى كۇنى وكىلدەر پالاتاسىنىڭ ازشىلىق جەتەكشىسى حاكيم دجەففريس جانە باسقا دا وكىلدەر پالاتاسىنىڭ دەموكرات جەتەكشىلەرى رەسپۋبليكاشىلداردى اقش پەن يران اراسىنداعى سوعىستى توقتاتۋ تۋرالى داۋىس بەرۋ ءۇشىن وكىلدەر پالاتاسىنا قايتا شاقىردى.

سونداي-اق اقش پرەزيدەنتى ترامپ يرانعا قارسى شابۋىلداردى ەكى اپتاعا توقتاتا تۇرۋعا كەلىسكەنىن مالىمدەدى. ترامپ ءوزىنىڭ «Truth الەۋمەتتىك جەلىسىندە» «يراننان ون تارماقتان تۇراتىن ۇسىنىس العانىن» جانە ونى «كەلىسسوزدەردى باستاۋ ءۇشىن پايدالانۋعا بولادى» دەپ سانايتىنىن جاريالادى.

بۇل پاكىستان پرەمەر-ءمينيسترى شەحباز شاريفتىڭ اقش پرەزيدەنتى دونالد ترامپتى سەيسەنبى كۇنى كەشكە قويىلعان ۋلتيماتۋمدى ەكى اپتاعا ۇزارتۋعا شاقىرۋىنان كەيىن ورىن الدى. ترامپ بۇعان دەيىن يران ورمۋز بۇعازىن قايتا اشپاسا، «يراننىڭ بۇكىل وركەنيەتى جويىلادى» دەپ قورقىتقان بولاتىن.

Abai.kz