قورعانىس مينيسترلىگى كوكتەمگى اسكەرگە شاقىرۋ ناۋقانى كەزىندە  مەرزىمدى اسكەري قىزمەتتىڭ نەگىزگى اسپەكتىلەرىن ءتۇسىندىرۋدى ءجون كورەدى.

شاقىرۋ پروتسەسى تسيفرلاندىرىلعان

شاقىرۋ پروتسەسى بەلسەندى تۇردە تسيفرلاندىرىلىپ جاتىر. شاقىرتۋ قاعازدارى SMS-حابارلامالار مەن eGov پورتالى ارقىلى ەڭ كەمى ءۇش كۇن بۇرىن جىبەرىلەدى. مۇنداي حابارلاما رەسمي مارتەبەگە يە، ياعني ونى العان ازامات جەرگىلىكتى اسكەري باسقارۋ ورگانىنا نەمەسە شاقىرۋ پۋنكتىنە كەلۋگە مىندەتتى.

ازاماتتىق دەنساۋلىق ساقتاۋ ماماندارى جۇرگىزەتىن مەديتسينالىق تەكسەرۋ اسكەرگە جارامدىلىق ساناتىن انىقتايدى. زاڭدى نەگىزدەر بولعان جاعدايدا كەيىنگە قالدىرۋ نەمەسە بوساتۋ بەرىلەدى. اسكەري قىزمەتكە 18 بەن 27 جاس ارالىعىنداعى ءتيىستى نەگىزدەرى جوق ەر ازاماتتار شاقىرىلاتىنىن ايتا كەتكەن ءجون.

اسكەر بىزگە نە بەرەدى؟

مەرزىمدى اسكەري قىزمەت ءتارتىپ پەن جاۋاپكەرشىلىككە تاربيەلەپ، كەز كەلگەن سالادا قاجەت كوماندالىق جۇمىس داعدىلارىن قالىپتاستىرادى.

دەنە دايىندىعى مەن دەنساۋلىقتى نىعايتۋعا ەرەكشە كوڭىل بولىنەدى. تۇراقتى سپورتتىق جاتتىعۋلار، كۇن ءتارتىبى جانە تەڭگەرىمدى تاماقتانۋ توزىمدىلىكتى ارتتىرۋعا ىقپال ەتەدى.

قىزمەت بارىسىندا اسكەري قىزمەتشىلەر زاماناۋي تەحنولوگيالاردى مەڭگەرىپ، بايلانىس، تەحنيكا، لوگيستيكا، مەديتسينا جانە باسقا دا سالالاردا قاجەتتى تاجىريبەلىك داعدىلارعا يە بولىپ، ەڭبەك نارىعىندا قاجەتتى ماماندىقتارعا يە بولادى.

سونداي-اق قىزمەت كوشباسشىلىق قاسيەتتەردى، باسقارۋشىلىق داعدىلاردى جانە شەشىم قابىلداۋ قابىلەتىن دامىتۋعا كومەكتەسەدى.

قايدا قىزمەت وتەيدى؟

اسكەرگە شاقىرىلۋشىلاردى ءبولۋ دەنساۋلىق جاعدايىنا، ءبىلىم دەڭگەيىنە، پسيحولوگيالىق تۇراقتىلىعىنا جانە قارۋلى كۇشتەردىڭ قاجەتتىلىگىنە بايلانىستى جۇزەگە اسىرىلادى.

ساربازدار اسكەري قىزمەتتى قۇرلىق اسكەرلەرىندە، اۋە قورعانىسى كۇشتەرىندە، اسكەري-تەڭىز كۇشتەرىندە، دەسانتتىق-شابۋىلداۋ اسكەرلەرىندە جانە باسقا دا اسكەري قۇرالىمداردا وتەيدى. ولاردىڭ قاتارىندا ءىىم ۇلتتىق ۇلانى، ۇقك شەكارا قىزمەتى، مەملەكەتتىك كۇزەت قىزمەتى جانە توتەنشە جاعدايلار مينيسترلىگىنىڭ بولىمشەلەرى دە بار.

دەسانتتىق-شابۋىلداۋ اسكەرلەرى، تەڭىز جاياۋ اسكەرلەرى، مەملەكەتتىك كۇزەت قىزمەتى جانە ۇقك شەكارا قىزمەتى سياقتى اسكەري قۇرالىمدارعا قابىلداۋعا جوعارى تالاپتار قويىلادى. ۇمىتكەرلەر تەرەڭدەتىلگەن مەديتسينالىق جانە پسيحولوگيالىق ىرىكتەۋدەن، سونداي-اق دەنە دايىندىعى تەكسەرىسىنەن وتەدى.

اسكەر ساربازدارعا الەۋمەتتىك كەپىلدىكتەر بەرەدى مە؟

اسكەري قىزمەت كاسىبي وسۋگە مۇمكىندىك بەرەدى. اسكەري قىزمەتشىلەر سۇرانىسقا يە ماماندىقتاردى مەڭگەرىپ شىعادى. ال قىزمەتتەن كەيىن ءبىلىم گرانتتارىن جانە جوعارى وقۋ ورىندارىنا ءتۇسۋ كەزىندە جەڭىلدىكتەردى پايدالانا الادى، سونداي-اق ولارعا نەسيە دەمالىستارى بەرىلەدى.

قوسىمشا ءبىلىم بەرۋ جەڭىلدىكتەرى قاراستىرىلعان، ونىڭ ىشىندە ۇبت تاپسىرماي-اق گرانت الۋ مۇمكىندىگى جانە جاتاقحانادان ورىن الۋعا باسىمدىق بەرىلەدى. قازىرگى تاڭدا 9 مىڭنان استام ازامات ءتيىستى ءبىلىم الۋ سەرتيفيكاتتارىنا يە بولدى.

قىزمەتكە قالاي دايىندالۋ كەرەك؟

دايىندىق دەنە جانە پسيحولوگيالىق تۇرعىدان جۇرگىزىلۋى ءتيىس. توزىمدىلىكتى دامىتۋ، دەنە فورماسىن ساقتاۋ جانە تارتىپكە، ۇجىمدا قىزمەت ەتۋگە دايىن بولۋ كەرەك.

كوكتەمگى اسكەرگە شاقىرۋ ناۋقانى جالعاسۋدا. مىڭداعان قازاقستاندىق جاستار ءۇشىن اسكەري قىزمەت – تۇلعالىق قالىپتاسۋدىڭ جانە كاسىبي باعىت-باعدار الۋدىڭ ماڭىزدى كەزەڭى ەكەنىن ەستە ساقتاعان ءجون.

Abai.kz