رەسەيدىڭ مەملەكەتتىك مەنشىكتەگى «روساتوم» كاسىپورنىنىڭ ديرەكتورى الەكسەي ليحاچەۆ كەشە رەسەي تاراپتىڭ يراننىڭ اەس قۇرىلىسىنا كومەكتەسۋگە كەلگەن قىزمەتكەرلەرىن دەرلىك ەۆاكۋاتسيالاعانىن، ارتىندا از عانا ادام قالعانىن مالىمدەدى.

«ءبىز بۋشەر اتوم ەلەكتر ستانتسياسىنداعى سوڭعى اۋىسىمدى باستادىق»، - دەدى ليحاچەۆ. ونىڭ ايتۋىنشا 108 قىزمەتكەر ەۆاكۋاتسيالانىپ، تەك 20 قىزمەتكەر عانا قالعان، ولار جوعارى لاۋازىمدى باسشىلار مەن جابدىقتاردىڭ قاۋىپسىزدىگىنە جاۋاپتى قىزمەتكەرلەر ەكەن. بۇل يرانداعى جالعىز اتوم ەلەكتر ستانتسياسى.

«روساتوم» 28 اقپاندا يراك سوعىسى باستالعاننان بەرى بۋشەر اتوم ەلەكتر ستانتسياسىنان قىزمەتكەرلەرىن ۇزدىكسىز ەۆاكۋاتسيالاپ كەلەدى.

يراننىڭ وڭتۇستىگىندەگى بۋشەر اتوم ەلەكتر ستانتسياسىندا 1000 مۆت قۋاتتى رەاكتور ورنالاسقان. تاياۋ شىعىستاعى قاقتىعىس باستالعاننان بەرى ستانتسيانىڭ اينالاسىنداعى ايماققا كەم دەگەندە ءتورت رەت شابۋىل جاسالدى.

ماسكەۋ اتوم ەلەكتر ستانتسياسىنىڭ ماڭىنا جاسالعان شابۋىلدار  «چەرنوبىل وقيعاسىنان دا جويقىن» رادياتسيالىق اپاتقا اكەلۋى مۇمكىن ەكەنىن ەسكەرتتى.

ءساۋىر ايىنىڭ باسىندا ستانتسيانىڭ ءبىر قىزمەتكەرى جارىلعىش زاتتىڭ جارىلۋىنان قازا تاپقانى تۋرالى حابارلاندى; دەگەنمەن، يراندىق مەملەكەتتىك باق جانە حالىقارالىق اتوم ەنەرگياسى اگەنتتىگىنىڭ (ماگاتە) سپۋتنيكتىك سۋرەتتەرگە جاساعان تالداۋىنا سايكەس، بۋشەر اتوم ەلەكتر ستانتسياسىنىڭ ءوزى زاقىمدالماعان.

اقش پەن يران سوعىستى ەكى اپتاعا توقتاتۋعا كەلىسكەنىمەن، جەكسەنبىدە پاكىستاندا وتكەن العاشقى كەلىسسوزدەر ءساتسىز اياقتالدى. ارتىنان اقش پرەزيدەنتى ترامپ ەكى تاراپتىڭ بىتىمگە كەلۋگە جاقىن ەكەنىن، تەك بەيبىت ماقساتتا ۋران بايىتۋ ماسەلەسىندە الىدە ءبىر پاتۋاعا كەلە الماي جاتقانىن جازعان ەدى.

Abai.kz