ەلىمىزدە ەڭ تومەنگى جالاقىنى 150 مىڭ تەڭگەگە دەيىن جەتكىزۋ جوسپارلانىپ وتىر. بۇل تۋرالى ۇكىمەت كۋلۋارىندا ۇلتتىق ەكونوميكا ءبىرىنشى ۆيتسە-ءمينيسترى ازامات ءامرين مالىمدەدى. 

قازاقستاندا ەڭ تومەنگى جالاقىنى كەزەڭ-كەزەڭىمەن ارتتىرۋ ماسەلەسى قاراستىرىلىپ جاتىر. الايدا ناقتى مەرزىمى ازىرگە بەلگىسىز.

ءبىرىنشى ۆيتسە-مينيستر ازامات ءامريننىڭ ايتۋىنشا، بۇل شەشىم ءبىر عانا فاكتورعا ەمەس، بىرنەشە ەكونوميكالىق كورسەتكىشكە بايلانىستى قابىلدانادى.

جالپى الەمدە ەڭ تومەنگى جالاقى مەديانالىق جالاقىنىڭ شامامەن 50%-ىن قۇرايدى. بىزدە مەديانالىق جالاقى – شامامەن 302 مىڭ تەڭگە. سوندىقتان ەڭ تومەنگى جالاقىنى 150 مىڭ تەڭگەگە دەيىن جەتكىزۋ – ءبىزدىڭ جاقىن ۋاقىتتاعى ماقساتىمىز. بىراق بۇل قالاي جۇزەگە اسادى – ول قازىرگى ەسەپتەپ جاتقان بيۋدجەتكە بايلانىستى، – دەدى ءامرين.

ونىڭ سوزىنشە، ەڭ تومەنگى جالاقىنى كوتەرۋ مۇمكىندىگى مەملەكەتتىك بيۋدجەتتىڭ كىرىسىنە تىكەلەي تاۋەلدى.

بارلىعى بيۋدجەت مۇمكىندىگىنە بايلانىستى. بيىلعى جىل قالاي اياقتالاتىنىن، تۇسىمدەردىڭ ديناميكاسىن كورەمىز. ەگەر وسى قارقىن ساقتالسا، وندا قارجىلىق مۇمكىندىك پايدا بولىپ، بۇل شەشىمدى جۇزەگە اسىرۋعا بولادى، – دەيدى ول.

Abai.kz