قازاقستاندا «ادىلەت» اتتى جاڭا ساياسي پارتيا قۇرۋ جونىندەگى باستاماشىل توپ رەسمي مالىمدەمە جاسادى.

جاڭا ساياسي ۇيىم ءوزىن «ءادىل قازاقستان» يدەياسىن قولدايتىن، قۇقىق ۇستەمدىگىن كۇشەيتۋدى جانە ازاماتتاردىڭ مەملەكەت ىسىنە قاتىسۋىن ارتتىرۋدى كوزدەيتىن كۇش رەتىندە تانىستىردى.

پارتيانىڭ نەگىزگى ماقساتى – قازاقستان ازاماتتارىنىڭ قۇقىقتارى مەن بوستاندىقتارىن قورعاۋ، ەلدە ادىلەتتى قوعام قالىپتاستىرۋ.

سونىمەن قاتار ۇيىم ميسسياسىن جاڭا كونستيتۋتسيادا بەكىتىلگەن قاعيداتتاردىڭ ورىندالۋىن قامتاماسىز ەتۋمەن بايلانىستىرادى.

پارتيا قوعامداعى بەلسەندى ازاماتتاردى، ءتۇرلى سالا ماماندارىن، قالا مەن اۋىل تۇرعىندارىن بىرىكتىرۋدى جوسپارلاپ وتىر.

باستاما كوتەرگەندەر مالىمدەمەسىندە مىناداي قۇندىلىقتاردى اتاپ ءوتتى: ادىلەتتىلىك، پاتريوتيزم، ەڭبەكقورلىق، جاۋاپكەرشىلىك جانە دامۋ.

نەگىزگى ماقساتتارى: 

• بارلىق ازاماتتارعا تەڭ مۇمكىندىك جاساۋ جانە كلان ۇستەمدىگى مەن ايماقتاعى ۇستەمدىكتى ازايتۋ;
• تاۋەلسىز ءارى ءتيىمدى قۇقىق قورعاۋ جانە سوت جۇيەسىن قالىپتاستىرۋ;
• ەكونوميكالىق ادىلەتتىلىك پەن تۇراقتى دامۋ.

باستاماشىلاردىڭ ايتۋىنشا، جاڭا پارتيا ازاماتتىق قوعاممەن جانە ساراپشىلارمەن تىعىز جۇمىس ىستەۋدى كوزدەيدى.

16 ءساۋىر كۇنى باستاماشىل توپ قازاقستان رەسپۋبليكاسىنىڭ ادىلەت مينيسترلىگىنە پارتيانى تىركەۋ ءراسىمىن باستاۋ تۋرالى ءوتىنىش جولدايدى. سونداي-اق الداعى ۋاقىتتا قۇرىلتاي سەزىن وتكىزۋ جوسپارلانىپ وتىر.

«ءبىز بارلىق جاۋاپتى ازاماتتاردىڭ كۇشىن بىرىكتىرىپ، ادىلەتتى مەملەكەت قۇرۋعا جانە ونى نىعايتۋعا ۇمتىلامىز. ەكونوميكاسى مىقتى، بارشاعا مۇمكىندىك بەرەتىن، حالىقارالىق ارەنادا بەدەلى جوعارى ەل قالىپتاستىرعىمىز كەلەدى»، – دەدى باستاما كوتەرگەندەر.

پارتيانى قۇرۋ ءۇشىن وتىنىشكە قول قويعانداردىڭ ءتىزىمى:

• اتاباەۆا گۇلزيرا نۇرجانقىزى
• بەكتۇروۆ رەنات نۇرمولداۇلى
• جامانقۇلوۆا قارلىعاش قاليبەكقىزى
• زاكيەۆا دينارا بولاتقىزى
• قاراباسوۆا لاۋرا شاپاەۆقىزى
• كەنجەحانۇلى راۋان
• كۋزيەۆا زاميرا زاكيرجانقىزى
• قۇساينوۆ ايعازى ءامىرلانۇلى
• لاۆرەنتەۆ اندرەي سەرگەەۆيچ
• ماتجاني نۇربەك سەيىلحانۇلى
• نۇرمۇحامەدوۆ بۇرحان جولبارىسۇلى
• سۇگىرباي ايات يساتايۇلى
• تاۋان مۇحامەدقالي ەدۋاردۇلى
• تەن يرينا سەرگەەۆنا
• چينكيسباەۆا ءلاززات التىنبەكقىزى
• شيبۇتوۆ مارات

ايتا كەتەيىك، قازاقستاندا كوپپارتيالىق جۇيە قالىپتاسقان. دەگەنمەن ساياسي الاڭدا ءىرى پارتيالاردىڭ ىقپالى باسىم. سولاردىڭ ءبىرى ءارى بىرەگەيى – «AMANAT» پارتياسى. سونىمەن قاتار «اۋىل»، «Respublica»، «اقجول» سياقتى ساياسي ۇيىمدار بار. بۇل پارتيالار پارلامەنت ماجىلىسىنە سايلاۋعا قاتىسىپ، ەلدىڭ ساياسي جاعدايعا تىكەلەي ىقپال ەتەدى. زاڭناماعا سايكەس، جاڭا ساياسي پارتيا قۇرۋ ءۇشىن ادىلەت مينيسترلىگىندە تىركەۋدەن ءوتۋ، قۇرىلتاي سەزىن وتكىزۋ جانە بەلگىلى ءبىر مولشەردە قول جيناۋ تالاپ ەتىلەدى. سوڭعى جىلدارى ەلدە ءتۇرلى جاڭا ساياسي باستامالار كوتەرىلىپ كەلەدى، الايدا ولاردىڭ بارلىعى بىردەي رەسمي تىركەۋگە قول جەتكىزە بەرمەيدى.

ەسكە سالا كەتسەك، بۇعان دەيىن  زاڭگەر، ءماجىلىس دەپۋتاتى ابزال قۇسپان جۋرناليستەردىڭ قاي پارتياعا قوسىلۋىڭىز مۇمكىن دەگەن ساۋالىنا جاۋاپ بەرگەندە باسىمدىق «AMANAT» پارتياسىندا ەكەنىن اتاپ وتكەن ەدى. ول ناقتى قاي پارتياعا باراتىنى جايلى ساۋالعا جاۋاپ بەردى.