مادەنيەت جانە اقپارات مينيسترلىگى پروديۋسەر بايان الاگوزوۆانىڭ ۆيدەوسىنان كەيىن ارنايى تەكسەرىس باستادى.

كۇنى كەشە عانا تانىمال پروديۋسەر بايان الاگوزوۆا الەۋمەتتىك جەلىدەگى پاراقشاسىندا جۇرتشىلىقتى تاڭعالدىرعان ۆيدەو جاريالادى. بەينەجازبادا ول «قىز جىبەك» فيلمىندە مەرۋەرت وتكەشەۆا كيگەن القىزىل كامزولدى كورسەتىپ، بۇل قۇندى جادىگەردىڭ قازىرگى تاڭدا ءوز ۇيىندە ساقتاۋلى تۇرعانىن مالىمدەگەن بولاتىن. پروديۋسەردىڭ بۇل ءسوزى قوعامدا ۇلكەن پىكىرتالاس تۋدىرىپ، مەملەكەتتىك ورگانداردىڭ نازارىنا ىلىكتى.

مينيسترلىك نە دەيدى؟

قر مادەنيەت جانە اقپارات مينيسترلىگى بۇل جاعدايعا بايلانىستى بىردەن تۇسىنىكتەمە بەردى. ۆەدومستۆونىڭ مالىمەتىنشە، «قازاقفيلم» كينوستۋدياسىنىڭ مۋزەي قورىندا فيلمدەگى كامزولدىڭ ءبىر عانا تۇپنۇسقاسى بار. ول ۇلتتىق كينەماتوگرافيالىق مۇرانىڭ ماڭىزدى نىسانى رەتىندە مەملەكەت قورعاۋىنا الىنعان.

«پروديۋسەردىڭ جاريالانىمىندا ايتىلعان ەكىنشى كامزولدىڭ جەكە تۇلعانىڭ قولىنا قالاي تۇسكەنى قازىرگى ۋاقىتتا انىقتالىپ جاتىر»، — دەلىنگەن رەسمي حابارلامادا.

كينو مۇراسى – حالىق قازىناسى

«قازاقفيلم» كينوستۋدياسى قازىرگى تاڭدا وتاندىق تۋىندىلاردا قولدانىلعان رەكۆيزيتتەر مەن كوستيۋمدەردى جيناۋ، قالپىنا كەلتىرۋ جانە ساقتاۋ جۇمىستارىن تۇراقتى تۇردە جۇرگىزىپ كەلەدى. بۇل جۇمىستاردىڭ باستى ماقساتى — ونەر تۋىندىلارىن كەلەر ۇرپاققا سول قالپىندا جەتكىزۋ.

سونداي-اق، كينوستۋديا جانىنان زاماناۋي مۋزەي اشۋ جوسپارلانعان. بولاشاقتا قازاق كينوسىنىڭ تاريحىنان سىر شەرتەتىن بىرەگەي جادىگەرلەر سول جەرگە قويىلىپ، قالىڭ كوپشىلىككە قولجەتىمدى بولماق.

ءتۇيىن. «قىز جىبەك» — قازاق مادەنيەتىنىڭ بويتۇمارى. سوندىقتان وعان قاتىستى كەز كەلگەن زاتتىڭ، مەيلى ول كويلەك نەمەسە كامزول بولسىن، تاريحي قۇندىلىعى ولشەۋسىز. مامانداردىڭ ايتۋىنشا، ءتۇسىرىلىم كەزىندە كوستيۋمدەردىڭ بىرنەشە نۇسقاسى دايىندالۋى مۇمكىن، بىراق ولاردىڭ بارلىعى دا مەملەكەتتىك تىركەۋدە بولۋى ءتيىس.

ازىرگە مينيسترلىك تەكسەرىستىڭ ناتيجەسىن كۇتىپ وتىر. ەل نازارىن اۋدارعان كامزولدىڭ شىنايى تاريحى الداعى ۋاقىتتا بەلگىلى بولادى.

Abai.kz