موڭعوليانىڭ بايان-ولگەي ايماعىندا قازاقستان كونسۋلدىعى اشىلادى. بۇل تۋرالى اقوردادا موڭعوليا پرەزيدەنتى ۋحنااگين حۋرەلسۇحپەن كەلىسسوزدەردەن كەيىنگى بىرلەسكەن مالىمدەمە بارىسىندا مەملەكەت باسشىسى قاسىم-جومارت توقاەۆ ايتتى. 

— ءبىز ەكىجاقتى قارىم-قاتىناستىڭ بارلىق باعىتى بويىنشا مازمۇندى ءارى ناتيجەلى كەلىسسوزدەر جۇرگىزدىك. ساياسي-ەكونوميكالىق، مادەني-گۋمانيتارلىق جانە وزگە دە سالاداعى ىقپالداستىعىمىزدى ودان ارى ارتتىرۋعا كەلىستىك. اتاپ ايتقاندا، ءبىز موڭعوليانىڭ بايان-ولگەي ايماعىندا قازاقستاننىڭ كونسۋلدىق مەكەمەسىن اشۋ تۋرالى ءوزارا كەلىسىمگە كەلدىك، — دەدى پرەزيدەنت.

مەملەكەت باسشىسىنىڭ پايىمىنشا، مۇنى شىن مانىندە باۋىرلاس ءارى تاريحى تامىرلاس ەلدەرىمىزدىڭ اراسىنداعى ستراتەگيالىق سەرىكتەستىك رۋحىنا ساي كەلەتىن ماڭىزدى قادام دەپ ايتۋعا تولىق نەگىز بار.

— سونداي-اق بۇل موڭعول ەلىنىڭ قازاق حالقىنا دەگەن ىزگى نيەتى مەن شىنايى دوستىق كوڭىلىنىڭ ايقىن كورىنىسى ەكەنى ءسوزسىز. ءبىز بۇل شەشىمدى جوعارى باعالايمىز. وسى ورايدا پرەزيدەنت حۋرەلسۇح مىرزاعا زور العىسىمدى ايتقىم كەلەدى، — دەدى قاسىم-جومارت توقاەۆ.

Abai.kz