تۇركيادا ساپاردا جۇرگەن ناتو-نىڭ باس حاتشىسى مارك ريۋتتە سارسەنبىدە (22 ءساۋىر) ناتو-نىڭ قىتايدان، رەسەيدەن، يراننان جانە تاعى باسقا ەلدەردەن كەلەتىن كوپتەگەن قاۋىپ-قاتەرلەرگە تاپ بولىپ وتىرعانىن ءارى بۇل قاۋىپ-قاتەرلەردى جويۋعا تاس ءتۇيىن دايىن ەكەنىن مالىمدەدى.

ناتو باسشىسى ساپارىنىڭ العاشقى كۇنى تۇركيانىڭ قورعانىس ءمينيسترى ياشار گيۋلەرمەن كەزدەسىپ، وداقتاس ەلدەر ارا ىنتىماقتى نىعايتۋ، قورعانىس شىعىندارىن ارتتىرۋ، تۇركيانىڭ اۋە قورعانىس جۇيەسىن ناتو جۇيەلەرىمەن بىرىكتىرۋ جانە وداقتاستار اراسىنداعى قورعانىس ونەركاسىبىنىڭ ىنتىماقتاستىعىن ودان ءارى ارتتىرۋ سياقتى بىرقاتار ماسەلەلەردى تالقىلادى.

ريۋتتە سارسەنبىدە تۇركيا پرەزيدەنتى رەجەپ تايىپ ەردوعانمەن دە كەزدەستى. تۇرىكتىڭ ايگىلى «Aselsan» قورعانىس كومپانياسىنا بارعاننان كەيىن ول باق-قا: «ءبىز تاپ بولىپ وتىرعان قاۋىپ وتە اۋقىمدى; اركتيكادان جەرورتا تەڭىزىنە دەيىن، عارىشتان تەڭىز تۇبىنە دەيىن، زىمىراندار مەن درونداردان باستاپ كۇردەلى كيبەرشابۋىلدار بار»، - دەدى.

دەسەدە ريۋتتە قىتايدان، رەسەيدەن جانە يراننان كەلەتىن قاۋىپتەردى ەرەكشە اتاپ ءوتتى. ول: «رەسەيدىڭ ۋكرايناداعى سوعىسى جالعاسۋدا; قىتاي دا اسكەري مودەرنيزاتسيا مەن يادرولىق قۋاتىن جان سالا كۇشەيتۋدە. يران ۇرەي تۋدىرىپ، حاوس جاساۋدا»، - دەدى.

ريۋتتە تۇركيانىڭ ونى ناقتى سەزىنىپ وتىرعانىن، سوڭعى اپتالاردا ناتو ۇقساماعان ۋاقىتتا يراننان تۇركياعا قاراي اتىلعان ءتورت بالليستيكالىق زىمىراندى اتىپ تۇسىرگەنىن، ناتو-نىڭ  مۇنداي قاۋىپتەرگە ساقاداي ساي ەكەنىن، تۇركيا مەن بارلىق وداقتاس ەلدەردى قورعاۋ ءۇشىن ارقاشان قاجەتتى شارالاردى قابىلدايتىنىن تىلگە تيەك ەتتى.

ريۋتتە سونداي-اق تۇركيانىڭ ءوندىرىس پەن يننوۆاتسيانى ۇشتاستىرعان Aselsan كومپانياسىنىڭ جاڭا باعىتى ناتو ءۇشىن الداعى كەزەڭدە باستى باسىمدىق بولىپ تابىلاتىنىن، شىلدە ايىندا انكارادا وتەتىن ناتو سامميتىندەگى نەگىزگى تاقىرىپتاردىڭ ءبىرى بولاتىنىن، تۇركيادان ۇيرەنەتىندەرى كوپ ەكەنىن اتاپ ءوتتى.

Abai.kz