ەلوردادا «Astana Eurasian Book Fair-2026» IX حالىقارالىق كىتاپ كورمە-جارمەڭكەسى ءوتىپ جاتىر. بۇل – ورتالىق ازياداعى ەڭ اۋقىمدى مادەني-اعارتۋشىلىق ءىس-شارالاردىڭ ءبىرى، دەپ حابارلايدى ەلوردا اكىمدىگىنىڭ رەسمي سايتى.

استاناداعى كورمە-جارمەڭكە «فوليانت» باسپاسىنىڭ ۇيىمداستىرۋىمەن، قر مادەنيەت جانە اقپارات مينيسترلىگى مەن ەلوردا اكىمدىگىنىڭ قولداۋىمەن ءوتىپ جاتىر.

بيىل «Astana Eurasian Book Fair-2026» الاڭىندا 80-گە جۋىق قاتىسۋشى جينالدى – عىلىمي-ءبىلىم بەرۋ جانە پوليگرافيالىق ۇيىمدار، باسپالار. قاتىسۋشىلار قاتارىندا تەك قازاقستاندىق ەمەس، سونداي-اق رەسەي، تۇركيا، قىرعىزستان، وزبەكستان، ازەربايجان، موڭعوليا، يسپانيا، قىتاي، يران، بەلارۋس، پورتۋگاليا، ۆەنەسۋەلا جانە ۇلىبريتانيا ەلدەرىنەن كەلگەن كومپانيالار بار.

ءىس-شارانىڭ مازمۇندى باعدارلاماسى كەزدەسۋلەردى، كىتاپ تانىستىرىلىمدارىن، اۆتوگراف-سەسسيالاردى، پىكىرتالاستاردى، شەبەرلىك ساباقتارىن جانە تاعى باسقا ءىس-شارالاردى قامتيدى.

«الماتىكىتاپ باسپاسى» باسپاسىنىڭ پرەزيدەنتى گاۋھار سايماساەۆا كورمەگە قاتىسۋدى تۇراقتى جۇمىستىڭ ءبىر بولىگى دەپ سانايدى.

«ءبىز ءداستۇرلى تۇردە Eurasia Book Fest-كە قاتىسامىز جانە حالىقارالىق الاڭدارعا – فرانكفۋرت، بەيجىڭ، لوندون، يتالياعا بارامىز. مۇندا ءوز ونىمدەرىمىز بەن جاڭا جوبالارىمىزدى ۇسىنامىز. نەگىزگى باعىت – «مەنىڭ قازاقستانىم» سەرياسى. ول 25 جىلدان بەرى قازاق، ورىس جانە اعىلشىن تىلدەرىندە جارىق كورىپ كەلەدى. نەگىزىن قالاۋشى – ەلەونورا باتالوۆا نىعمەتقىزى. بيىل وسى ءىس-شارادا جاڭا كىتابىمىزدى تانىستىردىق»، – دەدى باسپا باسشىسى.

اتقارۋشى پروديۋسەر ءاليا ءاشىم دە كىتاپ جارمەڭكەسىنە قاتىسۋدى وسى جۇمىستىڭ قاجەتتى كەزەڭى رەتىندە قاراستىرادى.
«مۇنداي الاڭدار وقىرمانمەن تىكەلەي بايلانىس ورناتۋعا مۇمكىندىك بەرەدى. ءبىز وسىندا وتىرىپ، نەلىكتەن زاماناۋي اۆتورلاردى وقۋدىڭ ماڭىزدى ەكەنىن، ونىڭ ىشىندە ءالى كەڭىنەن تانىلماعان اۆتورلار جايلى ءسوز قوزعايمىز. بۇل – ءىس جۇزىندەگى اقپاراتتاندىرۋ. ونسىز ارى قاراي ەشتەڭە جۇزەگە اسپايدى»، – دەدى ول.

بەلارۋس باسپاسىنىڭ وكىلى سەرگەي تسيۋنەلدىڭ ايتۋىنشا، كومانداسىمەن بىرگە قازاقستانداعى الاڭعا العاش كەلىپ وتىر، دەگەنمەن كومپانيا بۇعان دەيىن ەلدەن تىس جەرلەردە جۇمىس ىستەپ، ءتۇرلى وڭىرلەردە سەرىكتەستەر ىزدەپ كەلەدى.

«ءبىز مينسكىدەن كەلگەن باسپامىز. ەكى باعىتىمىز بار – «نوۆوە زنانيە» جانە «وتكرىتايا كنيگا». ءارتۇرلى وڭىرلەردە سەرىكتەستەردى بەلسەندى ىزدەي باستادىق. قازاقستان مەن وزبەكستاننان باسقا بارلىق جەردە بولدىق. ءبىزدى «فوليانت» شاقىردى، سوندىقتان كەلىپ كورمەك بولدىق. بۇل ءبىز ءۇشىن جاڭا الاڭ»، – دەدى مينسكىدەن كەلگەن قوناق.

«مۇندا ءارتۇرلى جاستاعى ادامدار كەلىپ جاتىر. بىراق نەگىزگى قىزىعۋشىلىق تەك كوركەم ادەبيەتكە عانا ەمەس، بالالاردى وقىتۋ مەن دامىتۋعا باعىتتالعان. اتا-انالار ناقتى ناتيجە بەرەتىن كىتاپتاردى ىزدەيدى. بۇل انىق بايقالادى. بۇل – ءبىز ءۇشىن ەڭ ماڭىزدى تۇجىرىمداردىڭ ءبىرى»، – دەپ قوستى ول.

ونىڭ سوزىنشە، كىتاپتارعا دەگەن جالپى رەاكتسيا وڭ، ال اۋديتوريانىڭ ءبىر بولىگى باسپا ونىمدەرىمەن بۇرىننان تانىس.
ەسكە سالايىق، حالىقارالىق كىتاپ كورمە-جارمەڭكەسى استانادا 26 ساۋىرگە دەيىن جالعاسادى.

Abai.kz