مۇحتار قۇل-مۇحاممەدكە!

تۇركى جۇرتى بولعان ەمەس تۇلدىر ەل،
تاريحىنىڭ تامىرىنان جىر تۇلەر.
«مۇحتار» ءسوزىن كونە تىلدەن اۋدارساڭ
«ماقتاۋلى» مەن «تاڭداۋلىنى» بىلدىرەر.

قارا نيەت قادالعاندا سۇقتار كوپ،
قۇداي ءوزى جىبەرگەندەي: «قۇتقار!» – دەپ.
ات قويۋدان جاڭىلماعان بۇل قازاق،
ەسىم بەرگەن ەرلەرىنە مۇحتار دەپ.

باسىلسا دا تارپاڭ جىلدار تاسىرى،
باسىلماپتى باسىنۋلار، ءاسىلى...
سارى دالا ساعىمىنداي سىرعۋدا
مۇحتارلاردىڭ مارتەبەلى عاسىرى.

پەندەلىگىن بولار، بالكىم، كەشۋگە،
تالاي ۇرپاق سولاردى وقىپ وسۋدە.
قالامىمەن قالىڭ ەلىن تەربەگەن،
مۇحتارلاردىڭ ۇلى كوشى، كوشۋدە.

سىعالارعا قالماعاندا ساۋ ەسىك،
ءدۇيىم ەلدە تۇرعان كەزدە داۋ ەسىپ،
الاش وردا اماناتىن ارقالاپ،
ۇلى ابايدى ۇلىقتادى اۋەزوۆ.

ساحنادا سايران سالىپ ساقاۋ ءۇن،
تۇزەي الماي قويدىق ءتىلدىڭ اقاۋىن.
ۇيقى كورمەي ۇلت تاريحىن تۇگەندەپ،
«بەس عاسىردى» بەزبەندەدى ماعاۋين.

رۋحىمىز جاتقان شاقتا قامالىپ،
شىندىق ىزدەپ شىققان جان ول شام الىپ.
جىرلارىمەن تۇركى جۇرتىن تامسانتتى –
اقيقاتتىڭ الداسپانى شاحانوۆ.

قارسى تۇرىپ ۇلتقا تونگەن ناۋبەتكە،
ءسوز ونەرىن اينالدىردى ساۋلەتكە،
ۇرپاق ءۇشىن ۇلى پارىز اتقارىپ،
ۇشەۋى دە ۇشىپ كەتتى زاۋ كوككە.

جەتىمسىرەپ جۇلدىزى جوق، اي قالدى،
ۋاقىت جاسار ءپاتۋالى بايلامدى.
ءاربىرىنىڭ كىتاپناما – عۇمىرى،
كىتاپحانا رۋحىنا اينالدى.

سانالىعا بولا قويماس سالماق بۇل،
تارازىعا سالار بولساڭ تاڭداپ ءبىر.
ۇلىلاردىڭ ۇزىلمەگەن تىزبەگىن
اكادەميك قۇل-مۇحاممەد جالعاپ تۇر.

تىرشىلىكتە ۇتىلعان بار، ۇتقان بار،
جالعان ۇران قاجەت ەمەس جۇرتتى الدار.
التىن قۇرساق انالارىم تۇرعاندا
دۇنيەگە كەلەر تالاي مۇحتارلار!

الىبەك شەگەباي

Abai.kz