ءماجىلىستىڭ جالپى وتىرىسىندا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە اتقارۋشىلىق ءىس جۇرگىزۋدى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسى ءبىرىنشى وقىلىمدا ماقۇلداندى.

"جەكە سوت ورىنداۋشىلارىنىڭ كاسىبيلىگى مەن جاۋاپكەرشىلىگىن ارتتىرۋ. جەكە سوت ورىنداۋشىلارىنا اتتەستاتسيا ەنگىزىلەدى. ول زاڭنامانى جانە كاسىپتىك ار-نامىس كودەكسىن ءبىلۋ دەڭگەيىن تەكسەرۋدى قامتيدى. قايتا اتتەستاتتاۋدان وتپەگەن جاعدايدا جەكە سوت ورىنداۋشىسىنىڭ ليتسەنزياسى توقتاتىلادى. كومەكشىلەر مەن تاعىلىمدامادان وتۋشىلەرگە قويىلاتىن تالاپتار كۇشەيتىلەدى. سوڭعى ءۇش جىل ىشىندە سىبايلاس جەمقورلىق قۇقىق بۇزۋشىلىقتارى ءۇشىن جاۋاپكەرشىلىككە تارتىلعان ازاماتتار جەكە سوت ورىنداۋشىسىنىڭ كومەكشىسى نەمەسە تاعىلىمدامادان ءوتۋشى بولا المايدى. ادىلەت ورگاندارىنىڭ جەكە سوت ورىنداۋشىلارى قىزمەتىن باقىلاۋ وكىلەتتىگى كەڭەيتىلەدى. تەكسەرۋ قورىتىندىسى بويىنشا زاڭبۇزۋشىلىقتاردى جويۋ تۋرالى نۇسقاما ەنگىزىلەدى. ەگەر ول قاراۋسىز قالدىرىلسا، بۇل جەكە سوت ورىنداۋشىسىنىڭ ليتسەنزياسىن توقتاتا تۇرۋعا نەگىز بولادى", – دەدى ءماجىلىس دەپۋتاتى دميتري كولودا.

قۇجاتقا سايكەس، بورىشكەردى باسپانادان شىعارۋدان 10 كۇنتىزبەلىك كۇن بۇرىن مىندەتتى تۇردە حاباردار ەتۋ ءتارتىبى ەنگىزىلەدى. بۇل شارا ازاماتتارعا دايىندالۋعا جانە باسقا باسپانا تابۋعا مۇمكىندىك بەرەدى. بالامەن قارىم-قاتىناس تارتىبىنە قاتىستى اتقارۋشىلىق قۇجاتتار بويىنشا بورىشكەرلەردى بىرىڭعاي تىزىلىمگە ەنگىزۋگە جول بەرىلمەيدى.

بىتىمگەرلىك كەلىسىم جاساسۋ ءۇشىن اتقارۋشىلىق ءىس جۇرگىزۋدى ءبىر ايعا دەيىن توقتاتا تۇرۋ مۇمكىندىگى كوزدەلىپ وتىر. ەگەر اتقارۋشىلىق قۇجاتتى ۇسىنۋ مەرزىمى وتكەن بولسا، بارلىق ماجبۇرلەپ ورىنداۋ شارالارىنىڭ كۇشىن جويۋ تۋرالى نورما ەنگىزىلەدى.  بۇدان بولەك، اتقارۋشىلىق قۇجاتتى سوڭعى ورىنداعان جانە ءىس جۇرگىزۋدى توقتاتقان سوت ورىنداۋشىسىنا باسقا سوت ورىنداۋشىلارى سالعان بارلىق تىيىم سالۋلاردىڭ كۇشىن جويۋ قۇقىعى بەرىلەدى.

Abai.kz