حانتاۆيرۋس تۋرالى سوڭعى كۇندەرى تاراعان اقپاراتتار كوپشىلىكتى الاڭداتىپ وتىرعانى جاسىرىن ەمەس.

نەگىزىنەن بۇل ۆيرۋس بۇرىننان بەلگىلى بولعانىمەن، قازىرگى تالقىلاۋدىڭ وزەگى – ونىڭ «اند» دەپ اتالاتىن ەرەكشە شتاممى. بۇل شتاممنىڭ باسقا حانتاۆيرۋستاردان باستى ايىرماشىلىعى سول، ول تەك كەمىرگىشتەردەن عانا ەمەس، ادامنان ادامعا دا جۇعۋى مۇمكىن. جاقىندا اتلانت مۇحيتىنداعى MV Hondius كرۋيزدىك لاينەرىندە ورىن العان جاعداي وسى قاۋىپتىڭ بەتىن اشتى. ارگەنتينانىڭ ۋشۋايا قالاسىنان شىققان بۇل كەمەدەگى جولاۋشىلاردىڭ بويىنان بەلگىسىز ينفەكتسيا بەلگىلەرى بايقالىپ، كەيىن ونىڭ حانتاۆيرۋس ەكەنى راستالدى. بورتتاعى 150 ادامنىڭ سەگىزى ۆيرۋس جۇقتىرىپ، وكىنىشكە قاراي، ءۇش ادام كوز جۇمدى. بۇل وقيعا كەمەنىڭ بىرنەشە پورتقا كىرۋىنە شەكتەۋ قويىلىپ، تەڭىزدە وقشاۋلانۋىنا سەبەپ بولدى.

بۇگىنگى تاڭدا الەمدەگى احۋالدى دۇنيەجۇزىلىك دەنساۋلىق ساقتاۋ ۇيىمى ءجىتى باقىلاپ وتىر. ماماندار لاينەردەگى جاعدايدى كۇردەلى دەپ باعالاعانىمەن، جاپپاي پاندەمياعا ۇلاسۋ قاۋپى تومەن ەكەنىن ايتادى. سەبەبى «اند» شتاممى ادامنان ادامعا تەك وتە ۇزاق ۋاقىت بويى بىرگە بولىپ، تىعىز بايلانىستا بولعاندا عانا تارايدى. قازىرگى ۋاقىتتا اۋرۋ جۇقتىرعاندار كانار ارالدارىندا جانە ەۋروپانىڭ وزگە دە ارنايى ەمحانالارىندا وقشاۋلانىپ، ءتيىستى ەم-دوم الىپ جاتىر. سوندىقتان بۇل COVID-19 سياقتى تەز تارالاتىن ينفەكتسيا ەمەس، جاعداي تولىق باقىلاۋعا الىنعان.

قازاقستانعا كەلەر بولساق، ەلىمىز ءۇشىن ءدال قازىر ەشقانداي تىكەلەي جانە جاپپاي قاۋىپ ءتونىپ تۇرعان جوق. وقيعا وشاعى بىزدەن وتە الىس قاشىقتىقتا ورنالاسقان جانە ءبىزدىڭ سانيتارلىق-ەپيدەميولوگيالىق قىزمەتتەر مۇنداي حالىقارالىق جاعدايلار كەزىندە شەكاراداعى باقىلاۋدى بىردەن كۇشەيتەدى. ەلىمىزدە بۇل ۆيرۋستىڭ ادامنان ادامعا جۇعاتىن ەرەكشە شتاممى مۇلدەم تىركەلگەن جوق.

ايانا قازتاي

Abai.kz