الماتى قالاسى تۇركسىب اۋدانىندا تۇرعىنداردىڭ كۇندەلىكتى ومىرىنە جايلى جاعداي جاساۋعا باعىتتالعان اباتتاندىرۋ جۇمىستارى جالعاسىپ جاتىر. بيىل ساكەن سەيفۋللين اتىنداعى سكۆەر مەن جاحانگەر كوشەسىندەگى قوعامدىق كەڭىستىك جاڭارىپ، تۇرعىنداردىڭ دەمالىسىنا ارنالعان زاماناۋي ورىندارعا اينالدى.

سەيفۋللين داڭعىلى مەن شولوحوۆ كوشەسىنىڭ قيىلىسىندا ورنالاسقان ساكەن سەيفۋللين اتىنداعى سكۆەردىڭ اۋماعى 1,7 گەكتاردى قۇرايدى. مۇندا كوگالداندىرۋ جۇمىستارى جۇرگىزىلىپ، جاڭا جارىقتاندىرۋ جۇيەسى ورناتىلدى. جالپى كولەمى 3,2 مىڭ شارشى مەتر اۋماققا گۇلدەر مەن ساندىك وسىمدىكتەر وتىرعىزىلدى. تاگەتەس، سالۆيا، تسەلوزيا، پەتۋنيا، گەران جانە تسيننيا سەكىلدى گۇلدەرمەن قاتار، سپيرەيا، استيلبا، شالفەي، ۆەرونيكا مەن نيۆيانيك سياقتى كوپجىلدىق وسىمدىكتەر دە ەگىلدى.

اۋدان اكىمى دامير اكەجانوۆتىڭ ايتۋىنشا، سكۆەردى جاڭارتۋ جۇمىستارى شامامەن 1,5 اي ىشىندە جۇزەگە اسقان. جوبا دەمەۋشىلەردىڭ قولداۋىمەن ىسكە اسىرىلىپ، وعان شامامەن 50 ملن تەڭگە كولەمىندە قاراجات جۇمسالعان. قازىر مۇندا تۇرعىندار سەرۋەندەپ، بالالار ويناپ، جاستار سپورتپەن اينالىسا الادى. قاۋىپسىزدىك ءۇشىن بەينەباقىلاۋ كامەرالارى ورناتىلعان. الداعى ۋاقىتتا فونتان قويۋ دا جوسپارلانىپ وتىر.

«بۇل جەر بۇرىنعىعا قاراعاندا حالىق كوپ جينالىپ، دەمالاتىن ورىنعا اينالىپ كەلەدى. بالالار ويىن الاڭىندا وينايدى، تۇرعىندار كەشكى ۋاقىتتا سەرۋەندەيدى. جالپى ماقساتىمىز – اۋدان تۇرعىندارىنا جايلى ورتا قالىپتاستىرۋ»، – دەيدى اۋدان اكىمى.

ال جاحانگەر كوشەسى، 14/20 مەكەنجايىندا تۇرعىنداردىڭ ۇسىنىستارى نەگىزىندە جاڭا قوعامدىق كەڭىستىك جاسالدى. جوباعا شامامەن 63 ملن تەڭگە قاراستىرىلىپ، اۋماق تولىقتاي اباتتاندىرىلعان. مۇندا سىرتقى جارىقتاندىرۋ جۇيەسى ورناتىلىپ، برۋسچاتكا مەن اسفالت توسەلدى. ورىندىقتار، قوقىس جاشىكتەرى، پەرگولا، ۇستەل تەننيسى جانە باسقا دا شاعىن ساۋلەتتىك نىساندار قويىلدى.

جەرگىلىكتى تۇرعىن سارا مۇتالحانوۆانىڭ ايتۋىنشا، جاڭا كەڭىستىك كوپشىلىك ءۇشىن سۇيىكتى دەمالىس ورنىنا اينالعان.

«كەشكى ۋاقىتتا اجەلەر وسىندا جينالىپ، دەمالامىز. جاستار بالالارىمەن كەلەدى. قازىر ءوزىمىزدى قالانىڭ ورتاسىنداعى ساياباقتا جۇرگەندەي سەزىنەمىز. بۇل وزگەرىسكە كوشەنىڭ بارلىق تۇرعىنى ريزا»، – دەيدى ول.

اۋدان اكىمى بۇل جوبانىڭ باستى ەرەكشەلىگى تۇرعىنداردىڭ پىكىرىنە سۇيەنىپ جۇزەگە اسىرىلعانىن اتاپ ءوتتى. ياعني جاڭا دەمالىس ورنى ناقتى قاجەتتىلىككە قاراي جاسالعان.

تۇركسىب اۋدانىندا مۇنداي جوبالار الداعى ۋاقىتتا دا جالعاسپاق. 2026 جىلى اۋداندا 24 بالالار الاڭىن ىسكە اسىرۋ جوسپارلانعان، ولاردىڭ باسىم بولىگى اياقتالۋعا جاقىن. جوبالاردىڭ بارلىعى تۇرعىنداردىڭ سۇرانىسى مەن ۇسىنىستارىن ەسكەرە وتىرىپ جۇزەگە اسىرىلۋدا.

قوعامدىق كەڭىستىكتى اباتتاندىرۋ – تەك اۋماقتى كوركەيتۋ ەمەس، تۇرعىنداردىڭ كۇندەلىكتى ءومىر ساپاسىن ارتتىرۋدىڭ ماڭىزدى بولىگى. تۇركسىب اۋدانىنداعى جاڭا نىساندار وسىنىڭ ناقتى مىسالى. بۇرىن بوس نەمەسە تولىق پايدالانىلماعان اۋماقتاردىڭ تۇرعىندار باس قوساتىن، بالالار وينايتىن جانە دەمالاتىن جايلى ورىندارعا اينالۋى اۋداننىڭ قالالىق ورتاسىن جاڭا دەڭگەيگە كوتەرىپ وتىر.

Abai.kz