قازاق قىزى اسەل روبەرتس (قىز كۇنىندەگى تەگى – تولەنوۆا) سلوۆەنياداعى اقش ەلشىسى قىزمەتىنە كوپشىلىك داۋىسپەن بەكىتىلدى. اقش سەناتىندا ونىڭ كانديداتۋراسىن 46 سەناتور قولداپ، 43-ءى قارسى داۋىس بەردى.

ول – اقش تاريحىندا ەلشى بولىپ تاعايىندالعان تۇڭعىش ەتنيكالىق قازاق.

اسەل روبەرتس 1976 جىلى جامبىل وبلىسىندا دۇنيەگە كەلگەن. الماتىداعى ورتا مەكتەپتە وقىپ، ءجاسوسپىرىم شاعىندا اقش-قا قونىس اۋدارعان جانە ورتا مەكتەپتى سول جاقتا اياقتاعان.

1993 جىلى دجوردجتاۋن ۋنيۆەرسيتەتىنە ءتۇسىپ، ەدمۋند ۋولش اتىنداعى ديپلوماتيالىق قىزمەت مەكتەبىن حالىقارالىق قۇقىق جانە ۇيىمدار سالاسىنداعى عىلىم باكالاۆرى دارەجەسىمەن ءبىتىردى. ستۋدەنت كەزىندە اق ۇيدە تاعىلىمدامادان وتكەن.

1999 جىلدان (كەيبىر دەرەكتەر بويىنشا، 2005 جىلدان) باستاپ اقش پرەزيدەنتىنىڭ حاتتاما قىزمەتىندە (پروتوكول دەپارتامەنتى) جۇمىس ىستەيدى.

2014 جىلدان باستاپ – اقش پرەزيدەنتى حاتتاما دەپارتامەنتى باسشىسىنىڭ ورىنباسارى جانە ديرەكتور مىندەتىن اتقارۋشى.

2021 جىلعى 20 قاڭتاردان 2022 جىلعى 3 قاڭتارعا دەيىن – اقش-تىڭ مەملەكەتتىك حاتتاما قىزمەتىنىڭ باسشىسى مىندەتىن اتقارۋشى بولدى.

ديپلوماتيالىق قىزمەتكە كانديداتۋراسىن 2026 جىلدىڭ اقپانىندا پرەزيدەنت دونالد ترامپ ۇسىندى.

ناۋرىز ايىندا اسەل روبەرتس سەناتتىڭ حالىقارالىق قاتىناستار كوميتەتىندەگى تىڭداۋدان ءوتىپ، سودان كەيىن ماسەلە جالپى داۋىس بەرۋگە شىعارىلدى.

اسەل روبەرتس ۆيردجينيا شتاتىنىڭ اتىنان وكىلدىك ەتەدى.

تۇرمىستا، ءبىر قىز تاربيەلەپ وتىر. ەلشى حانىم قازاق، ورىس، اعىلشىن جانە جاپون تىلدەرىن جەتىك مەڭگەرگەن.

ول 20 جىلدان بەرى اقش ازاماتى شون روبەرتسپەن نەكەدە.

شون دجوردج ۆاشينگتون ۋنيۆەرسيتەتىنىڭ دوتسەنتى ءارى حالىقارالىق دامۋدى زەرتتەۋ كافەدراسىنىڭ ديرەكتورى.

ونىڭ زەرتتەۋلەرى ورتالىق ازياعا باعىتتالعان.

باقىتتى جۇپ ايدىن ەسىمدى قىزدارىن تاربيەلەپ وتىر.

Abai.kz