ەلىمىزدىڭ مەكتەپتەرىندە 2025–2026 وقۋ جىلى قورىتىندىلانۋدا. بيىل ەلىمىز بويىنشا 3,9 ميلليوننان استام وقۋشى وقۋ جىلىن اياقتايدى. ونىڭ ىشىندە 215 مىڭنان استامى – 11-سىنىپ تۇلەكتەرى.

وقۋ جىلىنىڭ قورىتىندىسى بويىنشا 9-سىنىپتى ۇزدىك اياقتاۋعا 31 مىڭنان استام وقۋشى ۇمىتكەر بولسا، 11-سىنىپتى ۇزدىك بىتىرۋگە 18 مىڭ وقۋشى ءۇمىت ارتىپ وتىر. قازىرگى تاڭدا ەلىمىزدىڭ ءبىلىم بەرۋ ۇيىمدارىندا 420 مىڭنان استام پەداگوگ ەڭبەك ەتەدى.

مەملەكەت باسشىسىنىڭ تاپسىرماسىمەن جۇزەگە اسىرىلىپ جاتقان "كەلەشەك مەكتەپتەرى" ۇلتتىق جوباسى اياسىندا 217 زاماناۋي مەكتەپ پايدالانۋعا بەرىلدى. ونىڭ 84-ءى اۋىلدىق ەلدى مەكەندەردە ورنالاسقان. بۇگىندە بۇل ءبىلىم وردالارىندا 220 مىڭنان استام وقۋشى ءبىلىم الىپ، 16 مىڭعا جۋىق پەداگوگ جۇمىس ىستەيدى.

وقۋ جىلىنىڭ اياقتالۋىنا وراي 25 مامىر كۇنى ەلىمىزدىڭ بارلىق مەكتەپتەرىندە ء"بىلىمىم – وتانىما!" تاقىرىبىندا بىرىڭعاي سىنىپ ساعاتى وتەدى. وندا وقۋ جىلى قورىتىندىلانىپ، وقۋشىلاردىڭ جەتىستىكتەرى مەن ەستە قالعان ساتتەرى ايتىلىپ، "ادال ازامات" باعدارلاماسىنىڭ قۇندىلىقتارىنا ەرەكشە نازار اۋدارىلادى. سونىمەن قاتار وقۋشىلارعا جازعى دەمالىس كەزىندە وقۋعا ۇسىنىلاتىن ادەبيەتتەر ءتىزىمى تانىستىرىلادى.

وقۋ-اعارتۋ مينيسترلىگى مەن جەرگىلىكتى اتقارۋشى ورگانداردىڭ بىرلەسكەن شەشىمىنە سايكەس مەكتەپ ءبىتىرۋ ءىس-شارالارىن مەيرامحانالاردا، كافەلەردە، بانكەت زالدارىندا، دەمالىس بازالارىندا جانە تابيعات اياسىندا وتكىزۋگە تىيىم سالىندى.

سونداي-اق اتا-انالاردان، زاڭدى وكىلدەردەن جانە وقۋشىلاردان اقشا جيناۋعا، سىيلىقتار تالاپ ەتۋگە جول بەرىلمەيدى. اتتەستاتتار مەن ديپلومداردى تابىستاۋ راسىمدەرى تەك ءبىلىم بەرۋ ۇيىمدارىنىڭ قابىرعاسىندا ۇيىمداستىرىلادى.

مينيسترلىك بۇل شارالار مەكتەپ ءبىتىرۋ ءىس-شارالارى كەزىندە قاۋىپسىزدىك پەن قوعامدىق ءتارتىپتى قامتاماسىز ەتۋگە، سونداي-اق ءبىلىم بەرۋ ۇيىمدارىندا "زاڭ مەن ءتارتىپ" قاعيداتىن نىعايتۋعا باعىتتالعانىن اتاپ ءوتتى.

Abai.kz