«ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا الماتى قالاسىندا جىلۋمەن جابدىقتاۋ سالاسىن جاقسارتۋ ماقساتىندا ءىرى جوبا قولعا الىندى.

جوبا اياسىندا جەو-2-دەن باتىس جىلۋ كەشەنىنە دەيىنگى جىلۋ ماگيسترالىنىڭ ەسكىرگەن قۇبىرلارى تولىعىمەن جاڭاسىنا اۋىستىرىلىپ، قايتا جاڭارتىلادى. جوبانىڭ جالپى قۇنى شامامەن 54 ملرد تەڭگەنى قۇرايدى. جاڭعىرتۋ جۇمىستارىن «الماتى ەلەكتر ستانتسيالارى» اق ىسكە اسىرادى.

جەو-2 – بجك جىلۋ ماگيسترالى جەو-2-دەن بجك-عا قوسىمشا سۋ جىبەرەدى جانە الماتى قالاسىنىڭ ورتالىقتاندىرىلعان جىلۋمەن جابدىقتاۋ ايماعىنا جىلۋ جۇكتەمەسىنىڭ بەرىلۋىن قامتاماسىز ەتەدى.

جىلۋ ماگيسترالىنىڭ جاي-كۇيى مەن قايتا جاڭارتىلۋى (رەكونسترۋكتسيالاۋ): 

پايدالانۋ مەرزىمى: دۋ-800 قۇبىرى 1980 جىلى، ال دۋ-1000 قۇبىرى 1984 جىلى ىسكە قوسىلعان. جىلۋ ماگيسترالى «الماتى جىلۋ جۇيەسى» جشس-نەن «الەس» اق تەڭگەرىمىنە (بالانسىنا) 2013 جىلى بەرىلدى. ءنورماتيۆتى قىزمەت ەتۋ مەرزىمى 25 جىل بولسا، بۇل جىلۋ ماگيسترالىنىڭ بۇگىنگى تاڭدا پايدالانىلىپ جاتقانىنا 40 جىلدان اسقان.

تەحنيكالىق جاعدايى: 

نىسانعا تەحنيكالىق قىزمەت كورسەتۋ تۇراقتى تۇردە جۇرگىزىلىپ تۇرادى. جىل سايىن جىلۋ ماگيسترالىندە اعىمداعى جوندەۋ جانە الدىن الۋ (پروفيلاكتيكالىق) شارالارى وتكىزىلەدى.

توزۋ دەڭگەيى: 

2022-2025 جىلدار ارالىعىندا جىلىتۋ ماۋسىمىندا جىلۋ ماگيسترالىندە ورتا ەسەپپەن 45-تەن استام زاقىمدانۋ جاعدايى تىركەلدى. سونداي-اق، جىل سايىن جىلىتۋ ماۋسىمى اياقتالعاننان كەيىن پاۆيلوندارداعى ديامەترى D 1000 بەكىتكىش ارماتۋرالار جوندەلىپ، تەكسەرىستەن وتەدى. قازىرگى كەزگە دەيىن بۇل ۋچاسكەدەگى قۇبىر 85% توزعان.

جوندەۋ جانە جاڭارتۋ جۇمىستارى قالاي ءجۇرىپ جاتىر؟ 

قۇجاتتاما: قۇرىلىس-مونتاجداۋ جۇمىستارىن جۇرگىزۋگە، سونداي-اق تەحنيكالىق جانە اۆتورلىق قاداعالاۋ جاساۋعا شارتتار جاسالدى. قۇرىلىس-مونتاجداۋ جۇمىستارىن باستاۋ ءۇشىن رۇقسات قۇجاتتارى، دالىرەك ايتقاندا، جۇمىستاردىڭ باستالعانى تۋرالى حابارلاما-تالون الىندى.

جۇمىس مەرزىمى: 

نىساندى قايتا جاڭارتۋ جانە جوندەۋ جۇمىستارى بەكىتىلگەن كەستەگە ساي 2026 جىلدىڭ ءساۋىر ايىنىڭ سوڭىندا باستالدى. قازىرگى كەزەڭدە قۇرىلىسقا قاجەتتى ماتەريالدار جەتكىزىلىپ جاتىر. سونداي-اق قۇرىلىس-مونتاجداۋ جۇمىستارىن جۇرگىزۋ ءۇشىن قۇبىرلار كەزەڭ-كەزەڭىمەن ىستەن شىعارىلىپ جاتىر.

جوبانى ىسكە اسىرۋ قاشان اياقتالادى؟ 

جۇمىستار بەكىتىلگەن كەستەگە سايكەس جۇرگىزىلۋدە. جۇمىستىڭ ءبىرىنشى كەزەڭىن 2026 جىلدىڭ قازان ايىندا اياقتاۋ جوسپارلانعان.

وتاندىق ءونىم ۇلەسى: 

جۇمىس بارىسىندا قۇرىلىس ماتەريالدارى، قۇبىر ونىمدەرى، مەتالل پروكاتى جانە ەلەكتر جابدىقتارى قولدانىلادى. بۇل رەتتە وتاندىق وندىرىستەن شىعارىلعان ماتەريالداردىڭ ۇلەسى 99%.

الماتىدا بۇگىندە رەسمي مالىمەت بويىنشا 2,2 ميلليوننان استام حالىق تۇرادى. ولار ءۇشىن قالادا قولايلى ءارى قاۋىپسىز ءومىر ءسۇرۋدىڭ بارلىق جاعدايى جاسالۋدا. مەگاپوليس حالقىنىڭ جىل سايىن قارقىندى ءوسۋى قالانىڭ ينجەنەرلىك جەلىلەرىنە تۇسەتىن سالماقتى دا ەسەلەپ ارتتىرىپ وتىر. وسى ورايدا، تۇرعىنداردى ساپالى اۋىز سۋمەن، ۇزدىكسىز ەلەكتر قۋاتىمەن جانە سەنىمدى جىلۋمەن قامتاماسىز ەتۋ — قالا بيلىگى مەن ەنەرگەتيكتەردىڭ باستى مىندەتىنە اينالدى.

جەو-2-دەن باتىس جىلۋ كەشەنىنە دەيىنگى ماگيسترالدى جاڭعىرتۋ — وسى باعىتتاعى ەڭ اۋقىمدى قادامداردىڭ ءبىرى. قىس مەزگىلىندەگى قاتىگەز ايازداردا ۇيلەردىڭ جىلى ءارى جايلى بولۋى تىكەلەي وسى قۇبىرلاردىڭ وتكىزۋ قابىلەتىنە بايلانىستى. 85 پايىزعا توزعان ەسكى جۇيەنىڭ اۋىستىرىلۋى الماتىلىقتاردىڭ الداعى ونجىلدىقتاردا كوممۋنالدىق اپاتتاردان قورىقپاي، بەيقۇت ءومىر سۇرۋىنە كەپىلدىك بەرەدى. ونىڭ ۇستىنە، جوبادا وتاندىق ءونىم ۇلەسىنىڭ جوعارى بولۋى ەل ەكونوميكاسىن قولداۋدىڭ جارقىن ۇلگىسى. قالانىڭ ءوسىپ-وركەندەۋىنە باعىتتالعان مۇنداي ينۆەستيتسيالار الماتىنى زاماناۋي ءارى جايلى سمارت-سيتي دەڭگەيىنە كوتەرەدى.